​ស្នូកឃ័រ៖ ​ព្រឹត្តិការណ៍​ស្នូកឃ័រ​ជើងឯក Tour Championship បាន​រកឃើញ​កីឡាករ​ម្នាក់​ទៀតហើយ​ ឡើង​វគ្គ​ពាក់កណ្តាល​ផ្តាច់ព្រ័ត្រ​គឺ​កីឡាករ​អូស្ត្រាលី Neil Robertson បន្ទាប់ពី​យកឈ្នះ​កីឡាករ​អង់គ្លេស Jack Lisowski​។

​​Neil Robertson ដែល​ឈរ​ចំណាត់ថ្នាក់​លេខ​៣ ពិភពលោក​បានចាប់ផ្តើម​ដោយ​នាំមុខ ២-១​ហ្វ្រេ​ម​លើ​កីឡាករលេខ៦ ពិភពលោក Jack Lisowski​ មុន​ពេលដែល​កីឡាករ​អង់គ្លេស​រូបនេះ​តាម​ស្មើ​វិញ ២-២ហ្វ្រេ​ម​។ ​ក្រោយមក Neil Robertson អតីត​ជើងឯក​ពិភពលោក​ឆ្នាំ២០១០ ក៏​បាន​យកឈ្នះ ៤ហ្វ្រេ​ម​ផ្ទួនៗ​ដើម្បី​នាំមុខ ៦-២​។ ​ដំណាក់កាល​ទី២ Lisowski ​បាន​យកឈ្នះ ២ហ្វ្រេ​ម​វិញ​តាម​ពីក្រោយ ៦-៤ មុនពេល​ដែល Robertson យកឈ្នះ ៣ហ្វ្រេ​ម​វិញ​នាំមុខ ៩-៤​។​

​​Lisowski ​ក៏បាន​ព្យាយាម​ស្រោចស្រង់​ខ្លួន​មកវិញ​ដែរ ​ក្រោយ​ធ្វើបាន​មួយ​ឈើ ១២៩ពិន្ទុ​តាម​ពីក្រោយ ៩-៥​។ ​យ៉ាងណាក្តី Robertson បាន​យកឈ្នះ​នៅ​ហ្វ្រេ​ម​ទី១៥ ក្នុងចំណោម ១៩ហ្វ្រេ​ម​ដោយ​សរុប​លទ្ធផល ១០-៥ហ្វ្រេ​ម​ឡើង​វគ្គ​ពាក់កណ្តាល​ផ្តាច់ព្រ័ត្រ​។ ​សូមបញ្ជាក់ថា ការប្រកួត​ស្នូកឃ័រ Tour Championship ជាការ​ប្រកួត​ដែលមាន​កីឡាករ​ចូលរួម​តែ ៨នាក់​ប៉ុណ្ណោះ ដែលមាន​ចំណាត់ថ្នាក់​ពិភពលោក​កំពូល​ទាំង ៨នាក់​៕

​អត្ថបទ​៖​នាង សុភា​វុ​ធ