តំណែងក្លិបមិនទាន់ស្គាល់ពាក្យចាញ់ក្នុងលីគកំពូលកម្ពុជា ឆ្នាំ២០២៦/២៧ សល់តែ ១​ក្លិប​ប៉ុណ្ណោះ គឺក្លិបព្រះខ័នរាជស្វាយរៀង ក្រោយវាយបកឈ្នះណាហ្គាវើលដ៏ ស្រប​ពេល​អង្គរ​ថាយ​ហ្គឺរ ​បាន​បញ្ចប់កំណត់ត្រាមិនដែលចាញ់របស់វិសាខា ដោយលទ្ធផល ៣-១ ដូចគ្នា គ្រា​ដែល​ក្រុម​បឹងកេត បានរំកិលឡើងជិតតំបន់ ៦ក្រុមកំពូលតារាង ឬ Top-6 ក្រោយ​យក​ឈ្នះ​ក្រុម​ម្ចាស់​ផ្ទះ​ភ្នំពេញ​ក្រោន ២-១។

សម្រាប់ជំនួបដ៏ជក់ចិត្តនៅកីឡដ្ឋានស្វាយរៀង ណាហ្គាវើលដ៏ បាននាំមុខ ១គ្រាប់​មុន​លើ​ក្រុម​ម្ចាស់​ផ្ទះ ដែលរកបានដោយកីឡាករ Bernardo នៅនាទីទី១០ ប៉ុន្ដែចូលវគ្គទី២ ព្រះខ័នរាជ​ស្វាយ​រៀង​ បានវាយបក ៣គ្រាប់វិញជាបន្ដបន្ទាប់ ដោយកីឡាករ Peprah Kwame នៅនាទី៤៩ និង​នាទី​៥៦ និងមិត្តរួមក្រុម Tiago Alves នៅនាទី៦១។ ជ័យជម្នះនេះ បានជួយ​ឲ្យ​ក្រុម​ការពារ​ជើង​ឯក​ព្រះខ័នរាជស្វាយរៀង រក្សានាមក្លិបមិនទាន់ស្គាល់ចាញ់តែមួយគត់ ស្រប​ពេល​ណាហ្គា​វើលដ៏ ទើបរងបរាជ័យលើកដំបូង។

ចំណែក​ជំនួបដ៏ក្ដៅគគុកនៅកីឡដ្ឋានអាគីហ៊ីរ៉ូកាតុ ក្លិបអង្គរថាយហ្គឺរ បានបញ្ចប់កំណត់​ត្រាមិន​ស្គាល់​ចាញ់​របស់​ក្រុមកំពូលតារាងវិសាខា ជាមួយដ៏លទ្ធផលដ៏ភ្ញាក់ផ្អើល ៣-១។ ការប្រកួតនេះ ក្រុម​ទាំងពីរ បានបើកការវាយសម្រុកគ្នាទៅវិញទៅតាំងពីដើមវគ្គទី១ ហើយកីឡាករ Mikahael Da motta Akatsuka បានរកគ្រាប់នាំមុខឲ្យក្រុមម្ចាស់ផ្ទះ នៅនាទី២៦ មុនកីឡាករ Pa Ousman Gai វាយបកគ្រាប់តាមស្មើឲ្យវិសាខា នៅនាទី៣៥ ហើយក៏​ជា​ពេល​វេលា​ខ្សែ​បម្រើ​ប្រយុទ្ធ​សញ្ជាតិ​ហ្គាំប៊ី ទទួលបានការពិន័យកាតក្រហម បន្ទាប់ពីការអបអរគ្រាប់​បាល់​ដោយការ​សើយ​អាវ ដើម្បីបង្ហាញការគោរព និងឧទ្ទិសដល់បងប្អូនរបស់ខ្លួន។

ដល់គ្នាត្រឹម ១០នាក់ទ ស្របពេលក្រុមខ្លាទឹកក្រូច កំពុងធ្វើបានល្អ ពួកគេមិន​បាន​បន្ថយ​កម្ដៅ​ដាក់​សម្ពាធ​ឡើយ ហើយ ៣នាទីក្រោយអវត្តមាន Pa Ousman Gai អង្គរថាយហ្គឺរ ក៏រក​បាន​គ្រាប់​បាល់​នាំ​មុខជាថ្មី ដោយកីឡាករ Mensah Stephan Jerome នៅនាទី៤៣ មុនកីឡាករ Aguek Manyluak បន្ថែមគ្រាប់ទី៣ នៅនាទី៨៥ គ្រាដែលចុងម៉ោង វិសាខា សល់គ្នាត្រឹម ៩នាក់ ក្រោយកីឡាករ Lucas Tancler Ambiel រងពិន័យកាតលឿងលើកទី២ ស្មើនឹងកាតក្រហម នៅ​នា​ទី​៨៨ មុនអាជ្ញាកណ្ដាលផ្លុំកញ្ចែបញ្ចប់ការប្រកួតផ្លូវការ។

