ភ្នំពេញ៖ នៅថ្ងៃទី ២៥ ខែឧសភានេះ គ្រប់ការិយាល័យរៀបចំការបោះឆ្នោតនៅតាមបណ្តាឃុំ-សង្កាត់ ទូទាំងប្រទេស បានបើកដំណើរការប្រឡងធ្វើតេស្តព្រមៗគ្នា ក្នុងការជ្រើសរើសមន្ត្រីបម្រើការងារនៅការិយាល័យបោះឆ្នោតជាង ១៤ម៉ឺននាក់ ដើម្បីត្រៀបរៀបចំការបោះឆ្នោតជ្រើសរើសក្រុមប្រឹក្សាឃុំសង្កាត់អាណត្តិទី៥ នៅថ្ងៃទី៥ ខែមិថុនា ឆ្នាំ២០២២។

ឯកឧត្តម ហង្ស ពុទ្ធា អ្នកនាំពាក្យគណៈកម្មាធិការជាតិរៀបចំការបោះឆ្នោត គ.ជ.ប បានថ្លែងថា មន្ត្រីបម្រើការងារនៅការិយាល័យបោះឆ្នោតប្រមាណ ១៤ម៉ឺននាក់ ដែលគ.ជ.ប ប្រកាសជ្រើសរើស​នៅថ្ងៃនេះ គឺមានប្រធានការិយាល័យ អនុប្រធានការិយាល័យបោះឆ្នោត និងមានការជ្រើសរើស​មន្ត្រី​ដែលត្រូវធ្វើការជំនាញបន្តបន្ទាប់ទៀត ​ដូចជា ​លេខាធិការិយាល័យជាដើម ដើម្បីបំរើការងារ​បោះឆ្នោត និង​រាប់សន្លឹកឆ្នោត។

លោក លឹម សារិន ប្រធានគណៈកម្មការរៀបចំការបោះឆ្នោតសង្កាត់ព្រែកកំពឹស ក្នុងខណ្ឌដង្កោ រាជធានីភ្នំពេញ បានថ្លែងប្រាប់BTVនៅថ្ងៃទី៥ ខែមិថុនានេះ ថា នៅថ្ងៃនេះ គណៈកម្មការ​រៀប​ចំការ​បោះឆ្នោតសង្កាត់ព្រែកកំពឹស​ បានរៀបចំការប្រឡង ការសសម្ភាសន៍ជាមួយមន្ត្រីការិយាល័យ​ដែលបានដាក់ពាក្យដើម្បីបំរើការនៅក្នុងការងារបោះឆ្នោត នៅថ្ងៃទី៥ខែមិថុនាខាងមុខនេះ ហើយសម្រាប់លទ្ធផលនៃការប្រឡងធ្វើតេស្តនេះ នឹងបិទផ្សាយនៅថ្ងៃស្អែកនេះ។

បេក្ខជន បេក្ខនារី ដែលកំពុងរងចាំចូលប្រឡងធ្វើតេស្តនេះ បានថ្លែងថា ពួកគាត់ទាំងអស់គ្នាចង់​ធ្វើ​ការងារជាមន្ត្រីការិយាល័យបោះឆ្នោត​ ដើម្បីទទួលបានបទពិសោធន៍ថ្មី ក្នុងការរៀបចំការបោះឆ្នោត​ជ្រើសរើសក្រុមប្រឹក្សាឃុំសង្កាត់អាណត្តិទី៥ នៅថ្ងៃទី៥ ខែមិថុនា​ ឆ្នាំ ២០២២ ។

បើ​តាម​ឯកឧត្តម ហង្ស ពុទ្ធា សម្រាប់ការប្រឡង ​និងសម្ភាសផ្ទាល់មាត់​ ដើម្បីរើសមន្រ្តីជាង ១៤ ម៉ឺននាក់នេះ ត្រូវធ្វើឡើងនៅតាមស្នាក់ការគណៈកម្មការរៀបចំការបោះឆ្នោតឃុំ-សង្កាត់ ​១៦៥២ ឃុំ-សង្កាត់ ​គឺត្រូវធ្វើតែមួយថ្ងៃនោះទេ ដោយសារ គ.ជ.ប ​មិន​ចង់​អោយ​វិញ្ញាសារ​ដែល​បិទជិត​នោះ បែកធ្លាយជាសាធារណៈ ​ទៅអោយបណ្តាបេក្ខជន ​បេក្ខនារីផ្សេងៗដឹងមុន៕ អត្ថបទ ស៊ុម សុខជា