តាកែវ៖ ឯកឧត្តមបណ្ឌិត ពេជ សោភ័ន ប្រធានក្រុមការងារគណបក្សប្រជាជនកម្ពុជា (CPP) ចុះមូលដ្ឋានស្រុកព្រែកកប្បាស ខេត្តតាកែវ បានថ្លែងថា ប្រទេសកម្ពុជាអស់រយៈពេលជាង ៤០ឆ្នាំ ក្រោមការដឹកនាំរបស់គណបក្សប្រជាជនកម្ពុជា មានការរីកចម្រើនឥតឈប់ឈរ ការអភិវឌ្ឍនេះ គឺធ្វើបន្តឥតងាករេ ។

ក្នុងឱកាសដឹកនាំធ្វើយុទ្ធការឃោសនាបោះឆ្នោតរកសំឡេងឆ្នោត សម្រាប់ការបោះឆ្នោត​ជ្រើសរើស​ក្រុមប្រឹក្សាឃុំសង្កាត់ អាណត្តិទី៥ នៅថ្ងៃទី២៥ ខែឧសភា ឆ្នាំ២០២២ ​នៅក្នុងឃុំកំពែង ស្រុកព្រៃកប្បាស ឯកឧត្តមបណ្ឌិត ពេជ សោភ័ន ថ្លែងទៅកាន់សមាជិក និងអ្នកគាំទ្រ​គណបក្សប្រជាជន​ថា ភាពរីកចម្រើនរបស់ប្រទេសជាតិ ពលរដ្ឋមានការងារធ្វើ នាំឲ្យ​សេដ្ឋកិច្ចគ្រួសារ​កាន់​តែល្អប្រសើរ ទើបធ្វើឲ្យពលរដ្ឋបាននាំគ្នាបោះឆ្នោតគាំទ្រគណបក្ស​ប្រជាជន​កម្ពុជា ឲ្យឈ្នះឆ្នោតគ្រប់ៗអាណត្តិកន្លងមក ហើយក្នុងអាណត្តិថ្មីនេះ សង្ឃឹមថា​ពលរដ្ឋនឹង​បោះឆ្នោត​គាំទ្របក្សប្រជាជន​ ឈ្នះឆ្នោតភ្លូកទឹកភ្លូកដីបន្តទៀតជាក់ជាពុំខាន ។

ឯកឧត្តម បណ្ឌិតបន្ថែមថា នៅពេលគណបក្សប្រជាជនឈ្នះឆ្នោត សមិទ្ធផលជាច្រើននៅមូលដ្ឋាន​ភូមិឃុំរបស់​បងប្អូនប្រជាពលរដ្ឋ​ រួមមានហេថា​រចនាសម្ព័ន្ធផ្លូវថ្នល់​ ស្ពាន ប្រឡាយទឹក សាលារៀន មន្ទីរពេទ្យ វត្តអារ៉ាម ​ទឹកស្អាតនិងអគ្គីសនី ​ប្រើប្រាស់នឹងបន្តកើតមានឡើងកាន់តែច្រើនថែមទៀត ។

ជាមួយនេះ ​ឯកឧត្តមបណ្ឌិតប្រធានក្រុមការងារ ក៏បានអំពាវនាវដល់សមាជិកបក្ស​ឲ្យ​ផ្សព្វ​ផ្សាយឲ្យបានទូលំទូលាយ ​ពីគោលនយោបាយគណបក្សដល់ពលរដ្ឋ ​ឲ្យបានជ្រូតជ្រាប ជាពិសេស​គណបក្ស​ប្រជាជនកម្ពុជា​ ដែលមានសម្ដេចតេជោ ហ៊ុន សែន ជាមេដឹកនាំគឺជាអ្នកដែលបានដឹកនាំ​ការរំដោះរបស់ប្រជាពលរដ្ឋ ពីរបបខ្មែរក្រហម ​និងជាស្ថាបនិកសន្តិភាពជាអ្នកការពារសន្តិភាព និង​ជាអ្នកធ្វើឲ្យប្រទេសជាតិមានការរីកចម្រើនលើគ្រប់វិស័យ ម្យ៉ាងទៀតនៅពេលដែលគណបក្ស​ប្រជាជន​កម្ពុជាឈ្នះឆ្នោត​ នៅក្នុងការបោះឆ្នោតឃុំសង្កាត់ នឹងនាំឲ្យភូមិឃុំមានការអភិវឌ្ឍ​រីកចម្រើនថែមទៀត ៕ អត្ថបទ៖ គួច វិភាគ