វ៉ូវីណាម៖ ឯកឧត្ដម ម៉ុង គឹមហេង ប្រធានកិត្តិយសសហព័ន្ធកីឡាវ៉ូវីណាមកម្ពុជា ត្រូវបានសន្និបាតសហព័ន្ធកីឡាវ៉ូវីណាមអាស៊ីអាគ្នេយ៍ បោះឆ្នោតគាំទ្រធ្វើជាប្រធានសហព័ន្ធកីឡាវ៉ូវីណាមអាស៊ីអាគ្នេយ៍ និងជាអនុប្រធានសហព័ន្ធកីឡាវ៉ូវីណាមពិភពលោកនៅទីក្រុងហាណូយ ប្រទេសវៀតណាម។
ការទទួលបានសេចក្ដីទុកចិត្តធ្វើជាថ្នាក់ដឹកនាំសហព័ន្ធកីឡាវ៉ូវីណាមអាស៊ីអាគ្នេយ៍ និងពិភពលោកនេះ ស្របពេលឯកឧត្តម ម៉ុង គឹមហេង និងឯកឧត្តម អ៊ូ រតនា ប្រធានសហព័ន្ធកីឡាវ៉ូវីណាមកម្ពុជា បានដឹកនាំអត្តពលិកចូលរួមប្រកួតកីឡាស៊ីហ្គេមលើកទី៣១ នៅទីក្រុងហាណូយ ដែលទើបបញ្ចប់បេសសកកម្មរបស់ខ្លួននៅថ្ងៃទី២២ ខែឧសភា ឆ្នាំ២០២២។ ក្នុងនាមថ្នាក់ដឹកនាំ គ្រូបង្វឹក និងកីឡាករ-កីឡាការិនីទាំងអស់ ឯកឧត្តម អ៊ូ រតនា បានសម្ដែងការអបអរសាទរ ក្រោយឯកឧត្តម ម៉ុង គឹមហេង បានក្លាយជាប្រធានសហព័ន្ធកីឡាវ៉ូវីណាមអាស៊ីអាគ្នេយ៍ និងជាអនុប្រធានសហព័ន្ធពិភពលោក។ ឯកឧត្តមបានចាត់ទុកនេះគឺជារឿងមួយដ៏ល្អ ដែលមានថ្នាក់ដឹកនាំសហព័ន្ធអន្ដរជាតិគឺជាជនជាតិខ្មែរ ដើម្បីងាយស្រួលដល់ការងារអភិវឌ្ឍន៍ និងទំនាក់ទំនងផ្សេងៗ។
សូមរំលឹកថា ទន្ទឹមជាមួយការបោះឆ្នោតគាំទ្រប្រធានកិត្តិយសសហព័ន្ធកីឡាវ៉ូវីណាមកម្ពុជា ធ្វើជាប្រធានសហព័ន្ធកីឡាវ៉ូវីណាមអាស៊ីអាគ្នេយ៍ និងជាអនុប្រធានសហព័ន្ធពិភពលោកនៅទីក្រុងហាណូយ គេឃើញអត្តពលិកកីឡាវ៉ូវីណាមកម្ពុជាក៏បានសម្រេចលទ្ធផលដ៏ល្អប្រសើរ ក្នុងការប្រកួតស៊ីហ្គេមផងដែរក្រោយដណ្ដើមបានមេដាយសរុប ១៤គ្រឿង រួមមានមេដាយមាស ៣, ប្រាក់ ២ និងសំរឹទ្ធ ៩គ្រឿង៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
