បាល់ទះ៖ ឯកឧត្តមនាយឧត្តមសេនីយ៍សន្តិបណ្ឌិត នេត សាវឿន អគ្គស្នងការនគរបាលជាតិ និងជាប្រធានសហព័ន្ធកីឡាបាល់ទះកម្ពុជា បានជំរុញក្រុមមន្ដ្រីបច្ចេកទេសសហព័ន្ធត្រូវបង្កើនការយកចិត្តទុកដាក់ និងពង្រឹងការអភិវឌ្ឍក្រុមបាល់ទះក្នុងសាលបុរសជម្រើសជាតិកម្ពុជា ហើយត្រូវពន្លឿនការបង្កើតក្រុមបាល់ទះនារីជម្រើសជាតិ ដើម្បីត្រៀមទទួលរៀបចំការប្រកួតកីឡាស៊ីហ្គេមឆ្នាំ២០២៣ នៅកម្ពុជា។
ការលើកឡើងនេះក្នុងឱកាសឯកឧត្តមនាយឧត្តមសេនីយ៍សន្តិបណ្ឌិត បានអញ្ជើញជួបសំណេះសំណាល និងលើកទឹកចិត្តដល់ក្រុមបាល់ទះក្នុងសាលកម្ពុជាកាលពីថ្ងៃទី២៦ ខែឧសភា ឆ្នាំ២០២២ បន្ទាប់ពីក្រុមបាល់ទះក្នុងសាលផ្នែកបុរសរបស់កម្ពុជាបានបង្កើតប្រវត្តិសាស្ដ្រជូនជាតិ ដោយដណ្ដើមបានមេដាយសំរឹទ្ធលើកដំបូងនៅក្នុងការប្រកួតកីឡាស៊ីហ្គេមលើកទី៣១ នៅទីក្រុងហាណូយកាលពីថ្មីៗ។ ប្រមុខសហព័ន្ធដដែលបានសម្តែងនូវក្តីរីករាយជាខ្លាំង ដែលក្រុមបាល់ទះកម្ពុជាដណ្តើមបានមេដាយជាប្រវត្តិដំបូងជូនជាតិ។ ក្នុងនាមប្រធានសហព័ន្ធ ពិសេសក្នុងនាមរាជរដ្ឋាភិបាល និងក្នុងនាមប្រជាពលរដ្ឋខ្មែរឯកឧត្តមបានកោតសរសើរ និងវាយតម្លៃខ្ពស់ចំពោះការខិតខំប្រឹងប្រែងមួយនេះ ហើយឯកឧត្តមសន្តិបណ្ឌិតមានប្រសាសន៍ថា នេះគឺជាជោគជ័យដ៏ធំមួយ និងជាជំហានទី១ ក្នុងប្រវត្តិសាស្ត្រចូលរួមប្រកួតកីឡាស៊ីហ្គេមនាពេលកន្លងមក។
ទន្ទឹមជាមួយការលើកទឹកចិត្តនេះដែរ ឯកឧត្តមបានជំរុញឲ្យក្រុមជំនាញបច្ចេកទេសសហព័ន្ធ ត្រូវពង្រឹងក្រុមបាល់ទះបុរសកម្ពុជានេះឲ្យកាន់តែប្រសើរថែមទៀត សម្រាប់សម្រួចគោលដៅដណ្ដើមមេដាយកាន់តែខ្ពស់ ក្នុងនាមម្ចាស់ផ្ទះការប្រកួតកីឡាស៊ីហ្គេមលើកទី៣២ នៅកម្ពុជានាឆ្នាំ២០២៣ ខាងមុខ។ អ្វីដែលពិសេស ឯកឧត្តមប្រធានសហព័ន្ធ បានជំរុញឲ្យរៀបចំបង្កើតក្រុមបាល់ទះនារីឲ្យបានភ្លាមៗ និងទាន់ពេលវេលាសម្រាប់ត្រៀមទទួលរៀបចំការប្រកួតកីឡាស៊ីហ្គេមឆ្នាំ២០២៣ ផងដែរ ដោយក្នុងនាមសហព័ន្ធ ឯកឧត្តមបានសន្យានឹងផ្ដល់នូវការគាំទ្រគ្រប់បែបយ៉ាងទាំងអស់ ដើម្បីរួមគ្នារៀបចំឲ្យបានក្រុមបាល់ទះនារីមួយដែលមានគុណភាព សម្រាប់ការប្រកួតប្រជែងជាមួយបណ្ដាប្រទេសក្នុងតំបន់។ រីឯផ្នែកហេដ្ឋារចនាសម្ព័ន្ធក៏ត្រូវជំរុញការរៀបចំឲ្យបានទាន់ពេលផងដែរ។ សូមបញ្ជាក់ថា ក្រុមបាល់ទះកម្ពុជាបានបង្កការភ្ញាក់ផ្អើល ក្រោយដណ្ដើមបានមេដាយសំរឹទ្ធលើកដំបូងក្នុងព្រឹត្តិការណ៍ស៊ីហ្គេមលើកទី៣១ នៅទីក្រុងហាណូយ បន្ទាប់ពីយកឈ្នះក្រុមម្ចាស់មេដាយមាសស៊ីហ្គេម ៨ជំនាន់គឺក្រុមបាល់ទះថៃដោយលទ្ធផល ៣-២សិតក្នុងវគ្គដណ្ដើមលេខ៣ និងលេខ៤ នៃព្រឹត្តិការណ៍កីឡាប្រចាំតំបន់ ២ឆ្នាំម្ដងនេះ៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
