អ៊ុយក្រែន៖ ប្រធានាធិបតីអ៊ុយក្រែនលោក Volodymyr Zelenskyy បាននិយាយកាលពីថ្ងៃចន្ទថា ប្រទេសរុស្ស៊ីបានបាញ់មីស៊ីលជិត ១.៥០០គ្រាប់មកលើអ៊ុយក្រែនចាប់តាំងពីការចាប់ផ្តើមសង្គ្រាម។
នៅមុនថ្ងៃគម្រប់ខួប ៣ខែនៃការចាប់ផ្តើមសង្គ្រាមលោក Zelenskyy បាននិយាយថា មីស៊ីលចំនួន ៤គ្រាប់បានសម្លាប់មនុស្ស ៨៧នាក់នៅក្នុងទីក្រុង Desna ចម្ងាយ ៥៥គីឡូម៉ែត្រភាគខាងជើងទីក្រុងគីវ។ រុស្ស៊ីបានប្រមូលផ្តុំកម្លាំងនៅទីក្រុងជាច្រើនក្នុងតំបន់ Donbas ហើយកំពុងព្យាយាមបំផ្លាញជីវិតទាំងអស់។ នៅក្នុងរយៈពេលច្រើនសប្តាហ៍ខាងមុខនៃសង្គ្រាមនេះនឹងមានការលំបាក ហើយយើងត្រូវតែដឹងអំពីរឿងនេះ ប៉ុន្តែយើងគ្មានជម្រើសអ្វីក្រៅពីការប្រយុទ្ធនោះទេ។ ការប្រយុទ្ធ និងការយកជ័យជម្នះ។ លោកកំពុងបន្តធ្វើការដើម្បីបង្កើនសម្ពាធលើប្រទេសរុស្ស៊ី ហើយអាទិភាពជាក់ស្តែងសម្រាប់អ៊ុយក្រែននៅតែស្ថិតលើការផ្គត់ផ្គង់អាវុធ និងគ្រាប់រំសេវពីដៃគូ។
ស្របពេលនេះដែរ អតីតប្រធានាធិបតីអ៊ុយក្រែនលោក Petro Poroshenko បានគាំទ្រការអំពាវនាវរបស់ប្រធានាធិបតីលោក Zelenskyy កាលពីថ្ងៃចន្ទទៅកាន់វេទិកាសេដ្ឋកិច្ចពិភពលោក ដែលកំពុងជួបប្រជុំដើម្បីដាក់ទណ្ឌកម្មកាន់តែតឹងរ៉ឹងលើប្រទេសរុស្ស៊ី។ ទាំងអតីតប្រធានាធិបតី និងបច្ចុប្បន្នបានអំពាវនាវឱ្យមានការដកក្រុមហ៊ុនបរទេសទាំងស្រុងពីប្រទេសរុស្ស៊ី ដើម្បីការពារការគាំទ្រដល់សង្គ្រាមរបស់ខ្លួន។ ពួកគេនិយាយថា រុស្ស៊ីកំពុងរារាំងការផ្គត់ផ្គង់ស្បៀងអាហារសំខាន់ៗដូចជាស្រូវសាលី និងប្រេងផ្កាឈូករ័ត្នមិនឱ្យចេញពីកំពង់ផែរបស់អ៊ុយក្រែន។ ប្រធានកម្មវិធីស្បៀងអាហារពិភពលោករបស់អង្គការសហប្រជាជាតិ បានអំពាវនាវឱ្យកំពង់ផែបើកឡើងវិញដោយនិយាយថា កសិករនៅទីនោះមានស្បៀងអាហារគ្រប់គ្រាន់ដើម្បីចិញ្ចឹមមនុស្ស ៤០០លាននាក់៕
អត្ថបទ៖ ប៊ុនថន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
