ស្របតាមនិយាមនីតិវិធីប្រតិបត្តិ នាព្រឹកថ្ងៃទី០៩ ខែវិច្ឆិកា ឆ្នាំ២០២៦នេះ ឯកឧត្តម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ និងជាប្រធាន​គណៈកម្មការ​រៀប​ចំ​ការ​ប្រឡង​ប្រជែង បានអញ្ជើញផ្ទាល់ក្នុងការពិនិត្យ និងបើកបន្ទប់សុវត្ថិភាព (Seal) នៅសាលា​ភូមិន្ទរដ្ឋបាល ដើម្បីចាប់ផ្តើមដំណើរការកំណែសន្លឹកកិច្ចការរបស់បេក្ខជនទាំងអស់ ដែល​បាន​ចូល​រួម​ក្នុងការប្រឡងប្រជែងជ្រើសរើសមន្រ្តីផ្អែកលើកិច្ចព្រមព្រៀងការងារ ឱ្យចូល​បម្រើ​ការ​ងារ​នៅ​អង្គ​ភាព​សម្របសម្រួលសហគ្រាសធុនតូចនិងមធ្យម (អ.ស.ត.ម.) កាល​ពី​រ​សៀល​ថ្ងៃ​ម្សិលមិញ​។

 ការធ្វើកំណែធ្វើឡើងរយៈ​ពេលមួយថ្ងៃប៉ុណ្ណោះ ដោយការ​ប្រកាស​លទ្ធផល​គ្រោង​ប្រព្រឹត្តិ​ទៅ​នៅ​ល្ងាច​ថ្ងៃទី៩វិច្ឆិកានេះតែម្ដង។ បេក្ខជនដែលប្រឡងជាប់ដំណាក់កាលសរសេរ និង​ត្រូវ​ឆ្លង​កាត់​ដំណាក់​កាល​វិញ្ញាសា​ផ្ទាល់មាត់ជាដំណាក់កាលចុងក្រោយ។ ការប្រឡងនេះ ជ្រើសរើស​មន្ត្រី​ចំនួន ​៤១នាក់ ខណៈ​បេក្ខជនចូលរួមប្រកួតប្រជែងសរុប ១០១៥នាក់។