បាត់ដំបង៖ អភិបាលខេត្តបាត់ដំបង ឯកឧត្តម សុខ លូ បានសំណូមពរដល់វិនិយោគិន ពិនិត្យលទ្ធភាពវិនិយោគលើការកែច្នៃផលិតផលកសិកម្ម ខណៈបាត់ដំបង ជាខេត្តដែលមានសក្ដាពុលខ្ពស់លើវិស័យកសិកម្ម មានទាំងដំណាំស្រូវ ដំណាំហូបផ្លែ និងដំណាំឧស្សាហកម្មជាដើម។

ក្នុងសិក្ខាសាលាស្ដីពី ការយល់ដឹង ពីការធ្វើអាជីវកម្មរបស់ពាណិជ្ជករកម្ពុជា ដើម្បីកាត់បន្ថយបញ្ហា​ប្រឈមផ្នែកផ្លូវច្បាប់ នៅថ្ងៃទី២៥ ខែឧសភា ឆ្នាំ២០២២ អភិបាលខេត្តបាត់ដំបង ​មានប្រសាសន៍ថា បច្ចុប្បន្ននេះ ​ផលិតផលកសិកម្មក្នុងខេត្តបាត់ដំបង ​នៅសល់ច្រើនណាស់ ​មិនទាន់ត្រូវបានកែច្នៃ ដែលទាមទារឱ្យមានការបង្កើតរោងចក្រកែច្នៃ ។

ឯកឧត្តម បានបន្តថា នៅរដូវប្រមូលផលម្ដងៗ ប្រជាកសិករបានជួបប្រទះការលំបាកខ្លាំង​លើ​បញ្ហា​កង្វះទីផ្សារ​ ខណៈទិន្នផលដែល​ផលិត​បាន​មានចំនួនច្រើន​ តែ​ការ​កែច្នៃមិនទាន់បំពេញ​បាន​តាម​តម្រូវការ ។

បន្ថែមពីនេះ អភិបាលខេត្តបាត់ដំបង ​បានជំរុញឱ្យភាគីពាក់ព័ន្ធ ចាត់វិធានការច្បាប់ឱ្យបានតឹងរ៉ឹងលើ​អ្នកធ្វើ​អាជីវកម្មក្លែងបន្លំ ​និងប្រកួតប្រជែងដោយមិនស្មើភាព ដើម្បីបង្កបរិយាកាសវិនិយោគ​ឱ្យបាន​កាន់តែល្អប្រសើរ ។

គួរបញ្ជាក់ថា ក្រៅពីម៉ាស៊ីកិច្ចស្រូវតូចធំៗ នៅខេត្តបាត់ដំបង ​មានរោងចក្រ ​សហគ្រាស និង​សិប្បកម្មកែច្នៃកសិផលមួយចំនួន​ ប៉ុន្តែមិនទាន់ឆ្លើយតបនឹងផលកសិកម្មនៅក្នុងខេត្ត ដែល​ប្រជាពលរដ្ឋបានបង្កបង្កើនផល​ដំណាំផ្សេងៗ ​កើនឡើងពីមួយទៅមួយឆ្នាំ និងបានស្នើឲ្យជួយ​ដោះស្រាយ​បញ្ហាទីផ្សារពីភាគីពាក់ព័ន្ធ ៕ អត្ថបទ៖ នឿត សុភក្តិ