រដ្ឋធានីម៉ានីល៖ នាព្រឹកថ្ងៃទី ១៦ ខែវិច្ឆិកា ឆ្នាំ ២០២៦ ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា តំណាងដ៏ខ្ពង់ខ្ពស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានអញ្ជើញចូលរួមកិច្ចប្រជុំកំពូលអាស៊ាន-អង្គការសហប្រជាជាតិ លើកទី ១៦ ជាមួយថ្នាក់ដឹកនាំអាស៊ាន និងអគ្គលេខាធិការអង្គការសហប្រជាជាតិ នៅមជ្ឈមណ្ឌលសន្និបាតអន្តរជាតិហ្វីលីពីន (PICC) ក្នុងឱកាសនៃកិច្ចប្រជុំកំពូលអាស៊ានលើកទី៤៩ ដែលសាធារណរដ្ឋហ្វីលីពីនធ្វើជាម្ចាស់ផ្ទះ។
កិច្ចប្រជុំបានពិនិត្យឡើងវិញលើកិច្ចសហប្រតិបត្តិការអាស៊ាន-អង្គការសហប្រជាជាតិ និងទិសដៅនាពេលអនាគត។ សាធារណរដ្ឋហ្វីលីពីន ក្នុងនាមជាប្រទេសសម្របសម្រួលទំនាក់ទំនងអាស៊ាន-អង្គការសហប្រជាជាតិ បានថ្លែងសេចក្តីថ្លែងការណ៍រួមរបស់អាស៊ាន បន្ទាប់មកប្រទេសសមាជិកអាស៊ាន បានថ្លែងសេចក្តីថ្លែងការណ៍ជាតិរៀងៗខ្លួន។
ក្នុងឱកាសនេះ ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានថ្លែងអំណរគុណចំពោះឯកឧត្តម អង់តូនីញ៉ូ ហ្គូតេរ៉េស (António Guterres) អគ្គលេខាធិការអង្គការសហប្រជាជាតិ ចំពោះការដឹកនាំរបស់ឯកឧត្តម និងបានលើកឡើងពីអាទិភាពចំនួនបីសម្រាប់ភាពជាដៃគូគ្រប់ជ្រុងជ្រោយអាស៊ាន-អង្គការសហប្រជាជាតិ រួមមាន៖ ការពង្រឹងសន្តិភាពតាមរយៈការទូតបង្ការ និងការគោរពច្បាប់អន្តរជាតិ ដោយផ្អែកលើបទពិសោធរបស់កម្ពុជា ដែលធ្លាប់ទទួលបានប្រតិបត្តិការរក្សាសន្តិភាពរបស់អង្គការសហប្រជាជាតិ ហើយបច្ចុប្បន្នបានចូលរួមចំណែករក្សាសន្តិភាពពិភពលោកវិញ ការបំប្លែងការប្តេជ្ញាចិត្តលើការអភិវឌ្ឍប្រកបដោយចីរភាព ឱ្យទៅជាផលប្រយោជន៍ជាក់ស្តែង តាមរយៈហិរញ្ញប្បទាន បច្ចេកវិទ្យា និងធនធានមនុស្ស និងការកសាងភាពធន់រួមប្រឆាំងនឹងការប្រែប្រួលអាកាសធាតុ គ្រោះមហន្តរាយ និងការគំរាមកំហែងសុខភាព។
កិច្ចប្រជុំនេះ បានរួមចំណែកពង្រឹងភាពជាដៃគូគ្រប់ជ្រុងជ្រោយរវាងអាស៊ាន-អង្គការសហប្រជាជាតិ គាំទ្រពហុភាគីនិយម និងការអភិវឌ្ឍប្រកបដោយចីរភាព៕








