ភូមិហ្វ្រង់កូហ្វូនី ដែលរៀបចំឡើងនៅរាជធានីភ្នំពេញ ក្នុងឱកាសកិច្ចប្រជុំកំពូលហ្វ្រង់កូហ្វូនី លើកទី២០ បានទាក់ទាញចំណាប់អារម្មណ៍ពីប្រជាពលរដ្ឋជាច្រើន។ ក្នុងនោះ ទាំងអ្នករស់នៅរាជធានីភ្នំពេញ និងអ្នកធ្វើដំណើរ មកពីខេត្តរតនគិរី សុទ្ធតែបានបង្ហាញក្តីសប្បាយរីករាយ និងកោតសរសើរចំពោះការរៀបចំដ៏ល្អប្រណីតនេះ។

ជាក់ស្តែង ប្រជាពលរដ្ឋមកពីខេត្តរតនគិរី បានលើកឡើងដោយក្តីរីរាយថា ការបានមកទស្សនាភូមិហ្វ្រង់ កូហ្វូនី គឺជាបទពិសោធន៍ថ្មីមួយដែលរូបគាត់មិននឹកស្មានថា នឹងបានឃើញការរៀបចំយ៉ាងស្រស់ស្អាត និងមានការ តាំងបង្ហាញវប្បធម៌ពីបណ្តាប្រទេសជាច្រើននៅទីនេះ នោះឡើយ។ ហើយដោយសារតែមានភាពទាក់ទាញនេះ រូបគាត់ថែមទាំងបានសម្រេចពន្យារពេលត្រឡប់ទៅផ្ទះ ដើម្បីបន្តទស្សនាកម្មវិធីនេះ ឱ្យបានពេញមួយថ្ងៃទៀតផង។

ចំណែកប្រជាពលរដ្ឋរស់នៅរាជធានីភ្នំពេញ ក៏បានបង្ហាញក្តីសប្បាយរីករាយ និងកោតសរសើរចំពោះ ការរៀបចំភូមិហ្វ្រង់កូហ្វូនី ដែលមានសោភ័ណភាពស្រស់ស្អាត និងមានការតាំងបង្ហាញផលិតផល វប្បធម៌ និងប្រពៃណីពីប្រទេសនានា។ ដោយពួកគាត់យល់ថា ព្រឹត្តិការណ៍នេះ មិនត្រឹមតែផ្តល់ឱកាសឱ្យប្រជាពលរដ្ឋ បានឈ្វេងយល់ពីវប្បធម៌របស់ប្រទេសនានា នៅក្នុងទីតាំងតែមួយប៉ុណ្ណោះទេ ប៉ុន្តែថែមទាំងមានការចូលរួមពីបណ្តា ប្រទេស និងចម្រុះជាតិសាសន៍ផងដែរ។

ដោយសារតែមានការចាប់អារម្មណ៍ខ្លាំង និងជាព្រឹត្តិការណ៍ដែលមិនធ្លាប់មានពីមុនមកនោះ ប្រជាពលរដ្ឋ បាននាំគ្នាមកទស្សនា និងចូលរួមឈ្វេងយល់កាន់តែច្រើនឡើង ពីមួយថ្ងៃទៅមួយថ្ងៃ ជាពិសេសនៅថ្ងៃចុងសប្តាហ៍ នេះ៕ពៅយី