រាជធានីភ្នំពេញ ៖ ព្រឹកថ្ងៃទី០៧ ខែវិច្ឆិកា ឆ្នាំ២០២៦ នាសាលាសង្កាត់ផ្សារដើមថ្កូវ នៃ​រដ្ឋបាល​ខណ្ឌ​ចំការ​មន ក្រុមការងារគណៈកម្មាការរៀបចំការបោះឆ្នោតថ្នាក់សង្កាត់ បានបន្តការ​យក​ចិត្ត​ទុក​ដាក់​ជា​មួយ​ការ​បំពេញនីតិវិធី ជូនដល់បងប្អូនប្រជាពលរដ្ឋដែលគ្រប់អាយុចុះឈ្មោះក្តី ក៏ដូ​ច​ជា​ពលរដ្ឋ​ដែលមានឈ្មោះក្នុងបញ្ជីឈ្មោះបោះឆ្នោត ហើយត្រូវធ្វើបច្ចុប្បន្នភាពឡើងវិញជាដើម ។

ពលរដ្ឋ បង្ហាញស្មារតីត្រៀមខ្លួនជាស្រេចសម្រាប់ការបោះឆ្នោតនៅឆ្នាំ២០២៧ និង​២០២៨​ខាង​មុខ​ ទើបពួកគាត់រុះរាន់ទៅធ្វើបច្ចុប្បន្នភាពបញ្ជីឈ្មោះឲ្យបានរួចរាល់ ដោយមិ​ន​បង្អង់​ពេល​វេលា​នោះ​ឡើយ ​ខណៈដំណើរការចុះឈ្មោះ និងធ្វើបច្ចុប្បន្នភាពបញ្ជីឈ្មោះ នៅមានរយៈ​ពេល​តែ​ជិត​១​ខែ​ទៀត​ប៉ុណ្ណោះ។

ក្នុងនាមជាម្ចាស់សំឡេងឆ្នោតមួយរូប ពលរដ្ឋចាត់ទុកការបោះឆ្នោតគឺជារឿងសំខាន់ណាស់ ដែល​ពួក​គាត់​ គឺជាអ្នកជ្រើសរើសជោគវាសនា នៃអ្នកដឹកនាំថ្នាក់មូលដ្ឋាន និងប្រទេសជាតិ ក្នុង​ការ​ដឹក​នាំ​មាគ៌ា​ជាតិ​ខ្ពស់ទៅរកការអភិវឌ្ឍន៍ ក្រោមម្លប់ នៃសុខសន្តិភាពពេញលេញ។

លោកស្រីតែម សុធី ចៅសង្កាត់រងទី១ តំណាងលោកហែម សុផាត ចៅសង្កាត់ផ្សារដើមថ្កូវ បាន​ឲ្យ​ដឹង​ថា បច្ចុប្បន្ននេះ ចំនួនពលរដ្ឋដែលត្រូវធ្វើជីវមាត្រក្នុងមូលដ្ឋាន ភាគច្រើន គឺពួកគាត់ពុំទាន់អញ្ជើញមកធ្វើបច្ចុប្បន្នភាពនៅឡើយនោះទេ ដូច្នោះហើយ ក្នុងនាម​រដ្ឋបា​​ល​សង្កាត់​ តែងតែដាក់ចេញយន្តការជាច្រើន ដើម្បីបន្តជម្រុញពលរដ្ឋទាំងអស់ ឲ្យរុះរាន់​ទៅ​ធ្វើ​ជីវមាត្រ​ឲ្យ​បាន​ទាន់​ពេលវេលា មុនផុតកាលកំណត់ ។

យន្តការជំរុញ​សំខាន់ៗ ដែលរដ្ឋបាលសង្កាត់ដាក់ចេញរួមមាន៖ បានយកខិតបណ្ណអញ្ជើញរបស់ គ.ជ.ប ទៅដល់គ្រប់ពលរដ្ឋដែលមានឈ្មោះត្រូវធ្វើជីវមាត្រឡើងវិញ , បានផ្សព្វផ្សាយ​តាម​រយៈ​ការ​ចាក់​មេក្រូ ​បំពងសំឡេង​ជាឃោសនស័ព្ទ , ផ្សព្វផ្សាយជាទូលាយ​នៅ​លើ​បណ្តាញ​ទំនាក់​ទំនង​សង្គម​​លើផេកផ្លូវការរបស់រដ្ឋបាលសង្កាត់ ពិសេសបន្តជំរុ​ញ​ជាប្រចាំទៅដល់ប្រធានភូមិ ប្រធាន​ក្រុម ​ត្រូវចុះទៅជំរឿងជារឿយៗបំផុត ចំពោះពលរដ្ឋដែលទទួលបានលិខិតអញ្ជើញ​ហើយ ពុំ​ទាន់​អញ្ជើញ​ទៅធ្វើជីវមាត្រនៅឡើយនោះ។

លោកស្រីបញ្ជាក់ជូនថា ការធ្វើជីវមាត្រ គឺសំដៅលើការថតរូបថ្មី និងស្គេនក្រយ៉ៅដៃថ្មីឡើងវិញ សម្រាប់​ពលរដ្ឋទាំងឡាយណាដែលបានចុះឈ្មោះបោះឆ្នោតរួចរាល់កាលពីឆ្នាំ២០១៦ និង​២០១៧​ ដែលមានរយៈពេល១០ឆ្នាំកន្លងទៅហើយ ដូច្នោះមុខមាត់ និងក្រយ៉ៅដៃ អាច​មាន​ការ​ប្រែ​ប្រួល​ទើបតម្រូវឲ្យមានការធ្វើបច្ចុប្បន្នភាពឡើងវិញនោះ ។

គួរជម្រាបថា ដំណើរការ នៃការចុះឈ្មោះ និងការធ្វើបច្ចុប្បន្ន​ភាព​បញ្ជី​ឈ្មោះ​បោះ​ឆ្នោត​សម្រាប់​ឆ្នាំ​២០២៦​ បានចាប់ផ្តើមពីថ្ងៃទី០៧ តុលា នឹងបញ្ចប់នៅថ្ងៃទី៣០ ខែវិច្ឆិកា ឆ្នាំ២០២៦ ដែល​មាន​រយៈ​ពេល​ត្រឹម​តែ៥៥ថ្ងៃប៉ុណ្ណោះ៕ លីហេង