បណ្តាម្ចាស់ស្តង់សហគ្រាសបច្ចេកវិទ្យាឌីជីថលបរទេស នៅឯពិព័រណ៍ Franco Tech នៅមជ្ឈមណ្ឌលកោះពេជ្រ បានសម្តែងការពេញចិត្តចំពោះការរៀបចំរបស់ម្ចាស់ផ្ទះកម្ពុជា ចំពោះកិច្ចប្រជុំកំពូល ហ្វ្រង់កូហ្វូនី លើកទី២០ ក្នុងនោះពួកគេក៏បានបង្ហាញបំណងធ្វើការវិនិយោគជាក្រុមហ៊ុននៅកម្ពុជាតែម្តង។
តំណាងម្ចាស់ស្តង់បរទេស ផ្នែកឌីជីថល បានប្រាប់BTVថា ក្នុងរយៈពេលប៉ុន្មានថ្ងៃមកនេះ មានមហាជន ទំាងពលរដ្ឋខ្មែរ និងបរទេស បានចូទស្សនាពិព័រណ៍ FrancoTech និងបានសាកសួរព័ត៌មានអំពីបច្ចេកវិទ្យាឌីជីថល ហើយពួកគេពិតជាពេញចិត្តចំពោះការរៀបចំ ក្រៅពីនេះក៏មានថ្នាក់ដឹកនាំកំពូលសំខាន់ៗបានចាប់អារម្មណ៍ចំពោះបច្ចេកវិទ្យាឌីជីថលនៅកម្ពុជានេះដែរ។
បណ្តាម្ចាស់ស្តង់ឌីជីថលបរទេស បានបន្តថា ការរៀបចំនៅកម្ពុជា ធ្វើបានល្អ ដោយដំណើរការបានយ៉ាងរលូន និងមានសុវត្ថិភាព ដូចនេះបន្ទាប់ពីកិច្ចប្រជុំកំពូលហ្វ្រង់កូហ្វូនីនេះត្រូវបានបញ្ចប់ ពួកគេនឹងរៀបចំឱ្យមានក្រុមហ៊ុន ដើម្បីវិនិយោគនៅកម្ពុជាតែម្តង។
សូមបញ្ជាក់ថា ការរៀបចំព្រឹត្តិការអម កិច្ចប្រជុំកំពូល ហ្វ្រង់កូហ្វូនី លើកទី២០ រយៈពេលប៉ុន្មានថ្ងៃកន្លងមកនេះនៅក្នុងប្រទេសកម្ពុជា ទទួលបានការកោតសរសើរពីគណៈប្រតិភូ និងភ្ញៀវបរទេស ដូចជា ភូមិហ្វ្រង់កូហ្វូនី និងពិព័រណ៍ Franco tech ដែលទំាងអស់នេះ បានបង្ហាញឱ្យពិភពលោកបានយល់ដឹងយ៉ាងច្បាស់ថា កម្ពុជា ពិតជាមានសុខសន្តិភាព និងអាចធ្វើបាន៕ ផលិត៖ គង់ រ៉េន






