ភ្នំពេញ៖ ធនាគារ អេស៊ីលីដា ភីអិលស៊ី នៅថ្ងៃទី២៧ ឧសភា ឆ្នាំ២០២២នេះ បានចុះកិច្ចព្រមព្រៀងឥណទានជាមួយទីភ្នាក់ងារសហប្រតិបត្តិការអន្តរជាតិជប៉ុន (JICA) និងធនាគារ SMBC ដើម្បីទទួលបានសហហិរញ្ញប្បទានចំនួន ១៣៥លានដុល្លារអាមេរិក សម្រាប់ផ្តល់កម្ចីដល់វិស័យកសិកម្មក្នុងប្រទេសកម្ពុជា។   

លោកបណ្ឌិត អ៊ិន ចាន់នី ប្រធាននាយកប្រតិបត្តិ ធនាគារ អេស៊ីលីដា ភីអិលស៊ី នៅក្នុងសេចក្តីប្រកាសព័ត៌មាន បានលើកឡើងថា បណ្តាញប្រតិបត្តិការដ៏សម្បូរបែប ផ្តល់ភាពងាយស្រួលជូនដល់ប្រជាជនកម្ពុជាគ្រប់មជ្ឈដ្ឋានក្នុងសហគមន៍ ជាពិសេសអ្នកដែលរស់នៅជនបទអាចប្រើប្រាស់សេវាកម្មហិរញ្ញវត្ថុគ្រប់ប្រភេទរបស់ធនាគារ រួមទាំងសេវាកម្មឥណទាន ដែលមានគោលដៅសម្រាប់ពង្រឹង និងពង្រីកវិស័យកសិកម្មនៅតាមជនបទ។ 

លោកបានបន្តថា តាមរយៈការផ្តល់សហហិរញ្ញប្បទានខាងលើនេះ នឹងជួយលើកស្ទួយដល់ផលិតកម្មកសិកម្ម និងការអភិវឌ្ឍសេដ្ឋកិច្ចសង្គម។

លោកបណ្ឌិត បានបញ្ជាក់ទៀតថា គម្រោងសហហិរញ្ញប្បទានរយៈពេលវែង ដែលទទួលបានពីទីភ្នាក់ងារសហប្រតិបត្តិការអន្តរជាតិជប៉ុន និងធនាគារ SMBC ពិតជាមានសារៈសំខាន់យ៉ាងខ្លាំងសម្រាប់ អេស៊ីលីដា ក្នុងការផ្តល់កម្ចីដល់សហគ្រាសខ្នាតតូចបំផុត ខ្នាតតូច និងខ្នាតមធ្យម ដែលមានតម្រូវការឥណទានក្នុងការចាប់ផ្តើម និង/ឬការពង្រីកផលិតកម្មកសិកម្ម ដើម្បីបង្កើនប្រាក់ចំណូល៕ អត្ថបទ៖ ឈិត បូរ៉ាវី