ភ្នំពេញ៖ កម្ពុជាសម្រាប់ឆ្នាំ ២០២២ នេះ ជាលើកទី១ ដែលមានការរៀបចំការប្រមូល ចងក្រង វិភាគទិន្នន័យស្ថិតិសេដ្ឋកិច្ចបរិស្ថានជាលើកដំបូង។ ជាក់ស្ដែងសម្រាប់ថ្ងៃនេះ ក្រុមការងារនៃ ក្រសួងផែនការ និងមានការចូលរួមពី ក្រសួង ស្ថាប័នជាតិ និងអន្តរជាតិ បានរៀបចំសិក្ខាសាលា​ដើម្បីប្រមូលធាតុចូលបន្ថែម ទៅលើកម្រងសំណួរដែលនឹងប្រើប្រាស់ ដើម្បីធានានូវគុណភាព និងប្រសិទ្ធភាព។

ការប្រមូល ចងក្រង វិភាគទិន្នន័យស្ថិតិសេដ្ឋកិច្ចបរិស្ថាន ជាការងារលើកដំបូងដែលកម្ពុជា រៀបចំ​ឡើង។ គោលបំណងគឺបំពេញសេចក្ដីត្រូវការប្រើប្រាស់ទិន្នន័យរបស់ក្រសួង ស្ថាប័ន អង្គការជាតិ និងអន្តរជាតិនានាសម្រាប់ជាធាតុចូលមូលដ្ឋានគ្រឹះ​ក្នុងការរៀបចំគោលនយោបាយ​អភិវឌ្ឍន៍​សេដ្ឋកិច្ច បរិស្ថាន សង្គមកម្ពុជា​ គណនា​កំណើនសេដ្ឋកិច្ចជាតិ ​ផែនការយុទ្ធសាស្រ្តអភិវឌ្ឍន៍​ជាតិឆ្នាំ ២០១៩-២០២៣ និង​គោលដៅ​អភិវឌ្ឍន៍​ប្រកបដោយដោយចីរភាពឆ្នាំ ២០៣០។ នេះជាការលើកឡើងរបស់ឯកឧត្តម រិន វីរៈ រដ្ឋលេខាធិការក្រសួងផែនការ។

ឯកឧត្តម រដ្ឋលេខាធិការ បន្តថា ការប្រមូល ចងក្រង វិភាគទិន្នន័យស្ថិតិសេដ្ឋកិច្ចបរិស្ថាន ជា​កិច្ចការ​សំខាន់​ដែលត្រូវធ្វើជាប្រចាំឆ្នាំ ដើម្បីធ្វើបច្ចុប្បន្នភាពទិន្នន័យសេដ្ឋកិច្ចបរិស្ថានឱ្យកាន់តែសំបូរបែប ដូចជាទិន្នន័យ​ស្ថិតិរ៉ែ និងថាមពល ​ស្ថិតិប្រើប្រាស់និងផ្គត់ផ្គង់ថាមពលអគ្គិសនី ស្ថិតិប្រើប្រាស់​ប្រភពទឹក ​ធានធានធម្មជាតិ ​ការគ្រប់គ្រងសំណល់​ ផលប៉ះពាល់នៃគ្រោះមហន្តរាយ ដែល​ពុំទាន់ធ្លាប់​ការប្រមូល ​ចងក្រងពីមុនមក។

ឯកឧត្តម លើកឡើងដែរថា ការងារប្រមូល ចងក្រង វិភាគទិន្នន័យស្ថិតិសេដ្ឋកិច្ចបរិស្ថាននៃកម្ពុជា គឺជាកិច្ចការងារថ្មីលំបាកមួយទៀត ​របស់វិទ្យាស្ថានជាតិស្ថិតិ ក្នុងផែនការប្រតិបត្តិប្រចាំឆ្នាំ ដោយ​ត្រូវអនុវត្តពីឆ្នាំ២០២២តទៅ តាមរយៈការ​ឧបត្ថម្ភ​គាំទ្រ​ថវិកាកម្មវិធីរបស់ក្រសួងសេដ្ឋកិច្ច និង​ហិរញ្ញវត្ថុ របស់រាជរដ្ឋាភិបាលកម្ពុជា ​ដើម្បីរួមចំណែកក្នុងការលើកកម្ពស់ប្រព័ន្ធស្ថិតិជាតិ និងថ្នាក់ក្រោមជាតិ។

ការងារប្រមូល ចងក្រង វិភាគទិន្នន័យស្ថិតិសេដ្ឋកិច្ចបរិស្ថាននៃកម្ពុជា គឺត្រូវការមន្ត្រីដែលមាន​ឆន្ទៈធ្វើការងារ ​មានសមត្ថភាព ចំណេះដឹង និងបទពិសោធន៍ការងារចូលរួមក្នុងការចុះប្រមូលស្រង់​ទិន្នន័យ​នៅតាមមូលដ្ឋាន​ ក្រសួងស្ថាប័ន ក្រុមហ៊ុន​ អង្គការជាតិ និងអន្តរជាតិ ដើម្បីប្រមូល ចងក្រង​និងវិភាគទិន្នន័យស្ថិតិក្នុងវិស័យពាក់ព័ន្ធទាំងនោះឱ្យមានគុណភាព ​ប្រសិទ្ធភាព និងទាន់ពេលវេលា៕ អត្ថបទ៖ គឹមហុក