អនុគណៈកម្មការទី៤ គឺសន្តិសុខ សណ្តាប់ធ្នាប់ និងសង្រ្គោះ បានបញ្ជាក់ថា ផែន​ការ​ការពារ​សន្តិសុខ ​ជូនប្រមុខរដ្ឋ ប្រមុខរាជរដ្ឋាភិបាល ចូលរួមកិច្ចប្រជុំកំពូលហ្វ្រង់កូហ្វូនី លើកទី២០ នៅ​ក្នុង​ប្រទេសកម្ពុជា នៅពាក់កណ្ដាលខែនេះ គឺត្រូវបានរៀបចំយ៉ាងហ្មត់ចត់ និងសង្ឃឹមថា​កិច្ច​ការងារ​នេះនឹងទទួលបានជោគជ័យ។

ឧត្តមសេនីយ៍ឯក យឹម លាង អគ្គស្នងការរងនគរបាលជាតិ និងជា​អនុ​ប្រធាន​អនុ​គណៈ​កម្មការ​ទី៤​ (សន្តិសុខ សណ្តាប់ធ្នាប់ និងសង្រ្គោះ) បានបញ្ជាក់ថា មកដល់ពេលនេះ ព័ត៌មាន​ដែល​ទទួល​បាន​តាមរយៈការចុះឈ្មោះលើប្រព័ន្ធអនឡាញ គឺមានគណៈប្រតិភូជាង៧០ប្រទេស ដោយ​ក្នុង​នោះ​ថ្នាក់ប្រមុខរដ្ឋ ប្រមុខរាជរដ្ឋាភិបាលមានប្រមាណជាង២០ប្រទេស និងគណៈ​ប្រតិភូ​ជាង​៧០០​នាក់​ ដែលនឹងអញ្ជើញចូលរួមព្រឹត្តិការណ៍កិច្ចប្រជុំកំពូលហ្វ្រង់កូហ្វូនីលើកទី២០ ចាប់​ពី​ថ្ងៃ​ទី​១៤-១៦ ខែវិច្ឆិកា ឆ្នាំ២០២៦។ ហើយអនុគណៈកម្មការទី៤ គឺសន្តិសុខ សណ្តាប់ធ្នាប់ និង​សង្រ្គោះ​បាន​ត្រៀមកម្លាំងការពារ និងដាក់ពង្រាយតាមគោលដៅសំខាន់ៗ គឺមានសណ្ឋាគារ និង​ព្រឹត្តិការណ៍អមពីរ និងដាក់ពង្រាយកម្លាំងការពារនៅមជ្ឈមណ្ឌល OCIC ដែល​ជា​កន្លែង​កិច្ច​ប្រជុំ​កំពូល​តែ​ម្តង​។ ចំពោះការការពារសន្តិសុខ សណ្តាប់ធ្នាប់គឺប្រើប្រាស់កម្លាំងជាង ២ម៉ឺននាក់ មក​ពី​៣១​ស្ថាប័ន​អង្គភាពដែលជាស្ថាប័នសំខាន់ៗ។ ចំពោះការអញ្ជើញ​ទៅ​ទស្សនកិច្ច​របស់​ប្រធានា​ធិបតី​បារាំង​នៅ​ខេត្តសៀមរាប គឺបាន​ត្រៀម​សហការ​ជាមួយ​គណៈបញ្ជា​ការ​ឯកភាព​ខេត្ត​សៀមរា​ប​។

ឯកឧត្តម បានបន្តថា ក្នុងនាមអនុគណៈកម្មការទី៤ សន្តិសុខ សណ្តាប់ធ្នាប់ និងសង្រ្គោះ សង្ឃឹម​ជឿជា​ថា នៅក្នុងការការពារកិច្ចប្រជុំកំពូលហ្វ្រង់កូហ្វូនីលើកទី២០ នឹងទទួល​បាន​ជោគ​ជ័យ​១០០%​ ព្រោះ កម្លាំងដល់ទៅ​ជាង​២​ម៉ឺន​នាក់​មក​ពី​៣១​ស្ថាប័ន​អង្គភាព​ដែល​ជា​ស្ថាប័ន​ជំនាញ​ៗ​ពាក់​ព័ន្ធ​ទៅនឹងការការពារសុវត្ថិភាពជូនថ្នាក់ដឹកនាំជាតិ អន្តរជាតិ ហើយក៏​ធ្លាប់​បាន​ឆ្លង​កាត់​ការ​ការពារ​កិច្ច​ប្រជុំធំៗនានាពេលកន្លងមកដែលកម្ពុជាទទួលធ្វើជាម្ចាស់ផ្ទះកន្លងមក។

សូមជម្រាបថា នៅថ្ងៃទី១៥ ខែវិច្ឆិកា ឆ្នាំ២០២៦ ព្រះរាជពិធីបើក​កិច្ច​ប្រជុំ​កំពូល​ហ្វ្រង់កូហ្វូនី​លើក​ទី​២០​ ប្រព្រឹត្តទៅក្រោមព្រះរាជអធិបតីភាពដ៏ខ្ពង់ខ្ពស់បំផុតព្រះករុណាព្រះបាទសម្តេចព្រះ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា។ នៅថ្ងៃទី១៦ ខែវិច្ឆិកា ពិធី​បិទ​កិច្ច​ប្រជុំ​កំពូលក្រោមអធិបតីភាពដ៏ខ្ពង់ខ្ពស់ឯកឧត្តម អេម៉ានុយអែល ម៉ាក្រុង ប្រធានាធិបតីបារាំង។ សម្តេចធិបតី ហ៊ុន ម៉ាណែត អញ្ជើញជា​អធិបតី​ភាព​ដ៏​ខ្ពង់​ខ្ពស់​ពិធី​បើក​ពិព័រណ៍​ហ្វ្រង់​កូតិច​នៅ​ថ្ងៃ​ទី​១៥ ខែវិច្ឆិកា ឆ្នាំ២០២៦ នៅមជ្ឈមណ្ឌលសន្និបាតនិងពិពណ៌កោះពេជ្រ។ ពិធី​បើក​វីឡា​ហ្វ្រង់​ហ្វូកូនី​នឹង​ប្រព្រឹត្តទៅនៅថ្ងៃទី១៤ ខែវិច្ឆិកា ឆ្នាំ២០២៦ ក្រោមអធិបតីភាពលោកជំទាវបណ្ឌិត ពេជ ចន្ទមុន្នី និងលោកជំទាវអគ្គលេខាធិការដ្ឋានហ្វ្រង់ហ្វូកូនី៕ អត្ថបទ៖ វង្ស សុភាព