​សហរដ្ឋអាមេរិក៖ មន្ត្រី​អនុវត្ត​ច្បាប់​នៅ​រដ្ឋ​តិច​សាស់​និយាយថា ខ្មាន់កាំភ្លើង​អាយុ 18ឆ្នាំ​ដែល​បាន​បាញ់សម្លាប់​មនុស្ស 21នាក់​នៅ​សាលាបឋមសិក្សា​មួយកន្លែង​ បាន​ចូលទៅក្នុង​អគារ​សាលារៀន​ដោយ​គ្មាន​ការរារាំង តាម​ច្រកទ្វារ​ដែល​ទំនងជា​មិនត្រូវ​បាន​ចាក់សោ​។

​លោក Victor Escalon នាយក​ប្រចាំ​តំបន់​នៅ​ក្រសួង​សុវត្ថិភាព​សាធារណៈរដ្ឋ​តិច​សាស់ បាននិយាយ​កាលពី​ថ្ងៃ​ព្រហស្បតិ៍​ថា Salvador Ramos មិនបាន​ជួបប្រទះ​ជាមួយ​មន្ត្រីអនុវត្ត​ច្បាប់ណា​ម្នាក់​ឡើយ​ នៅពេល​ខ្មាន់កាំភ្លើង​រូបនេះ​ចូល​សាលាបឋមសិក្សា Robb កាលពី​ថ្ងៃ​អង្គារ ហើយ​បានបាញ់សម្លាប់​កុមារ 19នាក់ និង​គ្រូបង្រៀន​ពីរ​នាក់​។​ ​ប៉ុន្តែ​ព័ត៌មាន​លម្អិត​ជាច្រើន​ទៀត​អំពី​ពេលវេលា​នៃ​ហេតុការណ៍ និង​ការឆ្លើយតប​របស់នគរបាលនៅតែ​មិនទាន់​ច្បាស់​នៅឡើយ​។

​វា​ជាការ​សម្លាប់​រង្គាល​ដែល​ការបាញ់ប្រហារ​កើតឡើង​នៅ​សាលារៀន​ ជា​សកម្មភាព​ដ៏​ឃោរ​ឃៅ​បំផុតរបស់​រដ្ឋ​នេះចាប់តាំងពី​ការវាយប្រហារ​សម្លាប់​កុមារ 20នាក់ និង​មនុស្សពេញវ័យ 6នាក់​នៅសាលាបឋមសិក្សា Sandy Hook ទីក្រុង Newtown រដ្ឋ Connecticut កាលពី​ 10ឆ្នាំមុន ហើយ​វាជាការ​វាយប្រហារ​ដែល​បាន​កើតឡើង​ត្រឹម​តែង​ជាង 10ថ្ងៃ បន្ទាប់ពី​ខ្មាន់កាំភ្លើង​ម្នាក់​ពាក់អាវ​ក្រោះការពារ​ខ្លួន​បានសម្លាប់​អ្នកដើរ​ទិញ​ទំនិញ និងបុគ្គលិកជនជាតិ​ស្បែក​ខ្មៅ 10នាក់​នៅ​ផ្សារ​ទំនើប Buffalo ទីក្រុង​ញូវយ៉ក ជា​អ្វីដែល​អាជ្ញាធរនិយាយថា ​ជាការវាយប្រហារ​រើសអើង​ពូជសាសន៍​៕

អត្ថបទ៖ ប៊ុនថន