ឧត្តរមានជ័យ៖ អាជ្ញាធរខេត្តឧត្តរមានជ័យ បានត្រៀមទឹកទុកជាស្រេច តាមប្រព័ន្ធធារាសាស្ត្រតូចធំចំនួនជាង ៨០កន្លែង ដែលមានទឹកគ្រប់គ្រាន់ សម្រាប់ជាប្រយោជន៍ដល់ពលរដ្ឋប្រើប្រាស់ប្រចាំថ្ងៃ ក៏ដូចជាស្រោចស្រពដំណាំកសិកម្មផ្សេងៗ ។

បើតាមលោក ញឺន កួន ប្រធានមន្ទីរធនធានទឹក និងឧតុនិយមខេត្តឧត្តរមានជ័យ លើកឡើងថា ខេត្តឧត្តរមានជ័យ មានអំណោយផលច្រើន សម្បូរដោយជួរភ្នំ បឹងធម្មជាតិធំៗ និងមានប្រព័ន្ធ​ធារាសាស្ត្រ​តូចធំចំនួន ៨១ទីតាំង​ ក្នុងនោះប្រព័ន្ធធារាសាស្ត្រខ្នាតធំចំនួន​ ៣កន្លែង ខ្នាតមធ្យម​ចំនួន​២១កន្លែង និងខ្នាតតូចចំនួន៥៧កន្លែង​ ហើយប្រភពទឹកទាំងអស់នេះ មានសក្តានុពល​អាច​ជួយស្រោចស្រព​ដំណាំរបស់ពលរដ្ឋ ​បានទាំងប្រាំង ​និងវស្សាសរុបប្រមាណជាង​ ២៧ ៨២១ហិកតា ហើយបន្តជួយដល់ខេត្តសៀមរាប​ និងខេត្តបន្ទាយមានជ័យផងដែរ ។

លោកបន្តថា ខេត្តនេះត្បិតបច្ចុប្បន្ន​ មានការបម្រែបម្រួលនូវកម្ដៅ និងមាន​ភ្លៀងធ្លាក់​ច្រើន​តាមផ្នែក​មួយចំនួន ​ប៉ុន្តែតាមបណ្តាអាងស្តុបប្រភពទឹកធម្មជាតិតូចធំ​ មាន​ទឹកគ្រប់គ្រាន់ ដើម្បីរក្សា​ទុក​ក្នុងការប្រើប្រាស់ ​សម្រាបស្រោចស្រព​ដំណាំកសិកម្មផ្សេងៗ ​ក៏ប៉ុន្តែនៅតាមតំបន់អាងស្តុប​ប្រភព​ទឹកខ្លះៗ ​ក៏តម្រូវឱ្យមានការប្រើប្រាស់​ ដោយសន្សំសំចៃ ​ព្រោះផ្ទៃទំហំអាងតូច ស្តុបទឹកបាន​បរិមាណ​តិច និងតាមតំបន់ឆ្ងាយៗ​មួយចំនួន​ ជាកក្តាធ្វើឲ្យមានការប្រឈមសម្រាប់ប្រជាពលរដ្ឋ ធ្វើកសិកម្មនៅតាមតំបន់ឆ្ងាយៗ ។

លោកប្រធានមន្ទីរ បានបញ្ជាក់ថា ចំពោះការងារបង្កបង្កើនផលស្រូវរដូវប្រាំង ​និងរដូវវស្សាឆ្នាំ​២០២២​នេះ ​ក្នុងខេត្តកសិករអាចធ្វើបាន​តែមួយដងប៉ុណ្ណោះ បើទោះបីជាមានប្រភពទឹក​គ្រប់គ្រាន់​យ៉ាងណាក្តី ​មិនអាចធ្វើស្រូវប្រាំងលើកទី២ ​បាននោះទេ​ ព្រោះ​អាជ្ញាធរត្រូវរក្សាទឹកទុក សម្រាប់​ប្រើប្រាស់​ប្រចាំថ្ងៃ​ និងការធ្វើកសិកម្មដាំដំណាំរួមផ្សំផ្សេងៗទៀត ៕ អត្ថបទ៖ ឃិន សារិទ្ធ