សៀមរាប៖ ក្រុមការងារថ្នាក់ជាតិ កំពុងសិក្សារៀបចំកាត់ឆ្វៀលដីព្រៃលិចទឹកក្នុងតំបន់បឹងទន្លេសាប ជូនពលរដ្ឋជិត ៤០០គ្រួសារ នៅស្រុកក្រឡាញ់ ខេត្តសៀមរាប ដែលបានអាស្រ័យផលកន្លងមក។

ក្រុមការងាររាជរដ្ឋាភិបាលថ្នាក់ជាតិចុះជួយស្រុកក្រឡាញ់ ខេត្តសៀមរាប កាលពីចុងសប្ដាហ៍មុន នេះ បានជួបសំណេះសំណាល និងសួរសុខទុក្ខប្រជាពលរដ្ឋ ដែលរស់នៅ និងអាស្រ័យផល​លើដីព្រៃលិចទឹកក្នុងតំបន់បឹងទន្លេសាប​ ស្ថិតក្នុងភូមិសាស្ត្រ ស្រុកក្រឡាញ់ ដើម្បីកាត់ឆ្វៀល​ដី​ជិតមួយ​ពាន់ហិកតាជូនពួកគេ ​ចំនួន៣៨១គ្រួសារ​ តាមការណែនាំរបស់រាជរដ្ឋាភិបាល។

ឯកឧត្តម ជា ច័ន្ទបរិបូរណ៍ អនុប្រធានក្រុមការងាររាជរដ្ឋាភិបាលចុះជួយស្រុកក្រឡាញ់ ​បាន​លើក​ឡើងថា​ យុទ្ធសាស្ត្ររបស់ប្រមុខរាជរដ្ឋាភិបាលនាពេលនេះ ​ដើម្បីស្រាវជ្រាវ ​និងចាត់ការពួក​ជនខិលខូច​ទៅតាមនីតិវិធីច្បាប់ ដែលយកខ្នង​ប្រជាកសិករជាបង្អែក​បិទ​បាំងភាព​លោកភលន់​របស់ខ្លួន។

ឯកឧត្តម បានបញ្ជាក់ថា ​យុទ្ធសាស្ត្រដ៏ឈ្លាសវៃ ​និង​ប៉ិនប្រសប់​ប្រកប​ដោយ​គតិបណ្ឌិតរបស់​សម្តេចតេជោ ហ៊ុន សែន ធ្វើឱ្យប្រជាកសិករមានការទុកចិត្ដ ​និងស្រលាញ់ ។ ថ្មីៗនេះ ​សម្តេចតេជោ ហ៊ុន សែន នាយករដ្ឋមន្ត្រី បានផ្តល់នូវអនុសាសន៍ដល់ខេត្តដឹកនាំអាជ្ញាធរក្រុងស្រុកឃុំសង្កាត់ និង​មន្ត្រីអាជ្ញាធរជំនាញនានា ​នៃខេត្តពាក់ព័ន្ធ ​ពិនិត្យនិងវាយតម្លៃឱ្យបានច្បាស់លាស់អំពីការរស់នៅ និង​ការ​អាស្រ័យផលរបស់ប្រជាកសិករ ​ដែលពួកគេមានលំនៅឋាន​អចិន្ត្រៃយ៍ និងកំពុងអាស្រ័យ​ផលធ្វើស្រែតាំងពីយូរយាមកហើយ ​ឬក៏ត្រឹម១០ឆ្នាំចុះក្រោម ​នៅតំបន់ព្រៃលិចទឹក នៃភូមិសាស្ត្រ​បឹងទន្លេសាប ​ដើម្បីផ្តល់កម្មសិទ្ធិឱ្យពួកគេប្រើប្រាស់។

លោកស្រី ម៉ននី រង្សី ប្រធានគណៈកម្មាធិការគណបក្សប្រជាជនកម្ពុជា​ ស្រុកក្រឡាញ់ បាន​បញ្ជាក់ថា នៅពេលឆាប់ៗខាងមុខនេះ ​រដ្ឋបាលខេត្ត​ នឹងចាត់តាំងដឹកនាំក្រុមការងារ ​និងមន្ត្រីជំនាញ ដើម្បីពិនិត្យ​វាស់វែង ​និងបោះបង្គោល​ទៅតាមនិយាមការលើដីជាក់ស្តែង ដែលប្រជាពលរដ្ឋបាន​រស់នៅ ​និងអាស្រ័យផលជាយូរមកហើយ។

លោកស្រី បាណែណនាំឱ្យប្រជាពលរដ្ឋ កុំជឿការញុះញង់របស់ក្រុមឈ្មួញ ​និងក្រុមជន ដែល​បន្លំ​បោកប្រាស់ ដើម្បីទទួលបានបានប្រយោជន៍នូវសិទ្ធិកាន់កាន់​ដីតំបន់នោះ ដែលនាំឱ្យ​មាន​បញ្ហាប្រឈមនឹងផ្លូវច្បាប់។​

អាជ្ញាធរភូមិ និងមន្ត្រីពាក់ព័ន្ធ ប្រជាពលរដ្ឋ ដែលកំពុងធ្វើការបង្កបង្កើនផលស្រូវនៅលើទីតាំងដី​ក្នុង​តំបន់៣ នៃស្រុកកក្រឡាញ់ ​ត្រូវប្រកាន់យកផ្លូវច្បាប់ជាចម្បង៕ អត្ថបទ៖ ឈិត សាវី