ប្រជាពលរដ្ឋចំនួន ១៧ ភូមិ ស្ថិតនៅក្នុងឃុំសារង្គ និង ឃុំថ្នាំ ស្រុកភ្នំស្វាយចេក ខេត្ត​បន្ទាយ​មាន​ជ័យ​ ទទួលបានវិញ្ញាបនបត្រសម្គាល់ម្ចាស់អចលនវត្ថុលើការចុះបញ្ជីដីធ្លីមានលក្ខណៈជាប្រព័ន្ធ ក្រោយ​បញ្ចប់ការវាស់វែង និងបិទផ្សាយដោយដុំជាសាធារណៈក្រោមវត្តមានឯកឧត្តម អ៊ុំ រាត្រី អភិបាល​ខេត្ត នៃគណៈអភិបាលខេត្តបន្ទាយមានជ័យ ក្នុងពិធីចែក​វិញ្ញាបន​បត្រ​សម្គាល់​ម្ចាស់​អចលន​វត្ថុ​លើកា​រចុះបញ្ជីដីធ្លីមានលក្ខណៈជាប្រព័ន្ធ ជូនពលរដ្ឋទាំង១៧ ភូមិ ស្មើនឹង២១ ៧៤៩ បណ្ណ ប្រារព្ធធ្វើនៅបរិវេណវត្តប្រាសាទភាសត្បូង នារសៀលថ្ងៃទី០៦ ខែវិច្ឆិកា ឆ្នាំ២០២៦។

នាឱកាសនោះ ឯកឧត្តម អ៊ុំ រាត្រី ក៏បានលើកឡើងថា ការធ្វើកំណែទម្រង់ដីធ្លី និង​នគរូបនីយ​កម្ម​ឱ្យកាន់តែ ស៊ីជម្រៅ ជាមួយ នឹងការបង្កើតឱ្យមាននូវគោលនយោបាយដីធ្លី៣ចំណុច រួមមាន ៖ ១-ការចុះបញ្ជីដីធ្លីមានលក្ខណៈជាប្រព័ន្ធ,២-ការដោះស្រាយវិវាទដីធ្លីក្រៅប្រព័ន្ធតុលាការ និង៣-ការផ្តល់សេវារដ្ឋបាលដីធ្លីជូនប្រជាពលរដ្ឋប្រកបដោយតម្លាភាព និងប្រសិទ្ធភាពខ្ពស់ គឺសំដៅ​លើក​កម្ពស់​កម្រិតជីវភាពរស់នៅរបស់ប្រជាពលរដ្ឋ។   

ឯកឧត្តមបញ្ជាក់ថា ការងារចុះបញ្ជីដីធ្លី គឺដើម្បីបន្តផ្តល់ប័ណ្ណកម្មសិទ្ធិជូនប្រជាជនឱ្យបានលឿន ដើម្បី​ជាមូ​លដ្ឋានប្រភពសេដ្ឋកិច្ច និងសុវត្ថិភាព នៃការកាន់កាប់ដីធ្លី។

ឯកឧត្តម អភិបាលខេត្ត បន្តថា ការចុះបញ្ជីដីធ្លី និងការចេញប័ណ្ណកម្មសិទ្ធិ មាននីតិវិធីពីរ គឺការ​ចុះ​បញ្ជី​តាមការស្នើសុំរបស់ម្ចាស់ដី ដែលគេឱ្យឈ្មោះថា ការចុះបញ្ជីដាច់ដោយដុំ និងការ​ចុះ​បញ្ជី​មួយ​ឃុំ​ម្តង​ៗ តាមការកំណត់របស់រាជរដ្ឋាភិបាល ដែលគេហៅថា ការចុះបញ្ជី​មាន​លក្ខណៈ​ជា​ប្រព័ន្ធ​។

ឯកឧត្តម ក៏បានធ្វើការណែនាំដល់បងប្អូនប្រជាពលរដ្ឋដែលជាម្ចាស់កម្មសិទ្ធិដីធ្លី ដែលត្រូវ​ទទួល​បណ្ណ​សូម​ប្រើប្រាស់បណ្ណកម្មសិទ្ធិដីធ្លី ឱ្យបានត្រឹមត្រូវ នឹងត្រូវទុកដាក់ឱ្យល្អ ចៀសវាង​ការ​ខូច​ខាត​ឬ​បាត់​ដោយ​ប្រការណាមួយ។ ព្រមទាំង បានណែនាំឃុំនិងភូមិ ធ្វើការផ្សព្វផ្សាយ​ដល់​ប្រជា​ពលរដ្ឋ​ដែល​ជាម្ចាស់កម្មសិទ្ធិដី ដើម្បីឱ្យពួកគាត់មកទទួលប័ណ្ណកម្មសិទ្ធិដីធ្លី នៅលើ​ទី​តាំង​ដែល​ក្រុម​ការ​ងារផ្ទះបានរៀបចំឱ្យផ្តល់ជូន ឱ្យទាន់ពេលវេលាកំណត់។

សូមបញ្ជាក់ថា ការចែកវិញ្ញាបនបត្រសម្គាល់ម្ចាស់អចលនវត្ថុ មានរយៈពេល ០៧ថ្ងៃ ចាប់ពីថ្ងៃទី៦ ដល់​ថ្ងៃ​ទី១២ ខែវិច្ឆិកា ឆ្នាំ២០២៦ ផុតរយៈពេលកំណត់មន្រ្តីជំនាញមន្ទីរ នឹងបន្ត​ចែក​បណ្ណ​ជូន​បង​ប្អូន​ប្រជាពលរដ្ឋ នៅមន្ទីររៀបចំដែនដី នគរូបនីយកម្ម សំណង់ និងសុរិយោដី ខេត្ត​បន្ទាយ​មាន​ជ័យ ​រៀងរាល់ម៉ោងធ្វើការ ដោយមិនកំណត់រយៈពេល៕ អត្ថបទ៖ ឃិនសារិទ្ធ