ក្រុមព្រះខ័នរាជស្វាយរៀង និងភ្នំពេញក្រោន នឹងត្រូវធ្វើការងារធ្ងន់ ក្រោយបញ្ចប់យុទ្ធនាការប្រកួតពានរង្វាន់អន្ដរជាតិ AFC Champions League Two 2026/27 ដោយត្រូវបើកទ្វារផ្ទះទទួលក្រុមខ្លាំងរៀងៗខ្លួន ក្នុងជំនួបសប្ដាហ៍ពិន្ទុសប្ដាហ៍ទី៧ នៃលីគកំពូលកម្ពុជា ឆ្នាំ២០២៦/២៧ នាថ្ងៃទី៨ ខែវិច្ឆិកាចុងសប្ដាហ៍នេះ ស្របពេលអង្គរថាយហ្គឺរ នឹងត្រូវជួបក្រុមកំពូលតារាងវិសាខា នៅថ្ងៃជាមួយគ្នា។

ថ្ងៃអាទិត្យចុងសប្ដាហ៍នេះ ត្រូវបានអ្នកគាំទ្រចាត់ទុកជាថ្ងៃ Super Sunday ឬជាថ្ងៃដែលប្រជុំដោយការប្រកួតបាល់ទាត់គូធំៗប្រចាំសប្ដាហ៍ ជាក់ស្ដែងគឺនឹងមានក្រុមខ្លាំង ប៉ះខ្លាំង រហូតដល់ ៣គូ ក្នុងនោះក្រុមព្រះខ័នរាជស្វាយរៀង នឹងត្រូវបើកទ្វារកីឡដ្ឋានស្វាយរៀង ទទួលក្រុមមិនទាន់ស្គាល់ចាញ់ដូចគ្នា ណាហ្គាវើលដ៏ គ្រាដែលភ្នំពេញក្រោន ត្រូវជួបក្រុមបឹងកេត ដែលអ្នកគាំទ្រឲ្យឈ្មោះជំនួប The Cambodian Classic Match និង ១គូទៀត គឺមិនទាន់ចាញ់វិសាខា ប៉ះម្ចាស់ផ្ទះអង្គរថាយហ្គឺរ។

នេះគឺជាជំនួបដែលអ្នកគាំទ្រមិនគួរមើលរំលង ដ្បិតក្រុមនីមួយៗ សុទ្ធតែត្រូវការ ៣ពិន្ទុ ក្នុងគោលដៅផ្សេងៗ បន្ទាប់ពីការប្រកួតនេះ ដូចជាវិសាខា ត្រូវការពិន្ទុដើម្បីរក្សាកៅអីកំពូលតារាង ខណៈណាហ្គាវើលដ៏ ក៏ដូចគ្នា គ្រាដែលព្រះខ័នរាជស្វាយរៀង និងអង្គរថាយហ្គឺរ ត្រូវការជ័យជម្នះ ដើម្បីបង្កើនចំណាត់ថ្នាក់ក្នុងតារាងពិន្ទុឲ្យកាន់តែល្អប្រសើរ ជាពិសេសគឺភ្នំពេញក្រោន និងបឹងកេត ដែលត្រូវការជ័យជម្នះដាច់ខាតរៀងៗខ្លួន ដើម្បីគេចពីតំបន់ក្រុមខាងក្រោមទាំង ៥។ ទាំងអស់នេះ នឹងធ្វើឲ្យការប្រកួតនីមួយៗ មានភាពរន្ថើន និងជក់ចិត្តខ្លាំងសម្រាប់អ្នកគាំទ្រ។

ដោយឡែកមុនឈានដល់ការប្រកួត Super Sunday ក៏នឹងមានការប្រកួត ២គូមិនគួរមើលរំលងរវាងក្រុមកំពុងឡើងជើង នាថ្ងៃទី៧ ខែវិច្ឆិកាផងដែរ រួមមានក្រុមគិរីវង់សុខសែនជ័យ ជួបក្រុមភ្ញៀវ អឹមអូអាយ កំពង់ដេវ៉ា នៅកីឡដ្ឋានគិរីវង់ និងក្រុម អាយអេសអាយ ដង្កោសែនជ័យ ជួបក្រុម ឡាយហ្វខេត្តព្រះសីហនុ នៅកីឡដ្ឋានស្មាត។

គួរដឹងថា ឆ្លងកាត់ការប្រកួត ៦សប្ដាហ៍កន្លងមក វិសាខា កំពុងឈរកំពូលតារាងមាន ១៦ពិន្ទុ តាមពីក្រោយដោយណាហ្គាវើលដ៏ ឈរលេខ២ មាន ១៤ពិន្ទុ, ព្រះខ័នរាជស្វាយរៀង ឈរលេខ៣ មាន ១១ពិន្ទុ, អង្គរថាយហ្គឺរ ឈរលេខ៤ មាន ៨ពិន្ទុ, អឹមអូអាយ កំពង់ដេវ៉ា ឈរលេខ៥ មាន ៧ពិន្ទុ ស្មើក្រុម ឡាយហ្វខេត្តព្រះសីហនុ ដែលឈរលេខ៦ គ្រាដែលភ្នំពេញក្រោន ឈរលេខ៧ មាន ៦ពិន្ទុ, អាយអេសអាយ ដង្កោសែនជ័យ ឈរលេខ៨ មាន ៥ពិន្ទុ, បឹងកេត ឈរលេខ៩ មាន ៤ពិន្ទុ ស្មើក្រុមលេខ១០ គិរីវង់សុខសែនជ័យ និងក្រុមកងយោធពលខេមរភូមិន្ទ ឈរបាតតារាងមិនទាន់មានពិន្ទុរាប់ឡើយ៕ អត្ថបទ លី ឈុនឡា