ភ្នំពេញ៖ ក្រសួងទេសចរណ៍ផ្សព្វផ្សាយពីនីតិវិធី និងលក្ខខណ្ឌកម្ចីក្នុងគម្រោងសហហិរញ្ញប្បទាន សម្រាប់ការស្តារ និងជម្រុញកំណើនក្នុងវិស័យទេសចរណ៍ ដើម្បីជួយ​ឱ្យ​សហគ្រាស​ដែលរងការ​ប៉ះពាល់ អាចស្តារ, ងើបឡើង និងពង្រឹងភាពប្រកួតប្រជែងអាជីវកម្មរបស់ខ្លួនឡើងវិញ។

នៅថ្ងៃទី២៦ ខែឧសភា ឆ្នាំ ២០២២នេះ ក្រសួងទេសចរណ៍ផ្សព្វផ្សាយនីតិវិធី និងលក្ខខណ្ឌ​កម្ចី​ក្នុង​គម្រោងសហហិរញ្ញប្បទានស្តារ​ និង​ជម្រុញកំណើនក្នុងវិស័យទេសចរណ៍ ដែលជាវិធានការចាំបាច់ ដើម្បីជួយឱ្យសហគ្រាសរងផលប៉ះពាល់ អាចស្តារ, ងើប និងពង្រឹងភាពប្រកួតប្រជែង​របស់ខ្លួន​ឡើងវិញ ​ព្រមទាំងចូលរួមជាមួយរាជរដ្ឋាភិបាល ក្នុងការកែច្នៃវិស័យទេសចរណ៍ ប្រកបដោយ​ភាព​ទាក់ទាញកាន់តែខ្លាំងជាងមុន និងជាពិសេសប្រែក្លាយកម្ពុជាឱ្យទៅជាទិសដៅទេសចរណ៍​ចម្បងមួយនៅក្នុងតំបន់ និងសកលលោក។

រាជរដ្ឋាភិបាល បានសម្រេចទម្លាក់កញ្ចប់ថវិកា ១៥០ លានដុល្លារ ដែលជាបដិភាគរវាង​រាជរដ្ឋា​ភិបាល និងគ្រឹះស្ថានហិរញ្ញវត្ថុចូលរួម ដើម្បីគាំទ្រដំណើរការអាជីវកម្មឡើងវិញ, ការកែលម្អ និងធ្វើទំនើបកម្មសេវាកម្ម,ការពង្រីកខ្លួន និងធ្វើពិពិធកម្មសេវាទេសចរណ៍ ដើម្បីត្រៀមទទួលភ្ញៀវ​ទេសចរ បន្ទាប់ពីវិបត្តិនៃជំងឺកូវីដ-១៩ ថមថយទូទាំងសកលលោក។

ជុំវិញការផ្តល់ហិរញ្ញប្បទាននេះ, ឯកឧត្តមបណ្ឌិត តាន់ មុនីវណ្ណ អនុប្រធានសភាពាណិជ្ជកម្មកម្ពុជា លើកឡើងថា ​រាជរដ្ឋាភិបាល ដែលមានក្រសួងសេដ្ឋកិច្ច និងហិរញ្ញវត្ថុជាសេនាធិការ បានខិតខំ​ប្រឹងប្រែង​យកចិត្តទុកដាក់យ៉ាងខ្លាំង​ ក្នុងការចូលរួមដោះបន្ទុក ដើម្បីជួយជ្រោមជ្រែងដល់វិស័យ​ដែល​រងប៉ះពាល់ខ្លាំង ​អាចដំណើរអាជីវកម្មឡើងវិញ ជាក់ស្តែងការផ្តល់កញ្ចប់សហហិរញ្ញប្បទាន​សម្រាប់ស្តារវិស័យទេសចរណ៍នេះជាដើម។

សូមបញ្ជាក់ថា៖ នៅក្នុងវិបត្តិនៃជម្ងឺកូវីដ១៩ នេះ រាជរដ្ឋាភិបាលបានដាក់ចេញនូវវិធានការ​ជាច្រើន​នៅក្នុងវិស័យទេសចរណ៍ដូចជា៖ ​ការបើកប្រាក់ឧបត្ថម្ភជូនកម្មករ-និយោជិត ក្នុងវិស័យទេសចរណ៍ ដែលត្រូវបានព្យួរការងារដោយសារវិបត្តិនៃជំងឺកូវីដ-១៩ ​ដោយម្នាក់ៗទទួលប្រាក់ឧបត្ថម្ភ ៤០ ដុល្លារអាម៉េរិក ក្នុងមួយខែពីរាជរដ្ឋាភិបាល, ​ការមិនយកកម្រៃសេវាលើការផ្តល់អាជ្ញាប័ណ្ណ និង​លិខិត​អនុញ្ញាត​ពាក់ព័ន្ធ​ការសុំបើកឡើងវិញដូចជា ​ប៉ាតង់សណ្ឋាគារ និងភោជនីយដ្ឋានជាដើម, ការអភិវឌ្ឍ​ហេដ្ឋារចនាសម្ព័ន្ធនៅតាមតំបន់ទេសចរណ៍ដែលមានស្រាប់​ ឬ ទើបបង្កើតថ្មី, ការ​ផ្តល់ការ​បណ្តុះបណ្តាលជំនាញថ្មីដល់កម្មករ-និយោជិតដែលបាត់បង់ការងារ, ការអនុវត្តកម្មវិធី​សហហិរញ្ញប្បទាន, និង ​ការជំរុញទីផ្សារទេសចរណ៍ ​តាមរយៈយុទ្ធនាការផ្សព្វផ្សាយ សំដៅ​បង្កើនទំនុកចិត្តលើកម្ពុជា ជាគោលដៅសុវត្ថិភាព, និងការអភិវឌ្ឍផលិតផលទេសចរណ៍ និងហេដ្ឋា​រចនាសម្ព័ន្ធរូបវន្តថ្មីៗជដើម៕អត្ថបទ៖ សុន រ៉ាឌី