ភ្នំពេញ៖ នៅថ្ងៃទី២៦ ខែឧសភា ឆ្នាំ២០២២នេះ ឯកឧត្តមឧបនាយករដ្ឋមន្ត្រី ប្រាក់ សុខុន រដ្ឋមន្ត្រីក្រសួងការបរទេស និងកិច្ចសហប្រតិបត្តិការអន្តរជាតិ និងតំណាងរដ្ឋាភិបាលបនៃបណ្តាប្រទេសនានា បានអញ្ជើញ​គោរពវិញ្ញាណក្ខន្ធ កងកម្លាំងរក្សា​សន្តិភាព​ដែលបានពលីជីវិត ក្នុងបុព្វហេតុបំពេញបេសកកម្មថែរក្សាសន្តិភាពពិភពលោក នៅ​សាលាហ្វឹកហ្វឺនពហុសាសន៍ ACO ខេត្តកំពង់ស្ពឺ ដើម្បីប្រារព្ធទិវាអន្តរជាតិ នៃអ្នកថែរក្សាសន្តិភាពអង្គការសហប្រជាជាតិ​ ។

ឯកឧត្តម ឧបនាយករដ្ឋមន្ត្រី ប្រាក់ សុខុន ក្នុងនាមជាប្រធានគណៈកម្មាធិការជាតិ​សម្របសម្រួលការ​បញ្ជូន​កម្លាំងរក្សាសន្តិភាព បានថ្លែងថា ​ពិធីគោរពវិញ្ញាណក្ខន្ធ កងកម្លាំងរក្សាសន្តិភាពពិភពលោកនេះ បានធ្វើឡើងស្របពេលបណ្តាប្រទេសនានា​ ដែលបានបញ្ជូនកម្លាំងរបស់ខ្លួនចូលរួមថែរក្សាសន្តិភាពលើពិភពលោក ​នាំគ្នាប្រារព្ធទិវាអន្តរជាតិ នៃអ្នកថែរក្សាសន្តិភាពអង្គការសហប្រជាជាតិ ២៩ឧសភា លើកទី៧៤ ដើម្បីរំលឹកដល់ការចូលរួម​ពី​គ្រប់កងកម្លាំងយោធា នគរបាល ​និងបុគ្គលិកស៊ីវិលទាំងបុរស និងនារី ក្នុងប្រតិបត្តិការថែរក្សា​សន្តិភាព ហើយក៏ជាថ្ងៃប្រារព្វពិធីគោរពវិញ្ញាណក្ខន្ធ វីរយុទ្ធជន យុទ្ធនារី ដែលបានពលី​ក្នុងបុព្វហេតុចូលរួមស្វែងរកសន្តិភាពនៅតាមប្រទេសមានជំលោះសង្គ្រាមតាំងពីឆ្នាំ១៩៤៨ រហូតមកដល់បច្ចុប្បន្ន។

លោកជំទាវ Pauline Tamesis អ្នកសម្របសម្រួលអង្គការសហប្រជាជាតិប្រចាំនៅកម្ពុជា ថ្លែងថា ចាប់​តាំងពីឆ្នាំ១៩៤៨ រហូតមកដល់បច្ចុប្បន្ន មានអ្នកថែរក្សាសន្តិភាពជាបុរស និងស្ត្រី ជាង ១លាននាក់ ចូលរួមប្រតិបត្តិថែរក្សាសន្តិភាពពិភពលោក ​ក្រោមឆ័ត្រអង្គការសហប្រជាជាតិ ក្នុងនោះ មានយុទ្ធជន យុទ្ធនារីថែរក្សាសន្តិភាពប្រមាណ ៤២០០នាក់ បានពលីជីវិតក្នុងបុព្វហេតុ​រក្សា​សន្តិភាពនេះ ហើយអ្នកពលីជីវិតទាំងនោះ ​មានកម្លាំងរក្សាសន្តិភាពកម្ពុជា​ ចំនួន១០ នាក់ផងដែរ។

នាយឧត្តមសេនីយ៍ សែម សុវណ្ណនី អគ្គនាយកមជ្ឈមណ្ឌលជាតិរក្សាសន្តិភាពថ្លែងថា ក្នុង​រយៈពេល១៦ឆ្នាំមកនេះ កម្ពុជា​បានបញ្ជូនអ្នកថែរក្សាសន្តិភាពក្រោមឆ័ត្ររបស់​អង្គការ​សហប្រជាជាតិ ជាង៨០០០នាក់ ទៅបំពេញបេសកកម្មរក្សាសន្តិភាពចំនួនចំនួន ៩ប្រទេស ខណៈ នៅក្នុងឆ្នាំ២០២២នេះ កម្ពុជា ​មានកម្លាំងមួកខៀវចំនួនជិត ៨០០នាក់ កំពុងឈរជើងបំពេញ​បេសកកម្ម​ថែរក្សាសន្តិភាពUN ​នៅតាមបណ្តាប្រទេសចំនួន៤ រួមមាន៖ ប្រទេសស៊ូដង់ខាងត្បូង លីបង់​ អាហ្វ្រឹកកណ្តាល និងប្រទេសម៉ាលី៕អត្ថបទ ស៊ុម សុខជា