ដោយឡែកក្រុមបឹងកេត ដែលជាក្រុមពិបាករកពិន្ទុនៅដើមរដូវកាល បាន​យក​ឈ្នះ​ក្រុម​ម្ចាស់​ផ្ទះ​ភ្នំពេញ​ក្រោន ដោយលទ្ធផល ២-១។ ការប្រកួតដ៏តានតឹងនេះ បឹងកេត រកបាន ២គ្រាប់មុន​ដោយ​កីឡាករ យ៉ើ ម៉ូស្លីម នៅនាទីទី៥ និង Bevan Myer Stefan Major នៅនាទី២៤ មុន​ភ្នំពេញ​ក្រោន​ វាយបកបាន ១គ្រាប់វិញ ដោយកីឡាករ Feher Raul Mihai នៅនាទី៥៧ ហើយ​លទ្ធ​ផល​នេះ ក៏បានរក្សាដល់ចប់ការប្រកួតពេញម៉ោង។ ជ័យជម្នះនេះ បានធ្វើឲ្យបឹងកេត រំកិល​ពី​លេខ​៩ ឡើងទៅឈរលេខ៧ បណ្ដោះអាសន្ន ដោយមាន ៧ពិន្ទុ កៀកនឹងក្រុមលេខ៦ ឡាយហ្វ​ខេត្ត​ព្រះសីហនុ ដែលមាន ៨ពិន្ទុ។

ចំណែកលទ្ធផលការប្រកួត ២គូផ្សេងទៀត ក្នុងសប្ដាហ៍ទី៧ គឺក្រុមម្ចាស់ផ្ទះ អាយអេសអាយ ដង្កោ​សែនជ័យ បានវាយបកស្មើក្រុមឡាយហ្វខេត្តព្រះសីហនុ ២-២ បន្ទាប់ពីត្រូវក្រុមភ្ញៀវនាំមុខ ២​គ្រាប់មុន នៅវគ្គទី១ ស្របពេលក្រុម អឹមអូអាយ កំពង់ដេវ៉ា បន្ដភាពខ្លាំង ក្រោយ​យក​ឈ្នះ​ក្រុម​ម្ចាស់​ផ្ទះគិ​រីវង់សុខសែនជ័យ ២-១។

ឆ្លងកាត់ការ​ប្រកួតសន្សំពិន្ទុ ៧សប្ដាហ៍កន្លងមក ទោះបីវិសាខា រងបរាជ័យលើកដំបូង តែ​ពួក​គេ​បាន​រក្សា​កៅអីកំពូលតារាង ដោយមាន ១៦ពិន្ទុ ជាមួយលទ្ធផល ៧ប្រកួតឈ្នះ៥ ស្មើ១ និង​ចាញ់​១ ​តាមពីក្រោយដោយព្រះខ័នរាជស្វាយរៀង មាន ១៤ពិន្ទុ ជាមួយលទ្ធផល ៦ប្រកួតឈ្នះ៤ និង​ស្មើ​២ និងណាហ្គាវើលដ៏ ឈរលេខ៣ មាន ១៤ពិន្ទុ ឆ្លងកាត់ ៧ប្រកួតឈ្នះ៤ ស្មើ២ និងចាញ់១ ។ រីឯអង្គរថាយហ្គឺរ បានបន្ដឈរលេខ៤ មាន ១១ពិន្ទុ, អឹមអូអាយ កំពង់ដេវ៉ា ឈរលេខ៥ មាន ១០​ពិន្ទុ​, ឡាយហ្វខេត្តព្រះសីហនុ ឈរលេខ៦ មាន ៨ពិន្ទុ, បឹងកេត ឈរលេខ៧ មាន ៧ពិន្ទុ, អាយអេសអាយ ដង្កោសែនជ័យ ឈរលេខ៨ មាន ៦ពិន្ទុ ស្មើក្រុមភ្នំពេញក្រោន ដែលឈរលេខ៩ លើក្រុមគិរីវង់សុខសែនជ័យ ឈរលេខ១០ មាន ៤ពិន្ទុ៕ អត្ថបទ លី ឈុនឡា