កម្ពុជា-អាល្លឺម៉ង់ពិនិត្យវឌ្ឍនភាព និងបញ្ហាប្រឈមក្នុងការអនុវត្តគម្រោង និង​កម្ម​វិធី​ដែល​ទទួល​បាន​ហិរញ្ញប្បទានពីរដ្ឋាភិបាល អាល្លឺម៉ង់ និងពិភាក្សាអំពីទិសដៅយុទ្ធសាស្ត្រ និង​អាទិភាព​នៃ​កិច្ច​សហ​ប្រតិបត្តិការអភិវឌ្ឍន៍ ស្របតាមអាទិភាពអភិវឌ្ឍន៍របស់កម្ពុជា និងគោល​នយោបាយ​អាល្លឺម៉ង់​។

ឯកឧត្តម ឈៀង យ៉ាណារ៉ា ទេសរដ្ឋមន្ត្រីទទួលបន្ទុកបេសកកម្មពិសេស អនុប្រធានទី ២ នៃ​ក្រុម​ប្រឹក្សា​អភិវឌ្ឍន៍​កម្ពុជា មាន ការចូលរួមពីតំណាងក្រសួង-ស្ថាប័នរបស់រាជរដ្ឋាភិបាលចំនួន ១៩ និង​ភាគី​អាល្លឺម៉ង់ដឹកនាំដោយលោកស្រី Michaela Henning អនុ​ប្រធាន​ទទួលបន្ទុក​កិច្ចការ​តំបន់​​ចិន​អាស៊ី​កណ្តាល អាស៊ី​បូព៌ា ឡាវ និងកម្ពុជា នៃ​ក្រសួង​សហប្រតិបត្តិការ​សេដ្ឋកិច្ច និង​អភិវឌ្ឍន៍​​អាល្លឺម៉ង់ (BMZ) និងលោកជំទាវ Silke Röfer ឯកអគ្គរដ្ឋទូត​សាធារ​ណ​រដ្ឋ​សហព័ន្ធ​អាល្លឺម៉ង់​ ប្រចាំព្រះរាជាណាចក្រកម្ពុជា ព្រមទាំងមានការចូលរួមពីតំណាងទីភា្នក់ងារអាល្លឺម៉ង់ សម្រាប់​កិច្ចសហប្រតិបត្តិការអន្តរជាតិប្រចាំកម្ពុជា (GIZ), តំណាងធនាគារ អភិវឌ្ឍន៍អាល្លឺម៉ង់ (KFW)​, និងមន្រ្តីជាន់ខ្ពស់នៃស្ថានទូតអាល្លឺម៉ង់ ។

 កិច្ចពិគ្រោះយោបល់នេះមានគោលបំណង ដើម្បីពិនិត្យវឌ្ឍនភាព និង​បញ្ហា​ប្រឈម​នៅ​ក្នុង​ការ​អនុវត្ត​គម្រោង និងកម្មវិធីដែល ទទួលបានហិរញ្ញប្បទានពីរដ្ឋាភិបាលអាល្លឺម៉ង់ និងពិ​ភាក្សា​អំពី​ទិស​ដៅ​យុទ្ធសាស្ត្រ និងអាទិភាពនៃកិច្ចសហប្រតិបត្តិការអភិវឌ្ឍន៍ នាពេលអនាគត ស្រប​តាម​អាទិភាព​អភិវឌ្ឍន៍របស់កម្ពុជា និងគោលនយោបាយសហប្រតិបត្តិការអភិវឌ្ឍន៍របស់អាល្លឺម៉ង់។

 ក្នុងកិច្ចពិគ្រោះយោបល់ ភាគីអាល្លឺម៉ង់បានធ្វើបទបង្ហាញអំពីទិសដៅយុទ្ធសាស្ត្រថ្មី នៃកិច្ច​សហ​ប្រតិបត្តិការអភិវឌ្ឍន៍របស់ អាល្លឺម៉ង់ ក្រោម​ការ​កំណែទ​ម្រង់​យុទ្ធ​សាស្ត្រ​របស់​ក្រសួង​សហ​ប្រតិបត្តិការសេដ្ឋកិច្ច និងអភិវឌ្ឍន៍អាល្លឺម៉ង់ (BMZ) ដោយបាន គូសបញ្ជាក់​ពី​ការ​ផ្តោត​លើ​វិស័យ​អាទិភាពសំខាន់ៗចំនួន៣រួមមាន៖១) ការអភិវឌ្ឍសេដ្ឋកិច្ចប្រកបដោយចីរភាព, ២) សុខាភិបាល និងកិច្ចគាំពារសង្គម, និង៣) អាកាសធាតុ និងថាម​ពល​រួម​ទាំង​អន្ត​រ​កាល​ប្រកបដោយយុត្តិធម៌។ ជាមួយគ្នានេះភាគីទាំងពីរបានផ្លាស់ ប្តូរទស្សនៈ និងពិភាក្សាអំពីចំណុចដែលមានផលប្រយោជន៍រួម ដើម្បីតម្រង់ទិសកិច្ចសហប្រតិបត្តិការឱ្យកាន់តែឆ្លើយតបទៅ នឹងតម្រូវ ការ និងអាទិភាពរបស់កម្ពុជា។

ជាលទ្ធផល, ភាគីទាំងពីរបានឯកភាពលើកំណត់ហេតុសង្ខេបនៃកិច្ចពិគ្រោះយោបល់ (Summary Record) ដើម្បីកត់ត្រា ចំណុចសំខាន់ៗនៃការពិភាក្សា និងសម្រាប់ជាមូលដ្ឋានក្នុងការសម្របសម្រួល និងអនុវត្តការងារបន្តព្រមទាំងជាធាតុចូល សម្រាប់ការ រៀបចំកិច្ចចរចារវាងរាជរដ្ឋាភិបាលកម្ពុជា-អាល្លឺម៉ង់នៅឆ្នាំ២០២៧ ដែលគ្រោងនឹងប្រព្រឹត្តទៅនៅទីក្រុងប៊ែរឡាំង ប្រទេសអាល្លឺម៉ង់។

ឯកឧត្តមឈៀង យ៉ាណារ៉ា បានថ្លែងអំណរគុណយ៉ាងជ្រាលជ្រៅចំពោះរដ្ឋាភិបាល និងប្រជាជនអាល្លឺម៉ង់ ដែលបានបន្តផ្តល់ ការគាំទ្រ និងរួមចំណែកយ៉ាងសំខាន់ដល់ការអភិវឌ្ឍរបស់កម្ពុជា។ ឯកឧត្តមទេសរដ្ឋមន្ត្រី បានគូសបញ្ជាក់ពីសារៈសំខាន់នៃការបន្ត ពង្រឹងភាពជាដៃគូ និងកិច្ចសហប្រតិបត្តិការរវាងប្រទេសទាំងពីរ តាមរយៈការសម្របសម្រួល និងសហការយ៉ាងជិតស្និទ្ធ ព្រមទាំងការ ពង្រឹងប្រសិទ្ធភាពនៃការអនុវត្តគម្រោង ដើម្បីធានាថាកិច្ចសហប្រតិបត្តិការអភិវឌ្ឍន៍នាពេលអនាគតនឹងបន្តឆ្លើយតបទៅនឹងអាទិភាព និងតម្រូវការអភិវឌ្ឍន៍របស់កម្ពុជា៕ អត្ថបទ៖ សុន រ៉ាឌី