​​អ៊ុយ​ក្រែ​ន​៖ រដ្ឋមន្ត្រីការបរទេស​អ៊ុយ​ក្រែ​ន​លោក Dmytro Kuleba បាន​និយាយ​កាលពី​ថ្ងៃ​ពុធ​ថា ប្រទេស​របស់​លោក​គ្មាន​បុ​រេ​លក្ខខណ្ឌ​ដើម្បី​ចាប់ផ្តើម​ឡើងវិញ​ការចរចា​ជាមួយ​រុស្ស៊ី​នោះទេ​។

​

​លោក Kuleba បាន​និយាយ​នៅក្នុង​សន្និសីទ​សារព័ត៌មាន​ នៅ​ក្រៅ​វេទិកា​សេដ្ឋកិច្ច​ពិភព​លោក​ក្នុង​ទីក្រុង Davos ថា ប្រសិនបើ​រុស្ស៊ី​មើល​ឃើញ​ការចរចា​ ដូចដែល​ខ្លួន​បាន​ធ្វើ​នៅ​ក្នុង​ខែ​ដំបូង​នៃ​សង្គ្រាមដោយ​ដាក់​ឯកសារ​នៅ​លើ​តុ ហើយ​និយាយ​ថា​ ទទួលយក ឬ​ទុកចោល ដែល​ទាំងនេះ​មិនមែន​ជា​ការចរចា​នោះ​ទេ​។ លោក​និយាយ​ថា នេះ​មិន​មែន​ជា​ផ្នែក​ការទូត​ទេ នេះ​គឺជា​ការ​គំរាម ហើយ​គឺជា​អ្វី​ដែល​យើង​នឹង​មិន​ទទួលយក​។ លោក Kuleba បាន​លើក​ឡើង​ថា ការ​វាយ​លុក​របស់​រុស្ស៊ី​ដែល​នៅ​តែ​បន្ត​នៅ​តំបន់ Donbas និង​ក្រឹត្យ​របស់​ប្រធានាធិបតី​រុស្ស៊ីលោក Vladimir Putin ស្តីពី​ការ​សម្រប​សម្រួល​ការផ្តល់លិខិតឆ្លងដែន​រុស្ស៊ី​ ដល់​ពលរដ្ឋ​អ៊ុយ​ក្រែ​ន​នៅ​ក្នុង​ទីក្រុង Kherson និង Zaporizhzhia ដែលគ្រប់គ្រង​ដោយ​រុស្ស៊ី​បង្ហាញ​ថា វិមាន​ក្រឹម​ឡាំង​គ្មាន​ឆន្ទៈ​ក្នុង​ការចរចា​នោះ​ទេ​។

​ប្រមុខ​ការទូត​របស់​អ៊ុយ​ក្រែ​ន​រូប​នេះ​និយាយ​ថា លោក​កំពុង​ពិភាក្សាអំពី​បញ្ហា​ជាច្រើន​រួមទាំង​កញ្ចប់ទណ្ឌកម្ម​ទី​៦​ នៅ​ក្រៅ​វេទិកា​ដោយ​និយាយ​ថា​ វា​ធ្វើឱ្យ​លោក​ព្រួយបារម្ភ​ជាង​ការផ្តល់​អាវុធ​ធុន​ធ្ងន់​ មក​ឱ្យ​អ៊ុយ​ក្រែ​ន​ទៅទៀត​។ លោក Kuleba មានការ​សង្ស័យ​ចំពោះ​លទ្ធភាព​ក្នុង​ការរៀបចំការ​ឆ្លង​កាត់​ដោយ​សុវត្ថិភាព នៃ​នាវា​ពាណិជ្ជកម្ម​ជាមួយ​គ្រាប់​ធញ្ញជាតិ​អ៊ុយ​ក្រែ​ន​ពី​កំពង់ផែ​សមុទ្រ​ខ្មៅ​ទីក្រុង Odesa ដោយ​និយាយ​ថា វា​ពិបាក​ជឿ​ទុក​ចិត្ត​លើ​រុស្ស៊ី ខណៈ​អ៊ុយ​ក្រែ​ន​កំពុង​ធ្វើការ​យ៉ាង​ជិតស្និទ្ធ​ជាមួយ​អង្គការសហប្រជាជាតិ ដើម្បី​ដោះស្រាយ​បញ្ហា​នេះ​៕

អត្ថបទ៖ ប៊ុនថន