បាល់ទាត់៖ ខ្សែបម្រើក្លិបនគរបាលជាតិ ស៊ុន វណ្ណដេត នឹងមិនអាចរួមចំណែកជួយក្រុមក្នុងការប្រកួតសេសសល់ទៀតបានទេ ដោយសារត្រូវសម្រាកដល់ទៅ ៦ខែក្រោយទទួលការវះកាត់របួសជង្គង់ ដែលបញ្ហានេះបានកើតឡើងអំឡុងការប្រកួត ពានរង្វាន់សម្ដេចអគ្គមហាសេនាបតីតេជោហ៊ុន សែន ថ្នាក់ជាតិ តទល់គិរីវង់សុខសែនជ័យ។
លោក សារ៉េត ស៊ីដន នាយកផ្នែករដ្ឋបាលក្លិបនគរបាលជាតិប្រាប់ថា កីឡាករមានប្រភពពីខេត្តកោះកុង និងធ្លាប់ជាប់ជម្រើសជាតិខាងលើ បានទទួលការវះកាត់ប្រកបដោយជោគជ័យកាលពីព្រឹកថ្ងៃចន្ទ ទី៣១ ខែសីហា នាមន្ទីរពេទ្យព្រះកេតុមាលា ក្រោមការយកចិត្តទុកដាក់ និងឧបត្ថម្ភផ្ទាល់ពីថ្នាក់ដឹកនាំក្លិប។ លោក សារ៉េត ស៊ីដន លម្អិតបែបនេះ “៖គាត់វះកាត់ជង្គង់ដែលដាច់សរសៃកាលពីព្រឹកមិញហើយៗ។ របួសហ្នឹងកើតឡើងពេលលេងជាមួយគិរីវង់ក្នុងពានរង្វាន់សម្ដេចតេជោ ហ៊ុន សែន។ របួសនៅជង្គង់ឆ្វេង ហើយត្រូវសម្រាក ៦ខែបានអាចចូលរួមជាមួយក្រុមវិញបាន។ ”ស៊ុន វណ្ណដេត បង្ហាញខ្លួនញឹកញាប់សម្រាប់នគរបាលជាតិ ក្នុងការប្រកួតក្របខណ្ឌ Metfone Cambodian League 2020 ជុំទី១ ដែលក្រុមរបស់គេបញ្ចប់នៅចំណាត់ថ្នាក់លេខ១១។ ចំណែកក្នុងក្រុមពានរង្វាន់សម្ដេចអគ្គមហាសេនាបតីតេជោ ហ៊ុន សែន ថ្នាក់ជាតិវិញ ពួកគេបានប្រកួតចាញ់គិរីវង់សុខសែនជ័យនៅវគ្គ ១៦ក្រុមចុងក្រោយ៕
អត្ថបទ៖ CNCC
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
