កំពង់ធំ៖ នៅបណ្តាពលរដ្ឋ នៅឃុំក្រវ៉ា ស្រុកបារាយណ៍ ខេត្តកំពង់ធំ បានត្រៀមខ្លួនរួច ការចូលរួមទៅបោះឆ្នោតជ្រើសរើសក្រុមប្រឹក្សាឃុំសង្កាត់អាណត្តិទី៥ នៅថ្ងៃទី៥ ខែមិថុនា ឆ្នាំ ២០២២ ដើម្បីជ្រើសរើសអ្នកតំណាងគាត់ជម្រុញការអភិវឌ្ឍមូលដ្ឋានរបស់បន្តការរីកចំរើន និងការពារសុខសុវត្ថិភាពភូមិឃុំរបស់គាត់។

នៅក្នុងដំណើរជួបសំណេះសំណាលសាកសុខទុក្ខជាមួយឯកឧត្តម ថោង ខុន ប្រធានក្រុមការងាររាជរដ្ឋាភិបាលចុះមូលដ្ឋានខេត្តកំពង់ធំ នៅថ្ងៃទី២៨ ខែមិថុនា បណ្តាប្រជាពលរដ្ឋនៅឃុំក្រវ៉ា បានថ្លែងថា នៅក្នុងអំឡុងពេលនេះ គណបក្សនយោបាយតែ២ប៉ុណ្ណោះ គឺបានចុះធ្វើសកម្មភាពឃោសនាពីគោលនយោបាយគណបក្ស ហើយ គណបក្សដែលមានលេចធ្លោ ក្នុងការចុះឃោសនាអោយពលរដ្ឋទៅបោះឆ្នោតច្រើនជាងគេ គឺគណបក្សប្រជាជនកម្ពុជា។

តាមរយៈការផ្សព្វផ្សាយឃោសនានេះដែរ បានធ្វើអោយបណ្តាពលរដ្ឋ បានត្រៀមខ្លួនរួចរាល់មាន​អត្តសញ្ញាណប័ណ្ណសញ្ជាតិប្រភេទថ្មី ហើយសម្រាប់ពលរដ្ឋដែលបាត់អត្តសញ្ញាណប័ណ្ណ​សញ្ជាតិ​ខ្មែរប្រភេទថ្មីនេះ​ ក៏បានទៅធ្វើប័ណ្ណ ឯកសារបញ្ជាក់​អត្តសញ្ញាណ​បម្រើ​ឲ្យការ​បោះឆ្នោតរួចហើយ ដើម្បីត្រៀមទៅបោះឆ្នោតជ្រើសរើសអ្នកតំណាងគ្រប់គ្រងមូលដ្ឋានរបស់បន្តការអភិវឌ្ឍ និងការរីកចំរើនថែមទៀត។

នៅក្នុងពិធីសំណេះសំណាលនោះដែរ ​ឯកឧត្តម ថោង ខុន ក៏បានស្នើក្រុមគ្រួសារពលរដ្ឋ​ដែល​មាន​សមាជិកគ្រួសារ​ទៅធ្វើការងារចំណាកស្រុកនៅតំបន់ឆ្ងាយៗ​ សូមអញ្ជើញគាត់ត្រឡប់មកផ្ទះវិញ ដើម្បីចូលរួមបោះឆ្នោតនៅថ្ងៃខាងមុខនេះ ​ក្នុងនោះដែរ​ ឯកឧត្តម ​ក៏បានអំពាវនាវអោយពលរដ្ឋ ដែល​បាត់​អត្តញ្ញាណប័ណ្ណសញ្ជាតិខ្មែរ ឬមានអត្តសញ្ញាណប័ណ្ណហួសសុពលរដ្ឋភាព​ការ​ប្រើប្រាស់​ជាដើម ​សូមអញ្ជើញទៅធ្វើប័ណ្ណ ឯ. អ ដើម្បីបានសិទ្ធបោះឆ្នោត ​និង​ជម្រុញ​ការអភិវឌ្ឍខ្លួនបន្ត​ការ​រីកចំរើន៕ រូបអត្ថបទ ស៊ុម សុខជា