​រុស្ស៊ី៖ លោក​ប្រធានាធិបតី Vladimir Putin បាន​ចុះហត្ថលេខា​លើ​ក្រឹត្យ​មួយ​ ដែល​ធ្វើ​ឲ្យ​កាន់តែ​ងាយ​ស្រួល​ដល់​ដំណើរការ​សម្រាប់​ប្រជាពលរដ្ឋ​នៅ​តំបន់ Kherson និង Zaporizhzhia របស់​អ៊ុយ​ក្រែ​នដែល​ត្រូវ​បាន​រុស្ស៊ី​គ្រប់គ្រង ដើម្បី​តម្រូវ​ឲ្យ​ពួកគេ​ទាំងនោះ​មាន​សញ្ជាតិ និង​លិខិតឆ្លងដែន​របស់​រុស្ស៊ី​។

​ក្រឹត្យ​នេះ​បង្កើត​ឲ្យ​មាន​ជំហាន​រីកចម្រើន​បន្ថែមទៀត ឆ្ពោះទៅរក​ការបង្រួបបង្រួម​រុស្ស៊ី​នៃ​តំបន់​ទាំង​២ ជាទី​ដែល​សង្គ្រាម​របស់​ក្រុង Moscow នៅ​ក្នុង​ប្រទេស​អ៊ុយ​ក្រែ​ន ​បាន​អនុញ្ញាត​ឲ្យ​មានការ​បង្កើត​ស្ពាន​ចម្លង​បន្ត​ត​ភ្ជាប់​ពី​ប្រទេស​រុស្ស៊ី​ ទៅកាន់​ឧបទ្វីប​គ្រី​មៀដែល​ខ្លួន​ដណ្តើម​បាន​ពី​អ៊ុយ​ក្រែ​ន​កាលពី​ឆ្នាំ2014។ ​ទីក្រុង Kyiv បាន​និយាយ​ថា ផែនការ​នេះ​គឺជា​ការរំលោភ​លើ​ច្បាប់​អន្តរជាតិ និង​បាន​ចោទ​ប្រកាន់​វិមាន​ក្រឹម​ឡាំង​ពី​ឥរិយាបថ​ឧក្រិដ្ឋកម្ម​។ ​ក្រសួងការបរទេស​អ៊ុយ​ក្រែ​នបាន​និយាយ​ក្នុង​សេចក្ដីថ្លែងការណ៍​កាលពី​ថ្ងៃ​ពុធ​ថា ​ការ​ចេញ​លិខិត​ឆ្លង​ដែន​ដោយ​ខុសច្បាប់​គឺជា​ការបំពាន​ដ៏​ធ្ងន់ធ្ងរ​លើ​អធិបតេយ្យភាព និង​សេចក្ដីថ្លៃថ្នូរ​របស់​អ៊ុយ​ក្រែ​ន ព្រមទាំង​បទដ្ឋាន និង​គោលការណ៍​នៃ​ច្បាប់​មនុស្សធម៌​អន្តរជាតិ​។​

​ចំណាត់​ការ​របស់​លោក Putin នឹង​ពង្រីក​ផែនការ​ដែល​មាន​សម្រាប់​អ្នក​រស់​នៅ​ តំបន់​ដែល​គ្រប់គ្រង​ដោយ​ក្រុម​បំបែក​ខ្លួន​គាំទ្រ​ដោយ​រុស្ស៊ី​នៅ​ក្នុង​តំបន់ Donetsk និង Luhansk របស់​អ៊ុយ​ក្រែ​ន ជាទី​ដែល​ទីក្រុង Moscow បាន​ចេញ​លិខិត​ឆ្លងដែន​ដល់​មនុស្ស​ប្រហែល 800,000នាក់​ចាប់​តាំង​ពី​ឆ្នាំ2019 មក​៕

អត្ថបទ៖ សុខមាន