កោះកុង៖ ក្រុមការងារគណបក្សប្រជាជនកម្ពុជាឃុំឬស្សីជ្រុំ កំពុងបង្កើនការពន្យល់បង្រៀនប្រជាពលរដ្ឋមូលដ្ឋាន អំពីការគូសសន្លឹកឆ្នោតឱ្យបានត្រឹមត្រូវ និងកាលបរិច្ឆេទថ្ងៃបោះឆ្នោត។

លោក ផង់ សុផាន់ណា ប្រធានគណបក្សប្រជាជនកម្ពុជាឃុំឬស្សីជ្រុំ នៅព្រឹកថ្ងៃទី២៦ ខែឧសភា ឆ្នាំ២០២២នេះ បានឱ្យដឹងថា ក្រោមការណែនាំបន្ថែមពីលោក អន សុធារិទ្ធ ប្រធានគណបក្ស​ប្រជាជន​កម្ពុជា​ស្រុកថ្មបាំង ​គឺ​លោក​បានដឹកនាំ​ក្រុមការងារគណបក្ស​ចុះ​សំណេះសំណាល និង​បង្រៀនប្រជាពលរដ្ឋភូមិគគីរជ្រុំ និងភូមិត្រពាំងឈើត្រាវ ​ដើម្បីយល់​ដឹង​អំពី​ការ​គូស​សន្លឹកឆ្នោត​ឱ្យ​បានត្រឹមត្រូវល្អ។

លោក បានថ្លែងថា ៦ថ្ងៃមកនេះ ក្រុមការងារគណបក្សប្រជាជនកម្ពុជាឃុំឬស្សីជ្រុំ ចុះផ្សព្វផ្សាយ​ពីខ្លឹមសារសំខាន់ៗគោលនយោបាយ អំពីការគូសសន្លឹកឆ្នោត ការ​ណែនាំ​ពលរដ្ឋ​ទៅ​ធ្វើ​ឯកសារ​បញ្ជាក់​អត្តសញ្ញាណ​សម្រាប់​បំរើ​លើការបោះឆ្នោត ​ករណី​អត្តសញ្ញាណប័ណ្ណ​ហួសសុពលភាព ​ខូច ឬបាត់​ប្រការណាមួយ។ ​ជា​ពិសេស​គឺថ្ងៃ​កាលបរិច្ឆេទ​ទៅបោះឆ្នោត ​ថ្ងៃទី៥ ខែមិថុនា ឆ្នាំ២០២២។

បើតាមលោក ផង់ សុផាន់ណា ប្រជាពលរដ្ឋប្រមាណ ៥៣ខ្នងបានយល់​ដឹងច្បាស់លាស់​ពី​ខ្លឹមសារ​របស់​គោលនយោបាយគណបក្សប្រជាជនកម្ពុជា​ អត្តសញ្ញាណប័ណ្ណ​មានគ្រប់គ្រាន់ រី​ឯពលរដ្ឋ​តិចតួច​ប៉ុណ្ណោះដែលខូច​ ឬបាត់​អត្តសញ្ញាណ ​ដោយ​ក្រុមការ​ងារ​ក៏ជំរុញដល់ពួកគាត់​សូមប្រញាប់​ទៅ​ឯកសារបញ្ជាក់​អត្តសញ្ញាណបម្រើឱ្យការបោះឆ្នោត​ទាន់ពេលវេលាត្រឹមថ្ងៃ៣ ​ខែមិថុនា ខាងមុខ នៅអនុវិទ្យាល័យ ​និងវិទ្យាល័យឬស្សីជ្រុំ៕