អ្នកគាំទ្រមានការភ្ញាក់ផ្អើលជាខ្លាំង បន្ទាប់ពីក្លិបវិសាខា បានប្រកាសផ្លាស់ប្ដូរតួនាទីលោក Scott Cooper ពីគ្រូបង្គោល ទៅជានាយកបច្ចេកទេសកីឡា ឬ Sporting Director។ ការប្រកាសនេះ ធ្វើឡើងកាលពីល្ងាចថ្ងៃពុធ ស្របពេលក្លិបកំពុងធ្វើបានល្អក្នុងលីគ នាដើមរដូវកាលថ្មី ក្រោមការដឹកនាំរបស់គ្រូបង្វឹកសញ្ជាតិអង់គ្លេសរូបនេះ។

ការប្រកាសតែងតាំងតួនាទីថ្មីដល់លោក Scott Cooper បានបង្ហាញពីយុទ្ធសាស្ដ្រអភិវឌ្ឍន៍ក្លិបរយៈពេលវែងឲ្យកាន់តែរឹងមាំ ដោយផ្ដោតលើការគ្រប់គ្រងរួម ការជ្រើសរើសកីឡាករ និងការរៀបចំផែនការផ្សេងៗ។

ទន្ទឹមជាមួយការផ្ដល់តួនាទីដ៏កម្រិក្នុងវិស័យបាល់ទាត់ក្នុងប្រទេស ឬតំបន់ តែភាគច្រើនគេឃើញមាននៅបណ្ដាប្រទេសជឿនលឿនក្នុងវិស័យបាល់ទាត់នេះ បានធ្វើឲ្យកៅអីគ្រូបង្វឹកនៅទំនេរ ។ ដូច្នេះអ្នកគាំទ្ររំពឹងថា វិសាខា អាចនឹងមានការផ្លាស់ប្ដូរគ្រូបង្វឹកថ្មី ដើម្បីមកជំនួសតំណែងលោក Scott Cooper។ យ៉ាងណាព័ត៌មានផ្លូវការបែបណា វិសាខា នៅមិនទាន់ប្រកាសនោះទេ។

គួរដឹងថា ទោះបីទើបរងបរាជ័យលើកដំបូង ក្រោមថ្វីជើងឯកអង្គរថាយហ្គឺរ តែក្រោមការដឹកនាំរបស់លោក Scott Cooper វិសាខា បានចាប់ផ្ដើមយ៉ាងល្អនារដូវកាលថ្មី ដោយរកបាន ១៦ពិន្ទុ កំពុងឈរកំពូលតារាង នៃលីគកំពូលកម្ពុជា ឆ្នាំ២០២៦/២៧ ជាបណ្ដោះអាសន្ន លើក្រុមព្រះខ័នរាជស្វាយរៀង និងណាហ្គាវើលដ៏ ដែលតាមប្រកៀកពីក្រោយ ដោយមាន ១៤ពិន្ទុក្នុងដៃស្មើគ្នា៕អត្ថបទ លី ឈុនឡា