ពោធិ៍សាត់៖ មន្ដ្រីជាន់ខ្ពស់ក្រសួងកសិកម្ម បានលើកឡើងថា បទល្មើសជលផលនៅខេត្តពោធិ៍សាត់ មានការថយចុះច្រើន បន្ទាប់ពីរដ្ឋបាលខេត្តសហការជាមួយក្រុមការងារអន្តរក្រសួង ចុះអនុវត្តបទបញ្ជាដ៏ម៉ឺងម៉ាត់របស់សម្ដេចតេជោ ហ៊ុន សែន នាយករដ្ឋមន្ត្រី ។

ថ្លែងក្នុងកិច្ចប្រជុំត្រួតពិនិត្យវឌ្ឍនភាពការងារ នៅរដ្ឋបាលខេត្តពោធិ៍សាត់ នារសៀលថ្ងៃទី២៣ខែ ឧសភាឆ្នាំ២០២២ ឯកឧត្តម តូច ប៊ុនហ៊ួរ រដ្ឋលេខាធិការក្រសួងកសិកម្មរុក្ខាប្រមាញ់ និងនេសាទ បានឱ្យដឹងទៀតថា ខេត្តពោធិ៍សាត់ មានស្រុកចំនួន០៣ ដែលជាប់បឹងទន្លេសាប គឺស្រុកក្រគរ ស្រុកកណ្ដៀង និងស្រុកបាកាន។

គិតពីថ្ងៃទី០២ខែមិនាដល់ថ្ងៃទី២២ខែឧសភាឆ្នាំ២០២២ យើងបំផ្លាញអួនទឹកសាប បានចំនួន១៤វង់ ឧបករណ៍ឆក់០៤គ្រឿង ស៊ីបយន្ត០៣គ្រឿង របាំងស្បៃមុង ១០.៩៥០ម៉ែត្រ លូស្បៃមុង៤៣ម៉ាត់ បង្គោលចំរឹង២៨៦០ដើម កាណូត៥១គ្រឿង ម៉ាស៊ីនកាណូត០៩គ្រឿង និងឃាត់ខ្លួនជនល្មើសបានចំនួន២១នាក់។

ឯកឧត្តម បន្ដថា ការចុះបង្ក្រាបយ៉ាង​ក្ដៅគគុក​បែបនេះ បានធ្វើឲ្យបទល្មើសជលផល​ក្នុង​ភូមិ​សាស្ត្រ​ខេត្តពោធិ៍សាត់ ​មានការថយចុះ និង​ស្ងៀមស្ងាត់​គ្រប់​ទីកន្លែងគួរឲ្យកត់សម្គាល់។

ឯកឧត្តម តូច ប៊ុនហ៊ួរ មានប្រសាសន៍ទៀតថា ទិសដៅទៅមុខយើងរួមគ្នាបន្តបង្ក្រាបបទ​ល្មើស​ដូចភ្លៀងរលឹម​ មិនមែនតែបទល្មើសនេសាទមួយប៉ុណ្ណោះទេ ​ទាំងការកាប់បំផ្លាញព្រៃលិចទឹក ការ​ទន្ទ្រានដីព្រៃខុសច្បាប់ ​បទល្មើសព្រៃឈើ ​និងបទល្មើសផ្សេងៗទៀត។​ ចំពោះបទល្មើសនេសាទ បើយើងបង្ក្រាបបាន១០០% តាមបទបញ្ជារបស់សម្ដេចតេជោ ហ៊ុន សែន នាយករដ្ឋមន្ត្រី នឹងធ្វើឲ្យប្រជានេសាទ​ជាលក្ខណៈគ្រួសារ​មាន​ការ​សប្បាយចិត្ត និង​ធ្វើឱ្យ​ធនធាន​ជលផល​សំបូរឡើងវិញ​ជាក់​ជាមិនខាន ​៕