ភ្នំពេញ៖ ឯកឧត្តម ថោង ខុន រដ្ឋមន្ត្រី ក្រសួងទេសចរណ៍ បានអះអាងថា នៅក្នុងអំឡុងពេលដែលពិភពលោក កំពុងជួបវិបត្តិការរាតត្បាតកូវីដ១៩ រាជរដ្ឋាភិបាលកម្ពុជា បានទាញយកឱកាសមានវិបត្តិនេះ ទៅ អភិវឌ្ឍន៍តំបន់ឆ្នេរសមុទ្រកម្ពុជា ដើម្បីបង្កើនភាពភាពទាក់ទាញភ្ញៀវទេសចរជាតិអន្តរជាតិអញ្ជើញទៅទស្សនា និងការជំរុញកំណើនសេដ្ឋកិច្ចវិញ នៅក្រោយស្ថានការណ៍កូវីដ១៩ធូរស្រាលវិញ។

នៅក្នុងឱកាសបើកសិក្ខាសាលាផ្សព្វផ្សាយ ស្តីពីបទដ្ឋាន គតិយុត្តនានាក្នុងការគ្រប់គ្រង និងអភិវឌ្ឍន៍តំបន់ឆ្នេរសមុទ្រកម្ពុជា នៅសាលាខេត្តកែប ថ្ងៃទី៣០ ខែឧសភានេះ ឯកឧត្តម ថោង ខុន ក្នុងនាមជា អនុប្រធានអចិន្ត្រៃយ៍គណៈកម្មាធិការជាតិគ្រប់គ្រង និងអភិវឌ្ឍន៍តំបន់ឆ្នេរ​សមុទ្រកម្ពុជា បានថ្លែងថា បន្ទាប់ពី ឆ្នេរសមុទ្រកម្ពុជា ដូចជា ឆ្នេរសមុទ្រនៅខេត្តកែប កំពត ព្រះសីហនុ និងខេត្តកោះកុង បានដាក់បញ្ចូលសមាជិកក្លឹបឆ្នេរសមុទ្រដែលស្អាតជាង​គេបំផុត​លើ​ពិភព​លោក នៅថ្ងៃទី២៥ ខែឧសភា ឆ្នាំ២០១១ មក បណ្តាឆ្នេរសមុទ្រកម្ពុជានៅតាម​បណ្តាខេត្ត​ទាំងនេះ គឺទទួលបានការអភិវឌ្ឍតំបន់ឆ្នេរសមុទ្រជាបន្តបន្ទាប់ដើម្បីបង្កើនភាពទាក់​ទាញ​ភ្ញៀវទេសចរជាតិអន្តរជាតទៅទស្សនាកម្សាន្ត។

ឯកឧត្តម ថោង ខុន បន្តថា តាមការផ្សព្វផ្សាយបទដ្ឋានគតិយុត្តក្នុងការគ្រប់គ្រង និងអភិវឌ្ឍតំបន់​ឆ្នេរ​សមុទ្រកម្ពុជានៅថ្ងៃនេះ ​នៅក្នុងខេត្តកែប នឹងត្រូវទទួលបានការអនុវត្តគម្រោងម្រោងឆ្នេរខ្សាច់​កម្សាន្តកម្រិតខ្ពស់ប្រវែង ២.៧០០ ម៉ែត្រ ដែលមានគិតគូរខ្លាំងទៅលើការបង្កើតឆ្នេរខ្សាច់កម្សាន្ត​របស់រដ្ឋ អោយ​មានទេសភាពស្រស់ស្អាត ​បែបប្រណិត ​ដើម្បីអភិវឌ្ឍន៍ផលិត​ផលទេសចរណ៍ និងការបង្កើនភាពទាក់ទាញភ្ញៀវទេសចរមកទស្សនាខេត្តកែប។

ឯកឧត្តម សោម ពិសិដ្ឋ អភិបាល នៃគណៈអភិបាលខេត្តកែប បានថ្លែងថា នៅពេលថ្មីៗ​កន្លង​មកនេះ​គណៈកម្មាធិការជាតិគ្រប់គ្រង និងអភិវឌ្ឍតំបន់ឆ្នេរសមុទ្រកម្ពុជា បាន​ជួយឧបត្ថម្ភ​គ្រឿងចក្រ​សម្អាតឆ្នេរជួយលើការកែលម្អឆ្នេរខ្សាច់កម្សាន្ត​សម្រាប់ការប្រឡងប្រណាំងឆ្នេរស្អាត និងការផ្តល់នូវគម្រោងឆ្នេរខ្សាច់កម្សាន្តកម្រិតខ្ពស់ប្រវែង ​២.៧០០ម៉ែត្រ ​ស្ថិតនៅភូមិថ្មី ​សង្កាត់ព្រៃធំ ក្រុងកែប ដែលគម្រោងនេះ បានជះឥទ្ធិពលយ៉ាងធំធេងដល់រដ្ឋបាលខេត្ត លើវិស័យទេសចរណ៍ និងបានល្បីល្បាញដល់គ្រប់មជ្ឈដ្ឋានវិនិយោគិន ​បានមកទំនាក់ទំនងលើគម្រោងអភិវឌ្ឍនានា មានទីក្រុងរណប​ គម្រោងអភិវឌ្ឍតាមបណ្ដាកោះ ​និងតាមបណ្ដោយឆ្នេរជាដើម។

សូមបញ្ជាក់ថា តាមស្ថិតិទេសចររយៈពេលបួនខែ ដើមឆ្នាំ២០២២ ​តំបន់ឆ្នេរសមុទ្រកម្ពុជា ទទួលបាន​ទេសចរអន្តរជាតិមក កម្សាន្តមានចំនួនសរុប ១៨០,៦៥២ នាក់ កើនឡើង ៣១០.៥% បើធៀបនឹងឆ្នាំ២០២១ ​ហើយទេសចរជាតិមក​ កម្សាន្តមានចំនួនសរុប​ ១,៩៤៥,៤០៩ នាក់ កើនឡើង ១១៤.៦%បើធៀប​នឹងឆ្នាំ២០២១ មាន​ចំនួនសរុប ៩០៦,៣៧២នាក់ ។ ដោយឡែក ខេត្តកែប សម្រាប់​៥ខែដើមឆ្នាំ២០២២ទទួលបានភ្ញៀវទេសចរមកទស្សនាសរុប ៧,៧៥៩ នាក់ កើនឡើង ៣៨១%៕

អត្ថបទ ស៊ុមសុខជា