ក្លិបព្រះខ័នរាជស្វាយរៀង នឹងត្រូវបើកទ្វារពហុកីឡដ្ឋានជាតិមរតកតេជោ ទទួលក្រុម Tampines Rovers របស់សិង្ហបុរី វិញម្ដង នារាត្រីថ្ងៃទី៥ ខែវិច្ឆិកា ឆ្នាំ២០២៦ នេះ ក្នុងជើងទី២ នៃ​ពាន​រង្វាន់​លំដាប់​ទី២ ប្រចាំទ្វីបអាស៊ី AFC Champions League Two 2026/27 ពូលG ក្រោយ​ទទួល​បាន​ជ័យ​ជម្នះ​ក្រៅដី ៥-១ កាលពីចុងខែតុលាកន្លងទៅ។

ថ្លែងក្នុងសន្និសីទសារព័ត៌មានមុនការប្រកួតលោក Matthew McConkey គ្រូបង្វឹកព្រះខ័ន​រាជ​ស្វាយ​រៀង ​បានបង្ហាញពីការត្រៀមខ្លួនរួចរាល់ សម្រាប់ជំនួបដ៏សំខាន់នេះ បន្ទាប់ពីមាន​ពេល​វេលា​សមរម្យ​ដើម្បី​រៀបចំក្រុម។ យ៉ាងណាលោកបានក្រើនរំឮកកូនក្រុម ត្រូវមានការប្រុង​ប្រយ័ត្ន​ខ្ពស់គ្រ​ប់​ពេល​ ព្រោះ Tampines Rovers ជាក្រុមដែលពិបាកស្មាន ហើយកាន់តែពិបាក បើធៀប​កាល​ពី​ជួប​គ្នាជើង​ទី១។

ដោយឡែកលោក Nazri Nasir គ្រូបង្វឹកក្រុម Tampines Rovers បានលើកឡើងថា ការជួប​ព្រះខ័ន​រាជ​ស្វាយរៀង មិនមែនជារឿងងាយស្រួលឡើយ តែលោកនឹងព្យាយាម​ដើម្បី​ទទួល​បាន​លទ្ធផល​ល្អប្រ​សើរ ជាពិសេសលោកមិន​ចង់​ឃើញ​ការ​របូត​គ្រាប់​បាល់​ច្រើន​គ្រាប់​កើត​ឡើង​ម្ដង​ទៀត​ ដូចកាលពីជួបគ្នាជើងទី១ឡើយ។

គួរដឹងថា នេះគឺជាការប្រកួតដ៏សំខាន់មួយសម្រាប់ក្រុមម្ចាស់ផ្ទះ ក្នុងចំណោម ៣ប្រកួតនៅសល់ ដែល​ព្រះខ័នរាជស្វាយរៀង ទាមទារពិន្ទុដាច់ខាត ដើម្បីរក្សាឱកាសប្រជែងកៅអីវគ្គបន្ដ មុន​ជួប​ក្រុម​កំពូល​តារាង Machida Zelvia របស់ជប៉ុន នាថ្ងៃទី២៦ ខែវិច្ឆិកា និងជួបក្រុមខ្លាំង Shanghai Shenhua របស់ចិន នាដើមខែធ្នូខាងមុខ។

បច្ចុប្បន្នព្រះខ័នរាជស្វាយរៀង កំពុងឈរលេខ២ មាន ៤ពិន្ទុ ស្មើក្រុម Shanghai Shenhua ដែល​ឈរ​លេខ៣ តាមពីក្រោយក្រុមខ្លាំងជប៉ុន Machida Zelvia ដែលរកបាន ៩ពិន្ទុពីជ័យ​ជម្នះ​គ្រប់​ការ​ប្រកួត កាលពីជើងទី១ ។ រីឯក្រុម Tampines Rovers ដែលមិនទាន់មានពិន្ទុរាប់ឡើយ ក្រោយ​រងបរាជ័យ ៣ប្រកួតជាប់គ្នា មុនជួបព្រះខ័នរាជស្វាយរៀង យប់នេះ៕ អត្ថបទ លី ឈុនឡា