ភ្នំពេញ៖ រាជរដ្ឋាភិបាលកម្ពុជា បានសម្រេចកាត់ដីតំបន់៣ បញ្ចូលមកតំបន់២ នៃបឹងទន្លេសាបស្ថិតក្នុងភូមិសាស្ត្រខេត្តពោធិ៍សាត់ ចំនួនជាង ៣ ៤០០ហិកតា ប្រគល់ជូនពលរដ្ឋចំនួន ១ ៦៥៨គ្រួសារ ដើម្បីមានសិទ្ធិប្រើប្រាស់ និងអាស្រ័យផល ។

យោងតាមអនុក្រឹត្យចុះហត្ថលេខាដោយ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា កាលពីថ្ងៃទី២៧ ខែឧសភា ឆ្នាំ២០២២ បានឲ្យដឹងថា មាត្រា១. កែសម្រួលផ្ទៃដីទំហំ ៣ ៤៤៨ហិកតា ៧៧អា ស្ថិតក្នុងភូមិសាស្ត្រខេត្តពោធិ៍សាត់ ចេញពីតំបន់៣ នៃបឹងទន្លេសាប ដែលកំណត់ដោយអនុក្រឹត្យលេខ ១៩៧ អនក្រ.បក ចុះថ្ងៃទី២៩ ខែសីហា ឆ្នាំ២០១១ បញ្ចូលមកតំបន់២ តាមប្រព័ន្ធកូអរដោណេ ។

អនុក្រឹត្យដដែល បន្តថា ការបញ្ចូលមកតំបន់២នេះ ដើម្បីប្រគល់ជូនប្រជាពលរដ្ឋចំនួន ១ ៦៥៨គ្រួសារ ស្ថិតក្នុងស្រុកចំនួន៣ នៅខេត្តពោធិ៍សាត់ ក្នុងនោះស្រុកក្រគរ មានចំនួន ៤ឃុំ, ស្រុកកណ្ដៀង មានចំនួន ៤ឃុំ និងស្រុកបាកាណ មានចំនួន ៣ឃុំ ។

មាត្រា២. បទប្បញ្ញត្តិទាំងឡាយដែលផ្ទុយនឹងអនុក្រឹត្យនេះ ត្រូវទុកជានិរាករណ៍ ។ មាត្រា៣. រដ្ឋមន្ត្រីទទួលបន្ទុកទីស្ដីការគណៈរដ្ឋមន្ត្រី, រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ, រដ្ឋមន្ត្រីក្រសួងរៀចំដែនដី នគរូបនីយកម្ម និងសំណង់, រដ្ឋមន្ត្រីក្រសួងមហាផ្ទៃ រដ្ឋមន្ត្រីក្រសួង គ្រប់ក្រសួង និងប្រធានស្ថាប័នដែលពាក់ព័ន្ធ និងគណៈអភិបាលខេត្តពោធិ៍សាត់ ត្រូវទទួលបន្ទុកអនុវត្តអនុក្រឹត្យនេះ តាមភារកិច្ចរៀងៗខ្លួន ចាប់ពីថ្ងៃចុះហត្ថលេខាតទៅ ។

ពលរដ្ឋនៅខេត្តពោធិ៍សាត់ ដែលនឹងទទួលដីសម្រាប់អាស្រ័យផលវិញ បានសម្ដែងនូវការសប្បាយ​រីករាយ និងថ្លែងអំណរគុណដល់សម្ដេចតេជោ ដែលបានដឹងពីសុខទុក្ខរបស់ពួកគាត់ ហើយផ្ដល់​ដីដល់​ពួកគាត់បានធ្វើស្រែចម្ការ ក្នុងការប្រករបរចិញ្ចឹមជីវីត ។

គួរបញ្ជាក់ថា ក្នុងសារពិសេសជូនជនរួមជាតិ កាលពីថ្ងៃទី២៧ ខែឧសភា សម្តេចតេជោ ហ៊ុន សែន បានបញ្ជាឱ្យមានការកំណត់ជាថ្មី នូវព្រំប្រទល់តំបន់៣ និងតំបន់២ នៃបឹងទន្លេសាប ដោយផ្អែក​លើភាពចាំបាច់ និងជាក់ស្តែង ដែលបឹងទន្លេសាប មានវិសាលភាពធំទូលាយគ្របដណ្តប់​លើ​ខេត្តកំពង់ឆ្នាំង, ពោធិ៍សាត់, បាត់ដំបង, បន្ទាយមានជ័យ, សៀមរាប និងខេត្តកំពង់ធំ ៕

អត្ថបទ បាន សុខរិទ្ធិ