​បាល់ទាត់៖ ​ក្រុមបាល់ទាត់ Nottingham Forest បានបញ្ចប់​ការទន្ទឹងរង់ចាំ​រយៈពេល ២៣ឆ្នាំ​ក្នុងការ​ត្រលប់​មកកាន់​ក្របខណ្ឌ​កំពូល English Premier League វិញ បន្ទាប់ពី​យកឈ្នះ Huddersfield Town នៅ​វគ្គ​ផ្តាច់ព្រ័ត្រ Play-Off នៃ​ក្របខណ្ឌ​ទី២ League Championship​។

​​គ្រាប់​បាល់​ជ័យជំនះ​របស់ Nottingham Forest ត្រូវ​សំរេច​នៅ​នាទី​ទី៤៣ ដោយ​គ្រាប់​បាល់​ចូល​ទី​ខ្លួនឯង​របស់ Levi Colwill ពី​បាល់​កាត់​ចូល​កណ្តាល​របស់ James Garner​។ ​​ជាការ​កែប្រែ​រដូវ​កាល​ដ៏​អស្ចារ្យ​សំរាប់ Nottingham Forest បន្ទាប់ពី​ចាប់ផ្តើម​រដូវ​កាល​ដោយ​ចាញ់ ៦ ក្នុងចំណោម ៧ប្រកួត​ដំបូង​ដែលជា​ការចាប់ផ្តើម​រដូវ​កាល​ដ៏​អាក្រក់​បំផុត​ក្នុង​រយៈពេល ១០៨ឆ្នាំ​នៃ​ប្រវត្តិសាស្ត្រ​ក្លិប​។ ​​នៅ​ខែកញ្ញា ​ឆ្នាំ២០២១ កន្លងទៅ Nottingham បាន​បណ្តេញ​គ្រូបង្វឹក​លោក Chris Hughton ចេញពី​តំណែង​តែងតាំង​លោក Steve Cooper ដែល​ធ្លាប់​ដឹកនាំ Swansea ដល់​វគ្គ Play-Off ពីរលើក​នោះ​ជា​អ្នក​បន្ត​តំណែង​។

​​លោក Steve Cooper ដែល​គេ​គិតថា ​អ្នក​ទទួលថ្មបាក់​នោះបាន​នាំ Nottingham Forest ឡើងមក​ដល់​លេខ ៦ កាល​ពី​ខែកុម្ភៈ និង​បញ្ចប់​រដូវ​កាល​នៅ​ចំណាត់​ថ្នាក់​លេខ ៤​។ ​​មិនតែប៉ុណ្ណោះអតីត​ជើងឯក​អឺរ៉ុប ២សម័យមួយ​នេះ​ក៏បាន​យកឈ្នះ​កាំភ្លើង​ធំ Arsenal និង Leicester City ផងដែរ​នៅ FA Cup មុន​ចាញ់​ក្រុម​ជើងឯក Liverpool នៅ​វគ្គ ៨ក្រុម​ចុងក្រោយ​។ ​​ថ្វីបើ​មិនមែនជា​ជើងឯក​នៃ​ក្របខណ្ឌ League Championship នេះ​ក៏ដោយ Nottingham Forest ត្រូវបាន​គេ​ប៉ាន់ប្រមាណ​ថា ​បានទទួល​ផលចំណេញ​ពី​ការ​ត្រលប់​មកកាន់ English Premier League នេះ​ដល់​ទៅ ១៧០លាន​ផោន​៕

​អត្ថបទ​៖​នាង សុភា​វុ​ធ