​ជប៉ុន៖ នាយករដ្ឋមន្ត្រី​ជប៉ុន​លោក Fumio Kishida បាន​ស្វាគមន៍​មេដឹកនាំ​សហរដ្ឋអាមេរិក ឥណ្ឌា និង​អូស្ត្រាលី​មកកាន់​ទីក្រុង​តូ​ក្យូ​នៅ​ថ្ងៃ​អង្គារ​នេះ​។​

​លោក Kishida បាន​ស្វាគមន៍​ប្រធានាធិបតី​សហរដ្ឋអាមេរិក​លោក​ Joe Biden, នាយករដ្ឋមន្ត្រី​ឥណ្ឌាលោក Narendra Modi និង​នាយករដ្ឋមន្ត្រី​អូស្ត្រាលី​លោក Anthony Albanese ដែល​ទើប​ស្បថ​ចូល​កាន់​តំណែង ខណៈ​លោក​បាន​ស្វាគមន៍​មេដឹកនាំ​ទាំងនេះ​នៅមុន​កិច្ចពិភាក្សា​ពី​សន្តិសុខ​របស់​ក្រុម​ប្រទេស ​Quad ទាំង​៤​។​ ភាពជា​ដៃគូ​ក្រុម​ប្រទេស​ Quad មាន​ទំនាក់ទំនង​គ្នា​កាន់​តែ​ខ្លាំង​ឡើង ខណៈ​លោក​ Biden ​បាន​កែ​សម្រួល​គោលនយោបាយ​ការបរទេស​របស់​សហ​រដ្ឋ​អាមេរិក ដើម្បី​ផ្តោត​កាន់​តែ​ខ្លាំង​លើ​តំបន់ និង​ដើម្បី​ប្រឆាំង​ការ​កើន​ឡើង​សកម្មភាព​របស់​ប្រទេស​ចិន ​ជា​មហាអំណាច​សេដ្ឋកិច្ច និង​សន្តិសុខ​។​

​ការរៀបចំ​ឡើង​កិច្ចពិភាក្សា​របស់​មេដឹកនាំ​ក្រុម​ប្រទេស Quad នឹង​ក្លាយ​ជា​សេចក្តីថ្លែងការណ៍​ច្បាស់លាស់​របស់​លោក Biden កាលពី​ថ្ងៃ​ចន្ទ​ថា សហរដ្ឋអាមេរិក​នឹង​ធ្វើ​អន្តរាគមន៍​ផ្នែក​យោធា ប្រសិនបើប្រទេស​ចិន​មានបំណង​ឈ្លានពាន​កោះ​តៃវ៉ាន់ ដោយ​និយាយ​ថា ​បន្ទុក​គឺ​ត្រូវ​ការពារ​កោះ​តៃវ៉ាន់​ឲ្យកាន់​តែ​ខ្លាំង បន្ទាប់ពី​ការ​វាយ​លុក​របស់​រុស្ស៊ី​លើ​អ៊ុយ​ក្រែ​ន​។ ប្រធានាធិបតី​សហរដ្ឋអាមេរិកត្រូវបាន​គេ​រំពឹងថា ​នឹងមាន​ជំនួប​ដាច់ដោយឡែក​ជាមួយនឹង​លោក Anthony Albanese ដែល​ទើប​ស្បថ​ចូល​កាន់​តំណែង​ថ្មី​ជានាយករដ្ឋមន្ត្រីអូស្ត្រាលី និង​ជួប​ជាមួយ​លោក Narendra Modi បន្ទាប់ពី​កិច្ចពិភាក្សា៕

អត្ថបទ៖ ប៊ុនថន