ភ្នំពេញ៖ កម្មករកម្មការិនី លើកឡើងថា ពួកគាត់នឹងចាកចេញទៅបោះឆ្នោតជ្រើសរើសក្រុមប្រឹក្សាឃុំសង្កាត់ ដើម្បីបំពេញកាតព្វកិច្ចជាពលរដ្ឋ និងជ្រើសរើសថ្នាក់ដឹកនាំដែលអាចជួយអភិវឌ្ឍន៍ឃុំសង្កាត់របស់ខ្លួន និងគិតគូពីប្រជាពលរដ្ឋគ្រប់រូប។

សម្រាប់កម្មករ-កម្មការិនី ក៏ទទួលបានការអនុញ្ញាតឈប់សម្រាកមុនការបោះឆ្នោត ១ថ្ងៃ និងក្រោយបោះឆ្នោត១ថ្ងៃផងដែរ។

ជាការសម្រួលដល់កម្មករកម្មការិនី ក្នុងការចូលរួមការបោះឆ្នោតនៅថ្ងៃទី៥ខែមិថុនា ខាងមុខ ក្រសួងការងារ និងបណ្ដុះបណ្ដាលវិជ្ជាជីវៈ បានអនុញ្ញតឱ្យកម្មករកម្មការិនី ទទួលបានការឈប់​សម្រាកមុនថ្ងៃបោះឆ្នោត ១ថ្ងៃ និងក្រោយបោះឆ្នោត១ ថ្ងៃ ដោយរក្សាប្រាក់ឈ្នួល និងអត្ថប្រយោជន៍ផ្សេងៗដដែល។

ការអនុញ្ញាតបែបនេះក៏ព្រោះតែកម្មករកម្មការិនី មួយចំនួនដែលបំពេញការងារនៅតាមរោងចក្រ ត្រូវទៅបោះឆ្នោតនៅស្រុកកំណើតរបស់ខ្លួន។

ខណៈពេលកំពុងបំពេញកិច្ចការនៅរោងចក្រ ប្រឹភីសឺស ហ្កាមេន ស្ថិតនៅក្នុងក្រុងតាខ្មៅ ខេត្តកណ្ដាលកម្មការិនី ពួកគាត់ បានលើកឡើងថា ការចូលរួមបោះឆ្នោតជ្រើសរើសក្រុមប្រឹក្សាឃុំ​សង្កាត់ ជាកាតព្វកិច្ចក្នុងនាមជាពលរដ្ឋ ហើយក៏ជាឱកាសអាចជ្រើសរើសថ្នាក់ដឹកនាំដែលខ្លួនគិតថា ចេះគិតគូពីប្រជាពលរដ្ឋ ​និងធ្វើឱ្យភូមិឃុំមានការអភិវឌ្ឍ។

សម្រាប់ពួកគាត់ គឺនឹងចាកចេញទៅបោះឆ្នោត នៅស្រុកកំណើត នៅថ្ងៃសៅរ៍ជាថ្ងៃឈប់ដំបូង និងត្រឡប់មកវិញនៅថ្ងៃចន្ទ។

ក្រសួងការងារបញ្ជាក់ក្នុងសេចក្ដីជូនដំណឹងដែរថា កម្មករកម្មការិនី ពុំ​តម្រូវឱ្យបង្ហាញ​ឯកសារ​ពាក់ព័ន្ធ​ផ្សេងៗ ពេលត្រឡប់មកវិញឡើយ។​ ចំពោះ​កម្មករ​និយោជិត ដែល​អវត្តមាន​ហួស​ពី​ច្បាប់អនុញ្ញាត ​គឺត្រូវអនុវត្តតាមបញ្ជាផ្ទៃក្នុងរបស់រោងចក្រសហគ្រាស។

ក្រសួងការងារ ក៏បានបញ្ជាក់ឱ្យភាគី​នយោជក ត្រូវខិតខំបើកប្រាក់ឈ្នួលជូនកម្មករ ឱ្យបាន​មុនថ្ងៃបោះឆ្នោត។ ​ករណីពុំមានលទ្ធភាព​ ត្រូវ​អ​នុញ្ញាតឱ្យកម្មករខ្ចីប្រាក់​ឈ្នួលមួយភាគ​ជាមុនសិន។

ការបោះឆ្នោតជ្រើសរើសក្រុមប្រឹក្សាឃុំសង្កាត់​ គឺនឹងប្រព្រឹត្តទៅនៅថ្ងៃទី​ ៥ខែ មិថុនា ឆ្នាំ ២០២២ ចាប់ផ្ដើមពីម៉ោង ​៧.០០ព្រឹក រហូតដល់ម៉ោង ៣.០០ រសៀល។

សម្រាប់ការបោះឆ្នោតនេះ​ គឺមានគណបក្សចូលរួមសរុបចំនួន ​១៧ គណបក្ស ដោយ​គណបក្ស​ប្រជាជន​កម្ពុជា ​ជាគណបក្សដែលមានបេក្ខភាពឈរឈ្មោះ គ្រប់ឃុំសង្កាត់ទាំងអស់​ទូទាំងប្រទេស៕ អត្ថបទ៖ គឹមហុក