ពោធិសាត់៖ នាថ្ងៃទី២៤ ឧសភា ម្សិលមិញ ឯកឧត្តម រ៉ូហ្វី អូស្មាន និង ឯកឧត្តម សារី កោសល្យ តំណាងរាស្ត្រខេត្តពោធិ៍សាត់ បានជួបសំណេះសំណាលជាមួយ សមាជិក សមាជិកា សកម្មជន គណៈចលនាសាសនិកឥស្លាមរបស់គណបក្សប្រជាជនកម្ពុជា ក្នុងថ្ងៃយុទ្ធនាការឃោសនា បោះឆ្នោតជ្រើសរើសក្រុមប្រឹក្សា ឃុំ-សង្កាត់ អាណត្តិទី៥ ឆ្នាំ២០២២ នៅមន្ទីរគណបក្សស្រុកបាកាន ខេត្តពោធិ៍សាត់។

ឯកឧត្តម រ៉ូហ្វី ឧស្មាន់ បានលើកឡើងថា យុទ្ធនាការឃោសនាបោះឆ្នោត គឺជាឱកាសដ៏ប្រព្រៃសម្រាប់សកម្មជន និងឃោសនិកនៅតាមមូលដ្ឋាន ក្នុងការផ្សព្វផ្សាយ និងបញ្ជាក់ឱ្យកាន់តែច្បាស់អំពីសមិទ្ធផល ការប្តេជ្ញាចិត្ត និងទិសដៅការងារ ដែលត្រូវបន្តអនុវត្តស្របតាមកម្មវិធីនយោបាយរបស់គណបក្ស ដើម្បីឧត្តមប្រយោជន៍ជាតិ មាតុភូមិ និងប្រជាជនកម្ពុជា។

ជាមូលដ្ឋានសម្រាប់ការឃោសនាដល់ពលរដ្ឋផងនោះ ឯកឧត្តម បានលើកឡើងពីសមិទ្ធផលធំៗ ដែលរាជរដ្ឋាភិបាលដឹកនាំដោយគណបក្សប្រជាជនកម្ពុជា ខិតខំសម្រេចបាន ក្នុងនោះ ក៏បានផ្តល់ជូនសាសនិកឥស្លាម មានភាពស្មើមុខ ស្មើមាត់ ក្នុងសង្គមដែលបានធ្វើឱ្យប្រទេសជាតិមានការរីកចម្រើនឥតឈប់ឈរលើគ្រប់វិស័យគួរជាទីមោទនៈ ស្ថិតនៅក្រោមដំបូលសន្តិភាពពេញលេញទូទាំងប្រទេស។ 

ជាមួយគ្នានេះដែរ ឯកឧត្តម សារី កោសល្យ បានមានប្រសាសន៍បន្ថែមថា ប្រទេសកម្ពុជា ក្រោមការដឹកនាំរបស់សម្តេចតេជោនាយករដ្ឋមន្ត្រី បាននាំមកនូវការបង្រួបបង្រួមជាតិ ឯកភាពជាតិ បូរណភាពទឹកដី ដែលនេះ គឺជាសច្ចធម៌ប្រវត្តិសាស្ត្រ សម្រាប់ជាតិ និងប្រជាជនកម្ពុជា ដែលមិនធ្លាប់មានក្នុងរយៈពេលកន្លងមកនេះ។ 

តំណាងរាស្រ្តរូបនេះអះអាងថា បច្ចុប្បន្នប្រទេសជាតិកំពុងមានការរីកចម្រើនលើគ្រប់វិស័យ ដូច្នេះអ្វីដែលសមាជិករបស់ខ្លួនត្រូវចូលរួម ហើយប្រជាពលរដ្ឋត្រូវគាំទ្រនោះ គឺការចូលរួមថែរក្សាសុខសន្តិភាពទាំងអស់គ្នា តាមរយៈការនាំគ្នាទៅបោះឆ្នោតជូនគណបក្សរបស់ខ្លួន នាឱកាសបោះឆ្នោតជ្រើសរើសក្រុមប្រឹក្សា ឃុំ-សង្កាត់ អាណត្តិទី៥ នៅថ្ងៃទី៥ ខែមិថុនា ឆ្នាំ២០២២ នេះ។