ប្រធានអង្គភាពអ្នកនាំពាក្យរាជរដ្ឋាភិបាល ឯកឧត្តម ប៉ែន បូណា បាន​ថ្លែង​បញ្ជាក់​តាម​រយៈ​សន្និសីទ​សារព័ត៌មាន​នៅថ្ងៃទី១២ ខែវិច្ឆិកា ឆ្នាំ២០២៦នេះថា រហូតមកទល់ពេលនេះ ទោះ​បី​ជា​បទ​ឈប់​បាញ់​លើកទី២ បានចូលជាធរមាន តាំងពីថ្ងៃទី២៧ ខែធ្នូ ឆ្នាំ២០២៥ ក៏ដោយ ក៏​នៅ​សល់​ជន​ភៀសសឹកប្រមាណជា២ម៉ឺននាក់ទៀត នៅមិនទាន់អាចវិល​ត្រឡប់​ទៅ​ផ្ទះ​សម្បែង​វិញ​បា​ន​នៅ​ឡើយ ដោយសារតែការរារាំង តាមរយៈការដាក់ទូរកុងតឺន័រ ការរាយបន្លាលួស និងការ​បំផ្លិច​បំផ្លាញ​ផ្ទះ​សម្បែងពីសំណាក់កងកម្លាំងយោធាថៃ។

ឯកឧត្តម ប៉ែន បូណា បានថ្លែងថា ប្រឈមមុខនឹងបញ្ហាថៃឈ្លានពាន​ រារាំង ដាក់ទូរកុងតឺន័រ រាយ​បន្លា​លួស និងការបំផ្លិចបំផ្លាញផ្ទះសម្បែងពលរដ្ឋកម្ពុជាជាង ២ម៉ឺននាក់មិនឱ្យទៅផ្ទះវិញបានេះ, រាជ​រដ្ឋាភិបាលកម្ពុជា ដែលមានសម្តេចមហាបវរធិបតី ហ៊ុន ម៉ាណែត ជានាយករដ្ឋមន្ត្រី បាន​ដាក់​ចេញ​គោល​នយោបាយច្បាស់លាស់ និងបន្ទាន់ដើម្បីជួយគាំពារជនភៀសសឹក ដោយគិតគូរទាំង​សន្តិសុខ សុវត្ថិភាព សុខុមាលភាព និងការស្តាឡើងវិញនូវជីវភាពរស់នៅរបស់ពួកគេ។

ឯកឧត្តម​បានថ្លែងថា ជាក់ស្តែង រាជរដ្ឋាភិបាល​បាន​ផ្តល់​ជូន​ជម្រក​ដែល​មាន​លក្ខណៈ​សមរម្យ​ដើម្បី​ស្នាក់​នៅ​បណ្តោះអាសន្ននៅក្នុង «ភូមិរង់ចាំ»ទម្រាំបញ្ហា​ព្រំដែន​ត្រូវ​បាន​ដោះ​ស្រាយ​រួច​រាល់​ដែល​អនុញ្ញាត​ឱ្យពួកគេអាចវិលត្រឡប់ទៅកាន់ផ្ទះសម្បែងរបស់ខ្លួនវិញនាពេលអនាគត។

​ឯកឧត្តមបានបន្តថា ប្រជាពលរដ្ឋភៀសសឹកក៏ទទួលបានការគិតគូរ ដល់សន្តិសុខ សុវត្ថិភាព ជីវភាព និងសុខភាព តាមរយៈការដោះស្រាយជូនបងប្អូននូវភ្លើងអគ្គិសនី ទឹកស្អាត និង​ការ​ឧបត្ថម្ភ​ស្បៀងអាហារ ការសិក្សារបស់កុមារ រួមទាំងសេវាសុខាភិបាលផង។

ឯកឧត្តម ប៉ែន បូណា បានថ្លែងថា ការងារការទូតបាននិងកំពុងដើរតួនាទីយ៉ាងសកម្ម ឥត​ឈប់​ឈរ ​នៅគ្រប់កម្រិតនិងគ្រប់យន្តការដែលមាន ដើម្បីដោះស្រាយ​បញ្ហា​ព្រំដែន​ជា​មួយ​ថៃ​ដោយ​សន្តិវិធី ក្រោមអភិក្រម«កិច្ចការពារអធិបតេយ្យ បូរណភាពទឹកដី និងប្រជាជន គឺជាអាទិភាព​ខ្ពស់​បំផុត​របស់​រាជរដ្ឋាភិបាល»៕