ភ្នំពេញ៖ វិទ្យាស្ថានជាតិពាណិជ្ជសាស្ត្រ (NIB) សហការជាមួយវិទ្យាស្ថានជំនាញពាណិជ្ជកម្មអន្តរជាតិក្វាងស៊ី នៃប្រទេសចិន បានបើកដំណើរការជាផ្លូវការនូវ «មជ្ឈមណ្ឌលឧត្តមភាពបញ្ញាសិប្បនិម្មិត (AI) និងឌីជីថល កម្ពុជា-ចិន» ដើម្បីលើកកម្ពស់ការបណ្តុះបណ្តាលជំនាញឌីជីថល និងទីផ្សារអេឡិចត្រូនិកនៅកម្ពុជា។ កម្មវីធីនេះប្រព្រឹត្តទៅ ក្រោមអធិបតីភាព ឯកឧត្តមបណ្ឌិត ហ៊ីង ស៊ីដេត អគ្គនាយកនៃអគ្គនាយកដ្ឋានអប់រំបណ្តុះបណ្តាលបច្ចេកទេស និងវិជ្ជាជីវៈ។
នៅក្រោយចប់ពិធីសម្ពោធដាក់ឱ្យប្រើប្រាស់ជាផ្លូវការនូវ «មជ្ឈមណ្ឌលឧត្តមភាពបញ្ញាសិប្បនិម្មិត និងឌីជីថល កម្ពុជា-ចិន កាលពីរសៀលថ្ងៃទី១៧ វិច្ឆិកា ឆ្នាំ២០២៦ ឯកឧត្តម តឹប អឿន នាយកវិទ្យាស្ថានជាតិពាណិជ្ជសាស្ត្រ បានមាន ប្រសាសន៍ប្រាប់ព័ត៌មាន ប៊ីធីវី ឱ្យដឹងថា កិច្ចសហប្រតិបត្តិការរវាងវិទ្យាស្ថាន និងភាគីចិន ក្នុងការបង្កើតមជ្ឈមណ្ឌលនេះឡើង គឺក្នុងគោលបំណងបណ្តុះបណ្តាលដល់ប្រជាពលរដ្ឋក្នុងស្រុក ក៏ដូចជាសិស្ស និស្សិត ដោយផ្តោតសំខាន់លើការអនុវត្ត ជាក់ស្តែងក្នុងការធ្វើទីផ្សារ តាមបែបឌីជីថល។
ក្រៅពីការបណ្តុះបណ្តាលសិក្ខាកាម កិច្ចសហប្រតិបត្តិការនេះក៏មានកម្មវីធីបំប៉នសមត្ថភាពគ្រូបង្គោលផងដែរ។ ឯកឧត្តមនាយក បានបន្ថែមថា ភាគីចិននឹងផ្តល់ឱកាសដល់គ្រូបង្រៀនទៅទទួលការបណ្តុះបណ្តាលដោយផ្ទាល់នៅប្រទេស ចិន ដើម្បីដកស្រង់បទពិសោធន៍ និងពង្រឹងសមត្ថភាព រួចត្រឡប់មកចែករំលែកចំណេះដឹងទាំងនោះនៅក្នុងវិទ្យាស្ថានវិញ។
លោកស្រីសាស្រ្តាចារ្យ លីវ ជៀយីង (Liu Jieying) អគ្គលេខាធិការងគណៈកម្មាធិការបក្ស និងជានាយិកាវិទ្យាស្ថាន វិជ្ជាជីវៈពាណិជ្ជកម្មអន្តរជាតិក្វាងស៊ី បានឱ្យដឹងថា តាមរយៈកិច្ចសហប្រតិបត្តិការជាមួយវិទ្យាស្ថាន NIB មជ្ឈមណ្ឌលឧត្តម នេះ ក៏មានកិច្ចសហប្រតិបត្តិការ ជាមួយសហគ្រាស ដើម្បីលើកម្ពស់ឱកាសការងារ និងការតភ្ជាប់រវាងការបណ្តុះបណ្តាល និងទីផ្សារការងារ។ លោកស្រី បន្តថា មជ្ឈមណ្ឌលនេះមានគោលបំណងក្លាយជាគំរូឈានមុខគេនៃកិច្ចសហប្រតិបត្តិការអប់រំ និងបណ្តុះបណ្តាលវិជ្ជាជីវៈ ដែលផ្សារភ្ជាប់ជាមួយវិស័យឧស្សាហកម្មនៅតំបន់មេគង្គផងដែរ។
មកទល់ពេលនេះ គម្រោងសម្រេចបានសមិទ្ធផល ជាបន្តបន្ទាប់ រួមមាន៖ ការកែលម្អបន្ទប់សិក្សា និងបន្ទប់ធ្វើការ, ការបំពាក់កុំព្យុទ័រ និងការបណ្តុះបណ្តាលសិស្សជំនាន់ដំបូងជិត ៥០នាក់ លើជំនាញឯកទេសទីផ្សារឌីជីថល និងគ្រោងបើកវគ្គថ្មីបន្តទៀតនៅពេលខាងមុខនេះដែរ។ ជាមួយនេះ ឯកឧត្តមនាយក បានប្រកាសស្វាគមន៍យុវជន សិស្ស និស្សិត និងប្រជាពលរដ្ឋពលទូទៅ ដែលមានបំណងចង់សិក្សាជំនាញឌីជីថល ទីផ្សារឌីជីថល និងបញ្ញាសិប្បនិម្មិត អាចអញ្ជើញមកចុះឈ្មោះចូលរៀននៅវិទ្យាស្ថានជាតិពាណិជ្ជសាស្ត្រ (NIB) ចាប់ពីពេលនេះតទៅ ក្រោមការឧបត្ថម្ភគាំទ្រពីភាគីចិន និងរាជរដ្ឋាភិបាលកម្ពុជា៕អត្ថបទ៖ ឈិត បូរ៉ាវី







