​បាល់ទាត់៖ ​ក្រុមបាល់ទាត់​អេ​ស្ប៉ា​ញ Real Madrid បាន​រៀបចំ​ពិធី​ដង្ហែ​ពាន​ជើងឯក​ក្លិប​កំពូល​អឺរ៉ុប UEFA Champions League ជា​លើក​ទី​១៤ ក្នុង​ប្រវត្តិសាស្ត្រ​របស់​ខ្លួន ក្រោយ​យកឈ្នះ​ហង្ស​ក្រហម Liverpool នៅ​វគ្គ​ផ្តាច់ព្រ័ត្រ ១-០ នៅ​ទីក្រុង​ប៉ារីស​កាលពី​ថ្ងៃ​សៅរ៍​។

​​អ្នកគាំទ្រ​រាប់ពាន់នាក់​បាន​ចូលរួម​ក្នុង​ពិធី​ដង្ហែ​ពាន​នៅតាម​ដងផ្លូវ​ក្នុង​ទីក្រុង Madrid និង​ជប់លៀងអបអរ​ជ័យជំនះ​ដ៏​អស្ចារ្យ​របស់ Real Madrid ក្នុង​រដូវ​កាល​នេះ​នៅ​កីឡដ្ឋាន Santiago Bernabeu​។ Vinicius Junior គឺជា​អ្នក​ស៊ុត​គ្រាប់​ជ័យជំនះ​ឱ្យ Real Madrid នៅ​វគ្គ​ផ្តាច់ព្រ័ត្រ​នោះ​ដែល​ធ្វើឱ្យ Real Madrid ក្លាយជា​ជើងឯក UEFA Champions League លើក​ទី៥ ក្នុង ៧រដូវ​កាល​ចុងក្រោយ​។ ​​អ្នកចាំទី​ប៊ែ​ល​ហ្ស៊ិ​ក Thibaut Courtois ដែល​ធ្លាប់​ត្រូវបាន​អ្នកគាំទ្រ Real Madrid ខ្លួនឯង​រិះគន់​ពេល​ផ្លាស់​ពី Chelsea ដំបូង​នោះក៏ត្រូវ​បាន​គេ​ចាត់ទុកជា​វីរបុរស​ក្នុងការ​ប្រកួត​នោះដែរ បន្ទាប់ពី​ការជួយ​សង្គ្រោះ​គ្រាប់​បាល់​សំខាន់ៗ​ជាច្រើន​ពី​ការ​ស៊ុត​របស់ Liverpool​។

​​នេះ​ជា​ពាន UEFA Champions League លើក​ទី៤ ក្នុង​អាជីព​របស់​អ្នកចាត់ការ​អ៊ីតាលី Carlo Ancelotti ដែល​បាន​ចាក​ចេញពី Everton មក​ដឹកនាំ Real Madrid បន្ត​ពី​ការចាកចេញ​របស់ Zindine Zidane ពោលគឺ​បុរស​វ័យ ៦២ឆ្នាំ​រូបនេះ​ក៏​ធ្លាប់​ដឹកនាំ Real Madrid ឈ្នះ​ពាន UCL នេះ​ម្តង​ដែរ​កាលពី​ឆ្នាំ២០១៤ បន្ទាប់ពី​ជួយ AC Milan ឈ្នះ​ពាន​ពីរលើក​នៅ​ឆ្នាំ២០០៣ និង ២០០៧៕

​អត្ថបទ​៖​នាង សុភា​វុ​ធ