រ៉ូបូតមួយគ្រឿង បានចូលរួមជាមួយអ្នករត់ប្រណាំងក្នុងការប្រកួតម៉ារ៉ាតុងក្រោមអាកាសធាតុត្រជាក់ខ្លាំង នៅតំបន់អង់តាក់ទិក កាលពីចុងសប្តាហ៍កន្លងទៅ។

រ៉ូបូតដែលមានឈ្មោះថា Qestr គឺជាអ្នកចូលរួមម្នាក់ក្នុងចំណោមអ្នកប្រកួតសរុប ២៥ នាក់ នៅក្នុងព្រឹត្តិការណ៍ Antarctic Ice Ultra ដែលរៀបចំឡើងនៅជំរំ Ultima Camp។

លោក Oliver Wang អ្នករៀបចំកម្មវិធី បានឱ្យដឹងថា Qestr គឺជាមនុស្សយន្តមានរូបរាងដូចមនុស្សដំបូងគេ ដែលបានចូលរួមក្នុងការប្រកួតរត់ចម្ងាយឆ្ងាយបែបប្រកួតប្រជែង នៅក្នុងតំបន់ធម្មជាតិដ៏សែនលំបាករបស់អង់តាក់ទិក។

ដោយសារតំបន់អង់តាក់ទិកកំពុងស្ថិតក្នុងបាតុភូតព្រះអាទិត្យរះពេញមួយថ្ងៃ និងពេញមួយយប់ ការប្រកួតនេះបានចាប់ផ្ដើមនៅវេលាម៉ោង ១ រំលងអធ្រាត្រ ខណៈអ្នកចូលរួមត្រូវប្រឈមនឹងសីតុណ្ហភាពត្រជាក់ដល់ដក ២៤ អង្សាសេ។

មនុស្សយន្ត Qestr បានពាក់អាវដើម្បីទប់ទល់នឹងអាកាសធាតុដ៏ត្រជាក់ ហើយអាចបោះជំហានរត់បានក្នុងស្ថានភាពដ៏លំបាកនេះ។ ប៉ុន្តែជាអកុសល ថាមពលថ្មរបស់វាបានអស់ បន្ទាប់ពីរត់បានចម្ងាយត្រឹមតែ ៣ គីឡូម៉ែត្រប៉ុណ្ណោះ ដែលធ្វើឱ្យវាត្រូវបញ្ឈប់ការប្រកួតមុនកំណត់។

ចំណែកអ្នករត់ប្រណាំងផ្សេងទៀត បានបន្តការប្រកួតដោយពឹងផ្អែកលើអាហារក្ដៅ និងអាហារសម្រន់ ដើម្បីបំពេញថាមពល ខណៈចម្ងាយប្រកួតមានច្រើនប្រភេទ រួមមាន ៥០ គីឡូម៉ែត្រ, ៨០ គីឡូម៉ែត្រ, ១០០ គីឡូម៉ែត្រ និង ១៦០ គីឡូម៉ែត្រ។

ជាមួយគ្នានេះ អ្នករត់ប្រណាំងជនជាតិចិន Ni Yusheng បានបញ្ចប់ការរត់ចម្ងាយ ១៦០ គីឡូម៉ែត្រ ដោយប្រើពេល ១៧ ម៉ោង ២ នាទី និង ២៤ វិនាទី ព្រមទាំងបំបែកកំណត់ត្រាផ្ទាល់ខ្លួនរបស់គេផងដែរ៕អត្ថបទ៖នាង សុភាវុធ