កំពង់ឆ្នាំង៖ នាព្រឹកថ្ងៃទី២៥ ខែឧសភា ឆ្នាំ២០២២ លោក ស៊ុន សុវណ្ណារិទ្ធ ប្រធាន​គណបក្ស​ប្រជាជន​កម្ពុជាខេត្តកំពង់ឆ្នាំង រួមនិងក្រុមការងារ បានអញ្ជើញចុះសួរសុខទុក្ខ និងពន្យល់​សមាជិក​គ្រួសារ​បក្ស​ប្រជាជនកម្ពុជា នៅស្រុកកំពង់លែង ពីរបៀបគូសសន្លឹកឆ្នោត និង​ពន្យល់​អោយ​ស្គាល់ និងចំណាំរូបសញ្ញារបស់គណបក្សប្រជាជនកម្ពុជា។

លោក ស៊ុន សុវណ្ណារិទ្ធិ បានពន្យល់អំពីរបៀបគូសសន្លឹកឆ្នោត ជាមួយប្រជាពលរដ្ឋ ជាសមាជិក​គ្រួសារ​គណបក្សប្រជាជនកម្ពុជា តាមលំនៅដ្ឋានរបស់ពួកគាត់ នៅតាមភូមិមួយចំនួន​ក្នុង​ស្រុក​កំពង់លែង។ លើសពីនេះលោកបានអំពាវនាវអោយប្រជាពលរដ្ឋ នាំគ្នាទៅបោះឆ្នោត​ជ្រើសរើស​ក្រុម​ប្រឹក្សា​ឃុំរបស់ខ្លួន នៅថ្ងៃទី០៥ ខែមិថុនា ឆ្នាំ២០២២ នៅតាមការិយាល័យ​បោះឆ្នោត​រៀង​ៗ​ខ្លួន​។

ប្រធានគណៈកម្មាធិការគណបក្សប្រជាជនកម្ពុជាខេត្តកំពង់ឆ្នាំង បានពន្យល់បន្ថែមអំពី គុណ​ដ៏​ឧត្តុង្គ​ឧត្តមរបស់គណបក្សប្រជាជនកម្ពុជា ដែលមានសម្ដេចតេជោ ហ៊ុន សែន ជាប្រធាន និងសម្ដេច ហេង សំរិន ប្រធានកិត្តិយសបក្ស។ វីរភាពរបស់សម្ដេច និងថ្នាក់ដឹកនាំជា​ន់​ខ្ពស់រ​បស់​គណបក្ស​ប្រជាជនមួយចំនួនទៀត បានបូជាសាច់ស្រស់ ឈាមស្រស់ ដឹកនាំវីរយុទ្ធជន​ចេញ​តស៊ូ​រំដោះជា​តិ​ទឹកដីឲ្យរួចផុតពីរបបប្រល័យពូជសាសន៍ ប៉ុល ពត ដែលយើងទាំងអស់គ្នា មិនអាច​បំភ្លេច​បាន​នូវគុណណូបការៈដ៏ធំធេងទាំងនេះបានឡើយ។

សម្តេចតជោ ហ៊ុន សែន បានកសាងប្រទេសឲ្យមានការអភិវឌ្ឍដូចសព្វថ្ងៃនេះ តាំងពីបាតដៃទទេ ប្រជាពលរដ្ឋរស់នៅក្នុងសុខសន្តិភាព មិនតែប៉ុណ្ណោះ សម្តេច និងថ្នាក់ដឹកនាំ​បក្ស​ប្រជាជន​បាន​ខិត​ខំ​ការពារ មិនឲ្យរបបប្រល័យពូជសាសន៍ វិលត្រឡប់មកកម្ពុជាជាថ្មីទៀតបានឡើយ។ ដោយ​ឡែក​នៅ​តាមមូលដ្ឋានឃុំសង្កាត់ក្នុងខេត្តកំពង់ឆ្នាំង បាននិងកំពុងអភិវឌ្ឍន៍ឥតឈប់ឈរ មានអគារ​តូចធំ មានផ្លូវខ្វាត់ខ្វែងងាយស្រួលក្នុងការធ្វើដំណើរ មានប្រឡាយ​ទឹក​ សម្រាប់​ស្រោច​ស្រព មានភ្លើងអគ្គិសនីដល់គ្រប់ទីជនបទ និងមានការ​យក​ចិត្ត​ទុក​ដាក់​ពី​សុខុមាលភាព​ប្រជាពលរដ្ឋ​ទូទៅទៀតផង។

សូមបញ្ជាក់ថា ក្នុងយុទ្ធនាការឃោសនា រកសំឡេងឆ្នោត​ជ្រើសរើស​ក្រុម​ប្រឹក្សា​ឃុំ​សង្កាត់​ក្នុង​អាណត្តិទី៥នេះ មានក្រុមប្រឹក្សាឈរឈ្មោះចំនួន១១គណបក្ស ដែលបាន​ចុះឈ្មោះ​នៅ​ក្នុង​ខេត្តកំពង់ឆ្នាំង។ ដោយឡែកគណបក្សប្រជាជនកម្ពុជា នៅក្នុងខេត្តកំពង់ឆ្នាំងទាំង៧១ឃុំសង្កាត់ នៅថ្ងៃទី៥ នៃយុទ្ធនាការឃោសនារកសំឡេងឆ្នោតនេះ គឺមានសកម្មភាពសស្រាក់សស្រាំ ទាំង​ផ្លូវ​ទឹក​ និងផ្លូវគោក ចំណែកសម្លេងឧឃោសនស័ព្ទវិញ លាន់ឮរំពងនៅគ្រប់មូលដ្ឋាន លាយ​ឡំ​ទៅ​នឹង​ការ​បន្លឺសំឡេងខ្លាំងៗថា គណបក្សប្រជាជនកម្ពុជាត្រូវតែឈ្នះទាំង៧១ឃុំសង្កាត់៕ អត្ថបទ៖ ហុង វាស្នា