អេឡិចត្រូនិក៖ សហព័ន្ធកីឡាអេឡិចត្រូនិកកម្ពុជា និងសហព័ន្ធកីឡាអេឡិចត្រូនិកវៀតណាមបានធ្វើការចុះអនុស្សារណយោគយល់គ្នា ដើម្បីពង្រឹងកិច្ចសហការលើគម្រោងអភិវឌ្ឍន៍ ២ចំណុចសំខាន់ៗក្នុងដំណើរឆ្ពោះទៅស៊ីហ្គេមលើកទី៣២ ឆ្នាំ២០២៣ នៅកម្ពុជា។
ការចុះអនុស្សារណយោគយល់គ្នានេះធ្វើឡើងនៅទីក្រុងហាណូយ មុនពិធីបិទការប្រកួតកីឡាស៊ីហ្គេមលើកទី៣១ ដោយលោក លន់ សាមឌី អគ្គលេខាធិការសហព័ន្ធកីឡាអេឡិចត្រូនិកកម្ពុជា និងប្រធានសហព័ន្ធកីឡាអេឡិចត្រូនិកវៀតណាម ហើយក៏មានការចូលរួមធ្វើជាសាក្សីពីឯកឧត្តម វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា និងអគ្គលេខាធិការគណៈកម្មាធិការជាតិអូឡាំពិកវៀតណាមផងដែរ។ ឯកឧត្តម វ៉ាត់ ចំរើន មានប្រសាសន៍ថា កិច្ចសហប្រតិបត្តិការនេះ ទី១-ផ្ដោតលើការសន្យារបស់ភាគីវៀតណាមក្នុងការជួយផ្នែកបច្ចេកទេស និងសម្ភារៈ សម្រាប់ត្រៀមរៀបចំក្នុងការប្រកួតកីឡាស៊ីហ្គេមនៅកម្ពុជា និងទី២-ផ្ដោតលើការបណ្ដុះបណ្ដាល និងអភិវឌ្ឍន៍កីឡាករ-កីឡាការិនីតាមរយៈការហ្វឹកហាត់ និងប្រកួតដកស្រង់បច្ចេកទេសគ្នាទៅវិញទៅមក សម្រាប់ត្រៀមព្រឹត្តិការណ៍ជាប្រវត្តិសាស្ដ្រនៅកម្ពុជានាឆ្នាំក្រោយ។
សូមបញ្ជាក់ថា កីឡាអេឡិចត្រូនិកគឺជាចំណុចចាប់ផ្ដើមដែលគណៈកម្មាធិការជាតិ CAMSOC បានជំរុញជាមួយបណ្ដាសហព័ន្ធកីឡាជាតិផ្សេងៗ ក្នុងការធ្វើកិច្ចសហប្រតិបត្តិការអន្ដរជាតិជាមួយបណ្ដាប្រទេសក្នុងតំបន់ ដើម្បីពង្រឹងការអភិវឌ្ឍ ទាំងធនធានបច្ចេកទេស និងធនធានមនុស្សឆ្ពោះទៅរកគុណភាពខ្ពស់ សម្រាប់ត្រៀមធ្វើម្ចាស់ផ្ទះស៊ីហ្គេមឆ្នាំ២០២៣ ស្របទៅនឹងយុទ្ធសាស្ដ្រចំណាយតិច តែធ្វើឲ្យព្រឹត្តិការណ៍ស៊ីហ្គេមនៅកម្ពុជាក្លាយជាព្រឹត្តិការណ៍ដ៏អស្ចារ្យ៕
អត្ថបទ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
