សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានប្រកាសឯកភាពលើគម្រោងហេដ្ឋារចនាសម្ព័ន្ធផ្លូវជនបទតម្លៃប្រមាណ ២៧០ លានដុល្លារ ជាមួយធនាគារពិភពលោក (World Bank) ដោយបង្វែរយុទ្ធសាស្ត្រពីការប្រើប្រាស់គ្រឿងចក្រធំៗរបស់ក្រុមហ៊ុនម៉ៅការ មកជាការចុះកិច្ចសន្យាផ្ទាល់ជាមួយសហគមន៍មូលដ្ឋានវិញ ដើម្បីបង្កើតការងារ និងផ្តល់ប្រភពចំណូលដោះស្រាយជីវភាពជូនប្រជាពលរដ្ឋ។

សម្ដេចធិបតី នាយករដ្ឋមន្រ្ដី បានថ្លែងបញ្ជាក់បែបនេះ ក្នុងឱកាស អញ្ជើញចែកពូជស្រូវ និងស្បៀង ជូនប្រជាពលរដ្ឋរងផលប៉ះពាល់ដោយសារជំនន់ទឹកភ្លៀង នៅខេត្តពោធិ៍សាត់ នាព្រឹកថ្ងៃទី៥ ខែវិច្ឆិកា ឆ្នាំ២០២៦។

ក្នុងឱកាសនោះសម្ដេចធិបតីបានថ្លែងថា រាជរដ្ឋាភិបាល បានឯកភាពលើគម្រោងប្រមាណ២៧០លានដុល្លារ រយៈពេល ១៨ខែ ដែលកម្ពុជាធ្វើការ ជាមួយធនាគារពិភពលោក ដើម្បីធ្វើផ្លូវ។

សម្តេចធិបតី បានបញ្ជាក់ថា៖«ម្សិលមិញ ខ្ញុំទើបឯកភាពទៅលើគម្រោង ប្រមាណ២៧០លានដុល្លារ ដែលត្រូវអនុវត្ដចំនួន១៨ខែ ហើយគម្រោងនេះ យើងធ្វើការជាមួយធនាគារពិភពលោក ដើម្បីបង្វិលថវិកាក្នុងគម្រោង ដែលយើងធ្វើផ្លូវ»។

សម្តេចធិបតីបានឲ្យដឹងថា៖«រាជរដ្ឋាភិបាលយកលុយ ២៧០លានដុល្លារនេះមកធ្វើផ្លូវ និងហេដ្ឋារចនាសម្ព័ន្ធដដែល គ្រាន់តែមិនប្រើរោងចក្រ ដោយធ្វើកុងត្រាជាមួយសហគមន៍ ដើម្បីផ្ដល់ការងារនៅក្នុងសហគមន៍ ដូច្នេះថវិកានេះ មិនត្រឹមតែបានក្រុមហ៊ុនកុងត្រានោះទេ គឺចូលទៅក្នុងសហគមន៍។សម្តេចបវរធិបតី ហ៊ុន ម៉ាណែត បានគូសបញ្ជាកថ់ថា គម្រោងនេះ ត្រូវអនុវត្ដជាបន្ទាន់ ដោយមិនត្រូវចាំ៥ឆ្នាំនោះទេ គឺដាក់ចូលដើម្បីធ្វើ នៅក្នុងរយៈពេល១៨ខែ ចាប់ផ្ដើមពីដើមឆ្នាំ២០២៧តទៅ»។

សូមជម្រាបថា គម្រោងកែលម្អផ្លូវជនបទនេះ ដើមឡើយត្រូវបានគ្រោងទុកសម្រាប់រយៈពេល ៥ ឆ្នាំ ប៉ុន្តែរាជរដ្ឋាភិបាលបានចរចាជាមួយធនាគារពិភពលោក ដើម្បីពន្លឿនការអនុវត្តមកត្រឹម ១៨ ខែ វិញ (គ្រោងចាប់ផ្តើមនៅដើមឆ្នាំ ២០២៧)។ សម្ដេចធិបតីបន្តថា យន្តការនេះ គឺជាការផ្តល់ចំណូលដល់សហគមន៍, ជាជំនួសឱ្យការប្រើប្រាស់គ្រឿងចក្រទាំងស្រុងដោយក្រុមហ៊ុនធំៗ ដោយរដ្ឋនឹងយកថវិកាទាំងនេះទៅចុះកិច្ចសន្យា (កុងត្រា) ជាមួយសហគមន៍ផ្ទាល់ ដើម្បីឱ្យប្រជាពលរដ្ឋនៅក្នុងមូលដ្ឋានមានឱកាសចូលរួមធ្វើការ និងទទួលបានកម្រៃពលកម្មដោយផ្ទាល់។

ក្រសួងពាក់ព័ន្ធក្នុងការអនុវត្ត សម្ដេចធិបតីបានថ្លែងថា គម្រោងអភិវឌ្ឍន៍រួមគ្នានេះ នឹងត្រូវសហការអនុវត្តដោយក្រសួងចំនួន ៣ គឺ ក្រសួងអភិវឌ្ឍន៍ជនបទ ក្រសួងកសិកម្ម រុក្ខាប្រមាញ់ និងនេសាទ និងក្រសួងធនធានទឹក និងឧតុនិយម។

បើតាមប្រសាសន៍សម្ដេចធិបតី គោលបំណងចម្បងនៃការកែទម្រង់របៀបការងារក្នុងគម្រោងនេះ គឺដើម្បីធានាថា ថវិកាជំនួយ និងឥណទានអភិវឌ្ឍន៍មិនត្រឹមតែបង្កើតបានជាសមិទ្ធផលផ្លូវថ្នល់ និងប្រព័ន្ធធារាសាស្ត្រប៉ុណ្ណោះទេ ប៉ុន្តែវាបានធ្លាក់ទៅដល់ដៃប្រជាពលរដ្ឋនៅតាមជនបទចំៗ ដែលជាការជំរុញសេដ្ឋកិច្ចសហគមន៍ឱ្យមានភាពរស់រវើកឡើងវិញ៕