ក្រុមប្រឹក្សាអភិវឌ្ឍន៍កម្ពុជា (ក.អ.ក.) និងសភាពាណិជ្ជកម្មនិងឧស្សាហកម្មបារាំងនៅកម្ពុជា (CCIFC) ផ្លាស់ប្តូរអនុស្សរណៈ នៃការយោគយល់គ្នា ដើម្បីពង្រឹង និងពង្រីកកិច្ចសហប្រតិបត្តិការ និងជំរុញការវិនិយោគនៃប្រទេសទាំងពីរ។

ឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា (ក.អ.ក.) នៅល្ងាចថ្ងៃទី១៧ ខែ វិច្ឆិកា ឆ្នាំ២០២៦ បានអញ្ជើញជាអធិបតី និងជាសក្ខីភាពក្នុងការផ្លាស់ប្តូរអនុស្សរណៈនៃការយោគយល់គ្នារវាង ក.អ.ក. និងសភា ពាណិជ្ជកម្មនិងឧស្សាហកម្មបារាំងនៅកម្ពុជា (CCIFC), ដោយមានឯកឧត្តម ជា វុទ្ធី អគ្គលេខាធិការគណៈកម្មាធិការវិនិយោគកម្ពុជា នៃ ក.អ.ក. ជាអ្នកតំណាងស្ថាប័ន ក.អ.ក. ផ្លាស់ប្តូរជាមួយលោក Pascal Catry ប្រធាន CCIFC។

ពិធីផ្លាស់ប្តូរឯកសារអនុស្សារណៈលើការយោគយល់គ្នានៅល្ងាចម្សិលមិញនេះ មានការចូលរួមជាសក្ខីភាពផងដែរ ពីសំណាក់ ឯកឧត្តមសាស្រ្តចារ្យ ឈាង រ៉ា រដ្ឋមន្ត្រីក្រសួងសុខាភិបាល, លោកអនុប្រធាន CCIFC, និងលោកនាយកប្រតិបត្តិ នៃសភាពាណិជ្ជកម្ម និងឧស្សាហកម្មបារាំងនៅកម្ពុជា CCIFC រួមទាំងមានថ្នាក់ដឹកនាំក្រុមប្រឹក្សាអភិវឌ្ឍន៍កម្ពុជាជាច្រើនរូប។
ក្នុងពិធីនេះដែរ ក៏ជាការជួបជុំធុរកិច្ច (B2B Sessions) ដើម្បីបើកឱកាសឲ្យក្រុមហ៊ុននានាស្វែងរកដៃគូ និងការផ្សារភ្ជាប់ ទំនាក់ទំនងលើផ្នែកពាណិជ្ជកម្ម និងការវិនិយោគ ក្នុងគោលដៅជំរុញការធ្វើពាណិជ្ជកម្មទ្វេភាគីនៃប្រទេសទាំងពីរឱ្យមានទំហំ ពាណិជ្ជកម្មកាន់តែធំ។
សូមបញ្ជាក់ថា ការធ្វើពាណិជ្ជកម្មទ្វេភាគីកម្ពុជា-បារាំង នៅក្នុងរយៈពេល ១០ ខែ ឆ្នាំ២០២៦, បើយោងតាមរបាយការណ៍អគ្គនាយក ដ្ឋានគយ និងរដ្ឋាករកម្ពុជា ការធ្វើពាណិជ្ជកម្មប្រទេសទាំងពីរ មានទំហំទឹកប្រាក់សរុបជាង ៥៦០ លានដុល្លារអាមេរិក កើនឡើងជិត ១៦ ភាគរយ ក្នុងនោះកម្ពុជាបាននាំចេញមានទឹកប្រាក់ជាង ៤៣១ លានដុល្លារ កើនជាង ១២ ភាគរយ និងការនាំចូលពីបារាំង ជាង ១២៩ លានដុល្លារ កើនជាង ២៨ ភាគរយ បើធៀបរយៈពេលដូចគ្នានិងឆ្នាំ២០២៦៕ អត្ថបទ៖ សុន រ៉ាឌី

