កំពង់ស្ពឺ ៖ ឯកឧត្តម ហ៊ុន ម៉ានី អនុប្រធានទី១ ក្រុមការងារគណបក្ស ប្រជាជនកម្ពុជា ចុះជួយ ខេត្តកំពង់ស្ពឺ បានបញ្ជាក់ថា គណបក្សប្រជាជនកម្ពុជា មិនមែនស្រឡាញ់ប្រជាជនតាមរដូវកាលនោះទេ។

​ការថ្លែងរបស់ឯកឧត្តម ហ៊ុន ម៉ានី អនុប្រធានទី១ ក្រុមការងារគណបក្ស ប្រជាជនកម្ពុជា ចុះជួយ ខេត្តកំពង់ស្ពឺ យ៉ាងដូច្នេះ នាឱកាសបន្តចុះជួបសំណេះសំណាលជាមួយសមាជិក សមាជិកាគណបក្សប្រជាជនកម្ពុជា ក្នុងពេលយុទ្ធនាការឃោសនាបោះឆ្នោតថ្ងៃទី៥ ជ្រើសរើសក្រុមប្រឹក្សាឃុំ-សង្កាត់ អាណតិ្តទី៥ ឆ្នាំ២០២២ ក្នុងមូលដ្ឋានឃុំយាយម៉ៅពេជ្រនិល(សរុបប្រមាណ២៥០នាក់ មកពី៦ភូមិ) និងឃុំត្រែងត្រយឹង (សរុបប្រមាណ២៦០នាក់ មកពី៧ភូមិ) ស្រុកភ្នំស្រួច ខេត្តកំពង់ស្ពឺ នាព្រឹកថ្ងៃទី២៥ ខែឧសភា ឆ្នាំ២០២២នេះ ដោយមានការចូលរួមពីឯកឧត្តម សំ រិទ្ធី ប្រធានអនុ គណៈ កម្មការ ផ្នែកច្បាប់ និងនីតិវិធីនៃគណៈ បញ្ជាការ យុទ្ធនាការបោះឆ្នោត, ព្រមទាំង ប្រធានគណៈ កម្មា ធិការ គណបក្សស្រុកភ្នំស្រួច និងប្រធានគណៈ កម្មា ធិការ គណបក្សឃុំ សមាជិក សមាជិកា បក្ស ។

ឯកឧត្តម ហ៊ុន ម៉ានី បានសង្កត់ធ្ងន់ថា នៅក្នុងខេត្តកំពង់ស្ពឺនេះ មិនថារូបឯកឧត្តមផ្ទាល់ ឬក្រុមការងារចុះជួយ តែងតែមកនៅរួមរស់ជាមួយប្រជាពលរដ្ឋរហូតមកស្រាប់ទៅហើយ មិនមែនឃើញមុខតែក្នុងរដូវកាលបោះឆ្នោតនោះទេ។ ជារឿយៗប្រជាពលរដ្ឋតែងតែទទួលបានអំណោយផ្សេងៗ មិនថាជាសម្ភារៈបរិក្ខារបច្ចេកទេស ឬវត្ថុអនុស្សាវរីយ៍ ការចែករំលែកពេលមានគ្រោះអាសន្ននានា មិនថាពេលទឹកជំនន់ ខ្យល់កន្រ្តាក់ ក៏ដូចជាសមិទ្ធផលនានា ទូទាំងខេត្ត និងទូទាំងប្រទេសរហូតមកហើយ។ អនាគតក្រុមគ្រួសារ និងអ្នកជំនាន់ក្រោយរបស់យើង ត្រូវការគណបក្សប្រជាជនកម្ពុជា ដែលធ្វើពិតប្រាកដ ហើយមានបទពិសោធន៍ និងការអនុវត្តជាក់ស្តែង នោះគឺ គណបក្សប្រជាជនកម្ពុជា៕ អត្ថបទ ៖ រដ្ឋា