នៅក្នុងឱកាសជួបពិភាក្សាការងារជាមួយ សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភានៃព្រះរាជាណាចក្រកម្ពុជា ឯកឧត្តម ប៊ីណត ឌីស្ប៉ា (Benoît Dispa) ប្រធានសភាសហព័ន្ធវ៉ាល់ឡូនី-ព្រុចសែល នៃព្រះរាជាណាចក្របែលហ្ស៊ិក បានថ្លែងការកោតសរសើរពីភាពប៉ិនប្រសប់របស់ថ្នាក់ដឹកនាំកម្ពុជា ក្នុងការផ្សះផ្សា និងបញ្ចប់សង្គ្រាមពីអតីតកាល និងជំហរមោះមុតបច្ចុប្បន្នក្នុងការការពារសុខសន្តិភាព ដោះស្រាយជម្លោះព្រំដែនជាមួយប្រទេសជិតខាង ដោយសន្តិវិធី និងការគោរពច្បាប់អន្តរជាតិ។
ឯកឧត្តម ប៊ីណត ឌីស្ប៉ា បានចូលជួបពិភាក្សាការងារជាមួយ សម្តេចប្រធានរដ្ឋសភា នៅរសៀលថ្ងៃទី១៥ ខែវិច្ឆិកា ឆ្នាំ២០២៦ នៅវិមានរដ្ឋសភា ខណៈដែលឯកឧត្តមបានអញ្ជើញចូលរួមកិច្ចប្រជុំកំពូលហ្វ្រង់កូហ្វូនីលើកទី២០ នៅរាជធានីភ្នំពេញ។
ឯកឧត្តមបានកោតសរសើរកម្ពុជាយ៉ាងខ្លាំងចំពោះការរៀបចំកិច្ចប្រជុំដ៏មានសារៈសំខាន់នេះ ជាពិសេសឯកឧត្តមបានវាយតម្លៃខ្ពស់ចំពោះសុន្ទរកថាគន្លឹះប្រកបដោយអត្ថន័យរបស់ សម្តេចមហាបវរធិបតី ហ៊ុន ម៉ាណែត អំពីការថែរក្សាសន្តិភាព និងការដោះស្រាយជម្លោះជាមួយប្រទេសថៃដោយសន្តិវិធី និងគោរពច្បាប់អន្តរជាតិ។ ហ្វ្រង់កូហ្វូនីគាំទ្រសន្តិភាព និងមានជំនឿមុតមាំថា បញ្ហានេះនឹងត្រូវដោះស្រាយបានក្នុងពេលឆាប់ៗ។
ជាមួយគ្នានេះ ឯកឧត្តមបានគោរពថ្លែងអំណរគុណយ៉ាងជ្រាលជ្រៅជូនចំពោះថ្នាក់ដឹកនាំ ក៏ដូចជាប្រជាជនកម្ពុជា ដែលបានទទួលស្វាគមន៍រូបឯកឧត្តម និងគណៈប្រតិភូយ៉ាងកក់ក្តៅជាទីបំផុត ព្រមទាំងមានស្នាមញញឹមប្រកបដោយការស្រឡាញ់ ការគោរព និងកិច្ចសហប្រតិបត្តិការ។ ឯកឧត្តមប្រធានសភាសហព័ន្ធ បានវាយតម្លៃខ្ពស់ចំពោះសមត្ថភាព និងទេពកោសល្យក្នុងការដឹកនាំរបស់សម្តេចរដ្ឋសភាធិបតី ឃួន សុដារី ដែលជាស្ត្រីដំបូងគេនៅកម្ពុជា បានក្លាយជាប្រធានរដ្ឋសភា ជាស្ថាប័នសំខាន់តំណាងឱ្យប្រជាពលរដ្ឋ។
សម្តេចរដ្ឋសភាធិបតី មានក្តីសប្បាយរីករាយដែលបានជួបពិភាក្សាការងារជាមួយឯកឧត្តមប្រធានសភាសហព័ន្ធ និងសហការីនៅក្នុងឱកាសនេះ។ ក្នុងនាមពលរដ្ឋខ្មែរ សម្តេចមានក្តីសប្បាយរីករាយដែលឯកឧត្តមបានដឹងការពិតពីកម្ពុជា ដូចដែលសុន្ទរកថារបស់សម្តេចនាយករដ្ឋមន្ត្រី ហ៊ុន ម៉ាណែត បានបញ្ជាក់នៅក្នុងឱកាសបើកកិច្ចប្រជុំកំពូលហ្វ្រង់កូហ្វូនីលើកទី២០ ដូច្នេះដែរ។ កម្ពុជាត្រូវការសន្តិភាព មិនត្រូវការសង្គ្រាមនោះទេ។ កម្ពុជាបានឆ្លងកាត់ប្រវត្តិសាស្ត្រដ៏ជូរចត់រួចហើយ ដូច្នេះមិនត្រូវការសង្គ្រាមទៀតឡើយ។ កម្ពុជាបានអរគុណសហគមន៍អន្តរជាតិ ដែលបានគាំទ្រ និងជំរុញឱ្យភាគីថៃដោះស្រាយបញ្ហាដោយសន្តិវិធី និងគោរពច្បាប់អន្តរជាតិ។



