ភ្នំពេញ៖ នាឱកាសខួប១០ឆ្នាំ នៃការបង្កើតការិយាល័យសហប្រតិបត្តិការស្វីសនៅកម្ពុជា និងការដាក់ឱ្យដំណើរការកម្មវិធីកិច្ចសហប្រតិបត្តិការស្វីសនៅក្នុងតំបន់មេគង្គ ឆ្នាំ២០២២-២០២៥ គឺជាការបង្ហាញពីការប្តេជ្ញាចិត្ត និងភាពជាដៃគូដ៏យូរអង្វែងជាមួយកម្ពុជា ព្រមទាំងកោតសរសើរសម្រាប់ការគាំទ្រពីស្វីស និងប្រជាជនចំពោះការគាំទ្រដ៏សប្បុរសចំពោះកម្ពុជាលើគ្រប់វិស័យ។ នេះតាមការលើកឡើងរបស់មន្រ្តីជាន់ខ្ពស់នៃកម្ពុជា។

នៅក្នុងពិធីអបអរសាទរខួប១០ឆ្នាំ កាលពីល្ងាចថ្ងៃទី២៧ ឧសភា ឆ្នាំ២០២២កន្លងទៅនេះ ឯកឧត្តម​បណ្ឌិត អ៊ិត សំហេងរដ្ឋមន្រ្តីក្រសួងការងារ និងបណ្តុះបណ្តាលវិជ្ជាជីវៈ បាន​ថ្លែងអំណរគុណ​ដល់​ប្រទេសស្វីស ​តាមរយៈទីភ្នាក់ងារស្វីសសម្រាប់ការអភិវឌ្ឍ ​និងកិច្ចសហប្រតិ្តបត្តិការ, SDC គឺជា​ម្ចាស់ជំនួយដ៏សំខាន់មួយដែលបានជួយដល់ប្រទេសកម្ពុជា ​តាមរយៈគម្រោងផ្សេងៗ ដើម្បី​អភិវឌ្ឍន៍​សេដ្ឋកិច្ច អភិបាលកិច្ច ការប្រែប្រួលអាកាសធាតុ និងការគ្រប់គ្រងធនធានធម្មជាតិ​ជាដើម។

ឯកឧត្តមរដ្ឋមន្ត្រី បញ្ជាក់បន្ថែមថា ក្រសួងការងារ បានទទួលការគាំទ្រពី SDC លើគម្រោងជាច្រើន​រួមទាំង​ឧបករណ៍បរិក្ខារ ​បច្ចេកទេស ​និងហិរញ្ញវត្ថុ ក្នុងនោះមាន៖ គម្រោងអភិវឌ្ឍន៍ជំនាញដំណាក់​កាលទី១ និងដំណាក់កាលទី២, កម្មវិធី “មុខរបរ ​និងការងារសមរម្យរបស់យុវជននៅកម្ពុជា” ដំណាក់កាលទី១ និងដំណាក់កាលទី២, គាំទ្រដល់ការអភិវឌ្ឍប្រព័ន្ធជាតិអប់រំបណ្តុះបណ្តាល​បច្ចេកទេស ​និងវិជ្ជាជីវៈពីចម្ងាយ​ ឬតាមអនឡាញ (National TVET E-Learning Platform), និងកំពុងគាំទ្រដល់ការអភិវឌ្ឍច្បាប់ TVET ជាដើម។

ឯកឧត្តម បានបន្តថា បច្ចុប្បន្ននេះ រាជរដ្ឋាភិបាលកម្ពុជា បានចាត់ទុកការអភិវឌ្ឍប្រព័ន្ធអប់រំ​បណ្តុះ​បណ្តាល​បច្ចេកទេស និងវិជ្ជាជីវៈ​ ជាអាទិភាពខ្ពស់បំផុត​ ក្នុងគ្រប់ក្របខណ្ឌគោលនយោបាយជាតិ ហើយ​បានធ្វើការវិនិយោគយ៉ាងសន្ធឹកសន្ធាប់លើវិស័យនេះ ដើម្បី​ខិតខំ​រត់តាមឱ្យទាន់​មហិច្ឆតា​ក្នុងការ​អភិវឌ្ឍសេដ្ឋកិច្ចសង្គម ​និងការប្រែប្រួលយ៉ាងឆាប់រហ័សនៃបច្ចេកវិទ្យា ​និងទីផ្សារការងារ ព្រមទាំងក្តីរំពឹងកាន់តែខ្ពស់របស់​ប្រជាពលរដ្ឋក្នុងការមានការងារធ្វើល្អ ​និងកម្រិតជីវភាពកាន់​តែ​ប្រសើរឡើង ​និងធានាថា “យុវជនម្នាក់មានជំនាញមួយយ៉ាងតិចប្រចាំជីវិត”។

ជាមួយគ្នានេះលោកជំទាវ Helene Budliger Artieda (ហេឡែន ប៊ុតលីហ្គ័រ អាតថាយអ៊ីដា) អគ្គរដ្ឋ​ទូតស្វីស​ប្រចាំ​ព្រះរាជាណាចក្រកម្ពុជា ​បានធ្វើការវាយតម្លៃខ្ពស់ចំពោះភាពជាដៃគូយូរ​អង្វែង​របស់ខ្លួនជាមួយរាជរដ្ឋាភិបាលកម្ពុជា ​វិស័យឯកជន​ អង្គការអន្តរជាតិ និងសង្គមស៊ីវិល។ លោកជំទាវ បន្តទៀតថា នៅក្នុងឆ្នាំនេះ ប្រទេសកម្ពុជាទទួលបន្ទុកយ៉ាងសំខាន់ក្នុងនាម​ជា​ប្រធាន​អាស៊ាន ដោយកម្ពុជានឹងដើរតួជាអ្នកដោះស្រាយបញ្ហា​ប្រឈម​មួយ​ចំនួននៅក្នុងតំបន់។ ប្រទេសស្វីស ​រង់ចាំធ្វើការជាមួយកម្ពុជាក្នុងនាមជាដៃគូសន្ទនាតាមវិស័យជាមួយអាស៊ាន (ASEAN Sectoral Dialogue Partner)”​៕ អត្ថបទ៖ ឈិតបូរ៉ាវី