ភ្នំពេញ៖ ទីភ្នាក់ងារសហប្រតិបត្តិការអន្តរជាតិកូរ៉េ (កយកា-KOICA) សហការជាមួយ វិទ្យាស្ថានស្រាវជ្រាវអាស៊ីនៃសាកលវិទ្យាល័យកូរ៉េ និង វិទ្យាស្ថានជាតិការទូត និងទំនាក់ទំនងអន្តរជាតិ (NIDIR) បានបើកកិច្ចប្រជុំតាមរយៈប្រព័ន្ធវីដេអូពីចម្ងាយ(Zoom Meeting) នៅថ្ងៃទី២៦ ខែឧសភា ឆ្នាំ ២០២២ ។

ភាគីទីភ្នាក់ងារសហប្រតិបត្តិការអន្តរជាតិកូរ៉េ (កយកា-KOICA) ដឹកនាំដោយ លោក នោ ហ្យន់ជូន (Rho Hyunjun) ប្រធានតំណាងទីភ្នាក់ងារសហប្រតិបត្តិការអន្តរជាតិកូរ៉េ(កយកា-KOICA)ប្រចំាប្រទេសកម្ពុជា ចំណែកភាគីវិទ្យាស្ថានជាតិការទូត និងទំនាក់ទំនងអន្តរជាតិ ដឹកនាំដោយ ឯកឧត្តម ទាន សំណាង ប្រធានវិទ្យាស្ថានជាតិការទូត និងទំនាក់ទំនងអន្តរជាតិ ។

នៅក្នុងជំនួបនោះ ភាគីទាំងពីរបានពិភាក្សាអំពីផែនការសម្រាប់កម្មវិធីបណ្តុះបណ្តាលស្តីពី កម្មវិធីអភិវឌ្ឍន៍សមត្ថភាពសម្រាប់គ្រូបង្គោល របស់វិទ្យាស្ថានជាតិការទូត និងទំនាក់ទំនងអន្តរជាតិ សម្រាប់រយៈពេលបីឆ្នាំ ចាប់ពីឆ្នាំ២០២២ ដល់ឆ្នាំ២០២៤។

វិទ្យាស្ថានស្រាវជ្រាវអាស៊ីនៃសាកលវិទ្យាល័យកូរ៉េ បានបង្ហាញផែនការសម្រាប់វគ្គបណ្ដុះបណ្ដាល និងបានស្នើឱ្យរៀបចំវគ្គបណ្តុះបណ្តាលលម្អិតមួយ ដោយផ្លាស់ប្តូរយោបល់ពីគ្រប់ភាគី។

ក្នុងឱកាសនោះ លោក នោ ហ្យន់ជូន (Rho Hyunjun) បានមានប្រសាសន៍ថា ចាប់តាំងពីមានការ​រីករាលដាល​នៃជំងឺកូវីដ-១៩ វគ្គបណ្តុះបណ្តាលទាំងអស់របស់កយកា-KOICA ត្រូវបានប្តូរទៅវគ្គ​បណ្តុះបណ្តាលតាមរយៈប្រព័ន្ធវីដេអូពីចម្ងាយ(អនឡាញ) ហើយទោះបីជាការគំរាមកំហែង​ពីជំងឺ​កូវីដ-១៩ បានថយចុះក៏ដោយ ក៏កយកា-KOICA មានគម្រោងរៀបចំវគ្គបណ្តុះបណ្តាលរបស់​យើងទាំងអស់តាមរយៈប្រព័ន្ធវីដេអូពីចម្ងាយ(អនឡាញ) រួមទាំងឆ្នាំនេះផងដែរ”។

លោកបានគូសបញ្ជាក់យ៉ាងដូច្នេះថា ជាសំណាងល្អ បន្ទាប់ពីបានពិគ្រោះយោបល់​ជាមួយ​ទីស្នាក់ការ​កណ្តាលកយកា- (KOICA Headquarters) យើងបានធ្វើការផ្លាស់ប្តូរផែនការរបស់យើង និង​ចាប់ផ្តើម​វគ្គសិក្សាថ្មី ដោយការសិក្សាដោយផ្ទាល់វិញ ដែលជាវគ្គបណ្តុះបណ្តាលផ្អែកលើការ​អញ្ជើញ​ទៅសិក្សានៅសាធារណរដ្ឋកូរ៉េដោយផ្ទាល់។

ជាចុងក្រោយ ឯកឧត្តម ទាន សំណាង បានថ្លែងអំណរគុណដល់ កយកា-KOICA ដែលបានផ្តល់វគ្គបណ្តុះបណ្តាល នេះដល់គ្រូបង្គោល របស់វិទ្យាស្ថានជាតិការទូត និងទំនាក់ទំនងអន្តរជាតិ។

ឯកឧត្តម ក៏បានទទួលស្គាល់ និងផ្តល់ការយល់ស្របទៅលើគំនិតផ្តួចផ្តើម ដែលបានស្នើឡើងពី​ខាងភាគីកូរ៉េ៕អត្ថបទ៖ រដ្ឋា